Read berom Besuga Israyɛl 12 Bible Online

Besuga Israyɛl 12 - berom bible

Besuga Israyɛl 12

¹A vane ano, BeƐfrayim ba yong ɛn yaga tô como, ko yɛn a ye dɔ vɔk e Zafon. Yɛn a yâng Yɛfta, “Yaga sɛ́ de hwà ye dɔ na hwo wɔ̀ tó como na BeAmɔn sana yishi hot na wot wɔ́ tanga hwo arɛt? Di, a remo wot ê tɛ̀ kya e ra hwo na lɔ mo mwa.”

²Ko Yɛfta a toyo a yɛn, a yang ɛn, “Me tanga bemat hom wot á ga sè tô cuna na BeAmɔn. Ma yishi hin, yaga na yin sey me, ko yin a kyɛ́ in nà sey me yi e vwɔ mɛn.

³Jeng de ma di, yin a tɔk sey me yi e vwɔ mɛn wɛt, ko ma ye waa a neken hom, ma wɔ̀ tó como na yɛn, ko Dagwi Darwey a tɛ̀ ma di wɛng e ra yɛn. Yaga sɛ́ de yin a vêy como na me yunung ɛ?”

⁴Yɛfta kwong a tula BeGileyat mwa, ba wɔ̀ tó como na BeƐfrayim, ko yɛn a re ɛn e como mo, yaga BeƐfrayim bà kana yâng BeGileyat, “Yin a sé bemat de ba tele yi e ji BeƐfrayim tanga BeManase!”

⁵BeGileyat ba dul begwông té dɔ̂ Rɔt Yɔrdan, yaga BeƐfrayim bê kwon ye dɔ. Ko sede WoƐfrayim hwak a vey, a ra won, be tik ɛ, na a ye dɔ, ko BeGileyat bê rangal hɛ, be ye, “Hwà sé WoƐfrayim arɛt?” Ka sede a ye, “Wey”,

⁶ko yɛn ê yang ɛ, “Ye Shibolet.” Ko ê ye “Sibolet”, yaga ê tɔk ye tyɛng wɛt, ko bê vo ɛ, be mɔrɔ hɛ e gwông yé dɔ à Rɔt Yɔrdan. BeƐfrayim de ba mɔbɔs hɛn e jeng yane ba wul gu kuru banaas na vɛ baba (42,000).

⁷Yɛfta WoGileyat á sè mwât nuyêl BeIsrayɛl neshey netyiimin. E bama mo a ku, ko ba lɛrɛ hɛ e repomo mɛ e Gileyat.

⁸Bamâ Yɛfta, Ibzan WoBɛtlɛhɛm a tɛ́ ɛ mwât nuyêl BeIsrayɛl.

⁹Ibzan a vɔk nèy bewen kuru batat na nèy behwong kuru batat arɔng. A nɔ̂ng cáng dyuk behwóng mɛ e weneng, ko a to ra a nèy mɛ bewen o wenêng beha yi e cáng dyuk o. Yɛ á sè mwât nuyêl BeIsrayɛl neshey netaama.

¹⁰E bama mo Ibzan a ku, ko ba lɛrɛ hɛ e repomô Bet-Lɛhɛm.

¹¹Bamâ Ibzan, Ɛlɔn, WoZɛbulɔn, á sè mwât nuyêl Israyɛl neshey kuru.

¹²Ɛlɔn kwong a ku, ko ba lɛrɛ hɛ e Ayalɔn e vwêl Zɛbulun.

¹³Bamâ Ɛlɔn kwong, Abdɔn, Hilel WoPiratɔn a tɛ́ ɛ mwât nuyêl Israyɛl.

¹⁴Abdɔn a vɔk nèy bewen kuru banaas, na nèy nèy mɛ bewen o kuru batat. Yɛn a lagsa bemadung kuru bataama. Abdɔn á sè mwât nuyêl BeIsrayɛl neshey rwit.

¹⁵E bama mo a ku, ko ba lɛrɛ hɛ e Piratɔn e vwêl Ɛfrayim e rahwôl BeAmalɛk.