Read berom Besuga Israyɛl 13 Bible Online

Besuga Israyɛl 13 - berom bible

Besuga Israyɛl 13

¹BeIsrayɛl ba to ra a Dagwi Darwey banɛn, ko a nára hɛn e vwɔ̂ BeFilisti, ba re negwɔm e ra yɛn neshey kuru banaas.

²WoZora hwak á sè de ba yishi hɛ, à Manowa, á sè yi e yerê Dan, ko hwā mɛ á tɔs nèy wɛt, á sè sang-gwon.

³Ko tom-lagwî Dagwi Darwey a nusu a hwā mo, ko a yang ɛ, “Di, hwó tɔs nèy wɛt, hwà sé sang-gwon, ko di a remo, hwà rɔda sey jim, hwà rɔda tɔ̀ hwey wen.

⁴Ko di, hwà rɔda tē naka, hwo kwon sɔ nshî anap kɛ pyɛ̂ feng wɛt, hwo kwon re pyɛ nekyiri cak arɔng wɛt,

⁵yaga hwà rɔda sey jim, ko hwà rɔda tɔ hwey wen. Be kwon ra tot mɛ na bâ-hwon wɛt, yaga ba rɔda gyep ɛ jaram yaga fwôm Dagwi yi e ji jîm neng mɛ. A rɔda sey BeIsrayɛl yi e vwɔ̂ BeFilisti.”

⁶Hwā mó a wɔ̀ ha a rwas mɛ, a ye, “Mwât Dagwi hwak a ga vey na me, ma bɛrɛng hɛ, ko a sé sede tom-lagwi, bɛ́rɛng mɛ ha sé pyɛ bengyip. Ma ka rangal hɛ kwɔn de a yi ɛ wɛt, yɛ arɔng a ka ha a me reza mɛ wɛt.

⁷Ko a yang me, di hwà rɔda sey jim, na hwo tɔ̀ hwey wen. Hwo kwon sɔ nshî anap kɛ pyɛ feng cak wɛt, hwo kwon re pyɛ nekyiri cak arɔng wɛt, yaga ba rɔda gyep hwey o jaram yaga fwôm Dagwi yi e tûk tɔ́ mɛ vɔk e tûk reku mɛ arɔng.”

⁸Ko Manowa a ra won na Dagwi Darwey a ye, “À Darwey, gabɔk wɛt, tomo mwât Dagwi wane, na a to vey ha a wot begwong de wot a rɔda rá, na wot ras mɛ̀ hwey de ba rɔda tɔ mo.”

⁹Dagwi kwong a sey won de Manowa a ra, ko a to tomo tom mɛ, womo de a to wɔ́ na hwâ Manowa jeng de a sé e cwɛl. Rwas mɛ kwong á sè tanga yɛ e kwɔn o wɛt.

¹⁰Hwā mo a hwo nára hɛ na setele wɔ̀ yila rwas mɛ, a yang ɛ, “Di, mwat womo de á vey na me tuk hane á womo a ga to vey yunung.”

¹¹Manowa a hwo sogo, a dopɛ e hwā mɛ, a pom, a sɛ̀ mwat o, ko a rangal hɛ, a ye, “E hwo wɛ de hwá ha na hwā womo tuk hane a?” Ko mwat o a yang ɛ, “Ey, e me.”

¹²Manowa a rangal hɛ, a ye, “Jeng de há mō ha ba sila hɛ, ko é yere hihɛ̌ sangal de hwey o ha rɔda ba sangal ɛ̀, ko e fwôm sɛ́ de ha rɔda ba ra arɔng ɛ?”

¹³Tom-lagwî Dagwi Darwey o a yang Manowa, “Tik na hwā mō a ra kayɛ pyɛ de ma ga ha a yɛ.

¹⁴A kwon re pyɛ cak de ba yong na nèy anap, kɛ a sɔ́ nshî anap, kɛ a sɔ pyɛ feng cak wɛt. A kwon re pyɛ cak de ya sé kyìri arɔng wɛt.”

¹⁵Manowa a yang tom Dagwi o, “Ka sangal tyɔng, na hwo gyeng, na wot yɛrɛ kevyel na wot yong a hwo mɛ̀ pyɛ̂ re.”

¹⁶Tom Dagwi o a toyo a yɛ, a ye, “Ka sede hwà ye me gyeng, na hwo yong a me pyɛ̂ re, ko ma rɔda re pyɛ wɛt. Ko ka sede hwà yong yɛ, ko tik na hwo nára yɛ sede pyɛ̂ rangas yas vɔk na Dagwi e negya.” — Manowa a kana tɔk, a sé e Tom Dagwi Darwey wɛt,

¹⁷Manowa a rangal hɛ, “Reza mō, à wa, yaga jeng de ha mō ha sila, ko wot bin nɔng o nerey.”

¹⁸Tom Dagwi o a yang ɛ, “Yaga sɛ́ de hwà sé rangal reza hom ɛ? Ra sé pyɛ langat.”

¹⁹Manowa kwong a yong kevyel shi, a wuna na nɔrɔ̂ nemuk alkama, a nára yɛ̄ e ra gwofwa vɔk na Dagwi Darwey, ko pyɛ langat cak ya té jeng de Manowa tanga hwā mɛ ba sé bɛrɛng:

²⁰Jeng de balêm kya ba sé re vɔk e larwak, ko tom-lagwi o a vɛ̌ tút e ji kya mo vɔk e lagwi. Manowa na hwā mɛ yɛn a sé bɛrɛng, yɛn a hwo gaba gup na bayis mɛn e vwel.

²¹Jeng á yane de Manowa a de tɔk, a sé e tom-lagwi Dagwi Darwey, ko tom o a to dura tó mɛ na Manowa tanga hwā mɛ wɛt.

²²Manowa a yang hwā mɛ, “Wot a rɔda kushu gbing-gbing, yaga wot a ga di Dagwi.”

²³Ko hwā mɛ a yang ɛ, “Ka sede Dagwi e simo, na a mɔbɔs hot, ka a yâng sey nɔrɔ̂ pyɛ̂ rangas na nɔrɔ̂ nemuk de wot a nɔng ɛ wɛt. Ko a yâng to dura a wot pyɛ́ yemo mwa, na a to ha a wot pyɛ́ yemo a remo wɛt.”

²⁴Ano kwong hwā mo a tɔ̀ hwey wen o, ko ba vo a hɛ rezâ Samsɔn. Hwey o ha ras, ko Dagwi Darwey a tɛ̀ nerat e ra hɛ.

²⁵Gabik Dagwi Darwey ha pere nɔng ɛ gap jeng de yɛ a sangal e Mahane-Dan e tê Zora na Ɛstawɔl.