Read berom Besuga Israyɛl 14 Bible Online

Besuga Israyɛl 14 - berom bible

Besuga Israyɛl 14

¹Tuhak Samsɔn a gyirik vɔk e Timna, e hwomo a di hwông BeFilisti hwak.

²E bama de a toyo vey e lɔ, ko a hwo há a da mɛ tanga dē mɛ, a ye, “Káa, ma di hwông BeFilisti hwak e Timna. Rá in a me weneng mɛ.”

³Ko da mɛ na dē mɛ ba yang ɛ, “Vit a hwong de hwà di e ji yere mot na cang mot de hwô tɔk ra weneng o, sɛ̌ hwà wɔ vo hwong yi e ji yere dyuk de be kyese a yɛn e cwɛl wɛt arɛt?” Samsɔn a toyo a yɛn, a yang ɛn, “Ma dal na simô wane, yaga a jam a me e yey hom, ra in a me weneng mɛ.”

⁴Beda mɛ na dē mɛ ba ka tɔk, pyɛ mo ya yi na Dagwi Darwey wɛt, yaga Dagwi a sé jāma gwong de ê teshe na BeFilisti. Yaga e jeng yane BeFilisti bá sè re negwɔm e ra BeIsrayɛl.

⁵Ano kwong Samsɔn na da mɛ tanga dē mɛ ba hwo sogo, ba gyirik vɔk e Timna. Yɛn a kwey e gwông câp anap BeFilisti, ko bwôt gukum hwak wa di ɛ, ko wa lumla e ra yɛ.

⁶Gabik Dagwi Darwey ha hwo e ra yɛ, ko a kaba gukum o na vɔ mɛ, a vɛ̌ hama wɛ sede kekwey vyel shi. Ko Samsɔn a ha a da mɛ na dē mɛ pyɛ de a ga ra wɛt.

⁷Bama mo a gyirik, a wɔ̀ ha na hwong o, ko a jam a yɛ e yey mɛ.

⁸Bamâ jeng tyɔng Samsɔn a toyo wɔ̀ ra wenêng hwong o, ko a pere ye rɛng, na a di revîn gukum de a kana mɔrɔ, ko a langat hɛ de a pom, a sɛ̀ shok ya ga tula hɛn ɛ̀, ko ya ga tɛ̀ nshi.

⁹A ye ngyuk, ko a paa bèhamal shok o e vwɔ mɛ. A kyě re wɔ̀ sɛ̀ mɛ̀ da mɛ tanga dē mɛ, a nɔt ɛn, yɛn arɔng yɛn a re, ko a ka há a yɛn, a paa yɛ yi e revîn gukum wɛt.

¹⁰Dâ Samsɔn a wɔ́ e lɔ tya mɛ, na a wɔ̀ di hwong o. Samsɔn kwong a yong pyɛ̂ nzem e hwomo, yaga negwɔn mɛn na sé ano yɛn bebot bemat.

¹¹Jeng de BeFilisti ba di ɛ, ba tomo bewen kuru batat, na be sangal tanga yɛ be tɛ́ ɛn besa mɛ.

¹²Ko Samsɔn a yâng besa mɛ mo, “Ma rɔda ha a yin gwɔrɔ-há hak, ko ka sede yin a tɔk toyo a me na cap-ha mo e ji nepɔlɔ netaama ne nzem nemo, ko ma rɔda nɔng in berugu berat, bepɛng o kuru batat tanga behak kuru batat de ba tɔrɔ vɛ.

¹³Ko ka sede yin a tɔk ha a me cap-ha mo wɛt, ko e yin de yin a rɔda nɔng me berugu berat bepɛng o kuru batat tanga behak kuru batat de ba tɔrɔ vɛ.” Yɛn a yang ɛ, “Hā gwɔrɔ-há mō, na wot wok.”

¹⁴Ko a yang ɛn, “Yi e ji wo serwéy pyɛ̂ re ya nusu, yi e ji wo gap pyɛ̂ neta ya nusu.” Yɛn a tɛ̀ nepɔlɔ netat, vit a mwat de a tɔk nɔng cap-ha mo wɛt.

¹⁵E tuk he naas, yɛn a yang hwâ Samsɔn, “Ra a rwas mō netsitsɛng, na a ha a wot cap-ha mɛ mo. Ka sede ano wɛt, ko wot a rɔda rangas hwo na kya mwa na lɔ da mō. Yin a rini hot, na yin vey sey ɛ pyɛ́ mot, na wot tɛ́ ot bepɛng arɛt?”

¹⁶Ko hwâ Samsɔn a hwo tosho e nuyel mɛ, a yang ɛ, “Ko sɛ̌ hwó kyɛ́ o me, ko hwó kwɛlɛng me wɔgɔ, hwó simo me a? Hwà ra e rɛ̌, ko hwo ha a bemat hom gwɔrɔ-há, ko hwo ka ha a me cap-ha mo wɛt ɛ?” Ko Samsɔn a yang ɛ, “Ma ka ha a da hom na dē hom wɛt, ko me pere wɔ ha a hwo a?”

¹⁷Hwā mo a sangal e de tosho e negasi netaama nane. E tuk he taama e yɛnɛ mo, Samsɔn a hwo ha a yɛ cap-hâ gwɔrɔ-há mo, yaga a ga dopse bɔrɔk hɛ kahɛ tuk na sesin.

¹⁸E tuk hê taama, gyam na gwi gwo wɔ̀ yel ɛ̀, bemât repomo mo ba hwo yang ɛ, “E sɛ́ de ya dal shok na neta ɛ? E sɛ́ de ya dal gukum na gap ɛ?” Ko Samsɔn a yang ɛn, “Ka yin a yâng ra fwom na keshěp pyɛ hom wɛt, ka yin a yâng tɔk cap-hâ gwɔrɔ-há hom o wɛt.”

¹⁹Ko Gabik Dagwi Darwey a hwo e ra yɛ na reto, ko a sogo, a gyirik vɔk e Ashkɛlɔn, a wɔ̀ mɔbɔs bemat kuru batat, a paa berugu mɛn de ba tɔrɔ vɛ, a wɔ̀ nɔ̂ng bemat de ba há a yɛ cap gwɔrɔ̂-ha mo. A vɛ̌ vo shom, a kyè wɔ e lɔ da mɛ.

²⁰Ba jut hwā mɛ, ba nɔ̂ng mwat de á sè a Samsɔn gbɔng rwâs gwel e jeng weneng o.