Read berom Besuga Israyɛl 11 Bible Online

Besuga Israyɛl 11 - berom bible

Besuga Israyɛl 11

¹Yɛfta á sè mwât Gileyat, a sé sugâ como tyɔng wɛt. Neng mɛ á sè devwes, ko Gileyat wɛ̀ de á sè da mɛ.

²Hwâ wenêng Gileyat o a tɔs a yɛ nèy bewen. Jeng de bewen o ba tɛ́ ɛn berey, ko ba ro Yɛfta yi e lɔ mo, yɛn a yang ɛ, “Hwà rɔda sɛ̀ pyɛ̂ nedanelɔ na wot wɛt, yaga hwà sé hwêy hwā hwak.”

³Yaga ano, Yɛfta a tele yi na begwa mɛ, a wɔ̀ sangal e vwêl Top. Bezɔng nèy kwong ba wɔ̀ sangal tanga yɛ, ko ba wɔ̀ hashe pyɛ̂ bemat tanga yɛ.

⁴E bama jeng tyɔng BeAmɔn ba wɔ̀ hwo BeIsrayɛl na como,

⁵ko bemakûk Gileyat ba wɔ́ e sevwêl Top, na be wɔ̀ jut Yɛfta.

⁶Yɛn a yang ɛ, “Vey, na hwo tɛ́ o mwât nuyel mot, na wot tó como na BeAmɔn.”

⁷Ko Yɛfta a toyo a yɛn, a ye, “Me ye, e yin de yin a kyɛ́ in me, ko yin a ró me yi e lɔ da hom wɛt arɛt? Yaga sɛ́ de yin a sé yishi me a remo, e jeng de yin a sé e ji reyɔm ɛ?”

⁸Ko yɛn a yang ɛ, “Ey, ko mwa ano, wot e simo na hwo vey na wot wɔ̀ to como yemo na BeAmɔn, ko hwo wɛ̀ hwà rɔda tɛ́ o wo nuyêl mwa bemât Gileyat.”

⁹Yɛfta a toyo a yɛn, a yang ɛn, “Ka sede yin a toyo na me e lɔ, na me tó como na BeAmɔn, ko ka sede Dagwi Darwey a nɔng me wɛng na me re ɛn e como mo, ma rɔda tɛ́ me mwât nuyel min.”

¹⁰Bemakuk o ba yang ɛ, “Wot a simo ano. Dagwi Darwey a sé mwât nuha mot, mwin, wot a rɔda ra tyɛng pyɛ de hwà ha.”

¹¹Ano kwong Yɛfta a kyè tanga bemakuk o. Bemât Gileyat ba tɛ̀ ɛ a tɛ́ ɛ mwât nuyel mɛn, a to tɛ́ ɛ gwɔ̀m como mɛn arɔng. Yɛfta kwong a há pyɛ̂ mwa e nuyêl Dagwi Darwey e Mizpa.

¹²A vane ano, Yɛfta a tomo betom vɔk na gbɔng gwɔ̀m BeAmɔn, a yang ɛ, “E sɛ́ de hwó jāma na me arɛt? Yaga sɛ́ de hwà vey hwo ot na como e ji sevwel mot arɛt?”

¹³Gbɔng Gwɔ̀m Amɔn a toyo a betom Yɛfta, a ye, “Jeng de BeIsrayɛl bá sè kyè yi e Misra, yɛn a sey ɛ̀ vwel hom yi e Rɔt Arnɔn vɔk e Rɔt Yabɔk, na vɔk e rwa ta, e Rɔt Yɔrdan arɔng. A remo toyo a me na vwel hom yaang zɔng.”

¹⁴Yɛfta a to tomo betom vɔk na gwɔ̀m Amɔn o gbak,

¹⁵a yang ɛ, “Yɛfta a ye ngan: Israyɛl a kana sey ɛ̀ vwêl Mowap kɛ vwêl Amɔn wɛt.

¹⁶Jeng de BeIsrayɛl ba nusu yi e Misra, yɛn a kwey e gwông hey vɔk e Gbɔng Rep Sere, ko ba vey e Kadɛsh.

¹⁷BeIsrayɛl ba tomo vɔk na gbɔng gwɔ̀m Ɛdɔm wɔgɔ, a simo a yɛn na be kwey e ji vwel mɛ, ko gwɔ̀m Ɛdɔm a kyɛ́ ɛ. Ano arɔng, yɛn a tomo vɔk na gbɔng gwɔ̀m Mowap, ko yɛ arɔng a simo a yɛn na be kwey ɛ wɛt. Yaga ano BeIsrayɛl ba vɛ̌ nàra e sangal e Kadɛsh.

¹⁸E bama mo, yɛn a kyè kwɛngɛl mɛn e hey, yɛn a wɔ gwɔrɔ vwel Ɛdɔm tanga hê Mowap, sɛ̌ yɛn a wɔ pom e rwa rak wo Mowap, ko yɛn a tɛ̀ dura mɛn e gura gworo gwô Rɔt Arnɔn. Ano kwong yɛn a ka yel e ji sevwel Mowap wɛt, yaga Rɔt Arnɔn hɛ de ha sé e yɛnɛ̂ vwel Mowap o.

¹⁹“E jeng yane BeIsrayɛl ba tomo vɔk na Sihɔn gbɔng gwɔ̀m BeAmɔr e Hɛsbɔn wɔgɔ, a simo a yɛn na be kwey e yɛnɛ̂ sevwel mɛ vɔk e vwel mɛn.

²⁰Sihɔn kwong a sey tsak o na ha mɛn wɔgɔ, yɛn ê kwey e yɛnɛ̂ vwel mɛ zɔng wɛt. A tula mwa bemât como mɛ myak, yɛn a tɛ̀ dura mɛn e Yahas, ko yɛn a hwo BeIsrayɛl na como.

²¹Ko Dagwi Darwey, Dagwî BeIsrayɛl a nɔng Sihɔn na bemat mɛ mwa e ji vwɔ̂ BeIsrayɛl, yɛn a re ɛn na como mo. Yaga ano yɛn a vɔk be re negwɔm vwêl BeAmɔr mwa na bemat o.

²²Yɛn a vɛ̌ re negwɔm sevwêl BeAmɔr yi e Rɔt Arnɔn e rwa batin vɔk e Rɔt Yabɔk e bato, yi e hey e rwa rak vɔk e Rɔt Yɔrdan e ta.

²³“Di, Dagwi Darwey, Dagwî BeIsrayɛl wɛ de a ro BeAmɔr, a sey ɛ̀ sevwel o a nɔ̂ng bemat mɛ BeIsrayɛl. Ko hwo, a remo hwó simo na hwo to sey ɛ̀ sɛ̄ arɛt?

²⁴Hwô gunung hwo na pyɛ de Kɛmɔsh, dagwi mō, a nɔng o, na hwo re ɛ̀ negwɔm wɛt arɛt? Ano arɔng, wot a rɔda vɔk mwa pyɛ́ de Dagwi Darwey, Dagwi mot a ga nɔng ot, na wot re ɛ̀ negwɔm.

²⁵Hwó bare, hwà dal Balak Zipor, gbɔng gwɔ̀m Mowap arɛt? Hwà ga sang wok ɛ́ a vɔk repugu na Israyɛl arɛt? Kɛ hwà kyɛm, hwo wok, a tó como na yɛ arɛt?

²⁶BeIsrayɛl ba sangal neshey naga betat e Hɛshbɔn tanga e Arower na nebapomo mɛn, tanga e mwa bapomo barey de ba sé e vwarâ Rɔt Arnɔn. Sɛ́ de ya tɛ̀ hwà tɔk sey ɛ̀ vɛ yimo raane mo wɛt arɛt?

²⁷Ma ga sang ra a hwo renɛn wɛt, ko e hwo wɛ de hwà sé ra a me pyɛ vyes, yaga hwà sé simo to como na me. Dagwi Darwey wɛ de a sé mwât yɛrɛ̂ shɔt, tik na yɛ a yɛrɛ shɔt yunung e tê BeIsrayɛl na BeAmɔn.”

²⁸Ko gbɔng gwɔ̀m BeAmɔn a ka tɛ̀ há de Yɛfta a tomo a yɛ ha sé pyɛ cak wɛt.

²⁹A vane ano, Gabik Dagwi ha vɛ̌ hwo e ra Yɛfta, a sogo, a kwey e vwêl Gileyat tanga vwêl Manase a to ɛ wɔ̀ e Mizpa wo Gileyat, ko e hwomo a vɛ̌ tút wɔ̀ sɛ̀ BeAmɔn.

³⁰Yɛfta a sira a Dagwi Darwey, a ye, “Ka sede hwà nɔng me BeAmɔn na me di wɛng e ra yɛn,

³¹kayɛ pyɛ de ya tānga nusu vey sey me, jeng de ma re BeAmɔn e como mo, ya rɔda sè ye Dagwi Darwey, ko ma rɔda nára a Dagwi yɛ e nɔrɔ̂ yas de be rangas a Dagwi.”

³²E bama mo, Yɛfta a ye dɔ a rɔt wɔ tó como na BeAmɔn, ko Dagwi Darwey a tɛ̀ ɛ a di wɛng e ra yɛn.

³³A mɔbɔs hɛn ding-ding yi e Arower vɔk e bak vwêl Minit, a re bapomo kuru baba, ko a re nuyel pere wɔ e Abel-Keramin. Yi ano BeAmɔn ba wey e vwɔ̂ BeIsrayɛl.

³⁴Jeng de Yɛfta a toyo yi e como mo vɔk e lɔ mɛ e Mizpa, hwóng mɛ a hwo nusu vey gyeng ɛ. A yi na rɛɛ, na dâk bing, yɛ ma wane de a sé hwey mɛ hwong o zɔng, vit a yɛ à hak à hwey wen kɛ hwong wɛt.

³⁵Sede a di hwóng mɛ mo, ko a vɛ̌ hama berugu mɛ yaga lashê yey, ko a ye, “Káa, à hwey hom, yaga sɛ́ de hwà rá me ano ɛ? Hwà ga tɛ̀ me e ji reyɔm! Yaga ma ga kana sira e nuyêl Dagwi, hemo de mê tɔk toyo na bama wɛt.”

³⁶Hwōng o a yang ɛ, “À da, sede remo de hwà ga sira ano e nuyêl Dagwi Darwey, ko ra na me tyɛng na pyɛ de hwà ga kana sira, remo de Dagwi a ga tala a hwo pyɔ̌n e ra bemât repugu mō BeAmɔn.”

³⁷Ko a to yang da mɛ, “Mê ra wôn pyɛ jining yemo na hwo, simo a me, na me wɔ̀ kyě kyè tanga behywi hom pɛl ba e bahwol na me tosho, yaga ma rɔda ku sana ra weneng.”

³⁸Da mɛ a yang ɛ, “Ey, kyè”, ko a tɛ̀ ɛ e gwong pɛl ba. A kyè, yɛ na behywi mɛ, a wɔ̀ tosho e bahwol, yaga a rɔda ku sana ra weneng na tɔ̂s nèy.

³⁹E bamâ pɛl ba mo a toyo vey na da mɛ. Yɛ kwong a ra na yɛ̀ tyɛng na pyɛ de a ga kana sira, ko hwong o a ku sana tɔk rwas. Pyɛ yane ya tɛ́ ɛ negwɔn e ji Israyɛl:

⁴⁰Behwong Israyɛl ba nunus kahɛ shey, ba tosho pɔlɔ naas yaga bare na hwông Yɛfta, WoGileyat.