Read berom Besuga Israyɛl 15 Bible Online

Besuga Israyɛl 15 - berom bible

Besuga Israyɛl 15

¹Bamâ jeng tyɔng, ko Samsɔn a hwo sogo wɔ e lɔ tya mɛ, a vɔk á hwā mɛ mo kevyel shi. Jeng yane ya sé jeng bwal alkama. Ko a yang tya mɛ, “Me simo, na me wɔ̀ sɛ̀ hwâ lɔ hom e duk mɛ.” Ko tya mo a rō ɛ mɛ.

²A yang Samsɔn, “Ma bare, hwà ga kyɛ́ o hɛ, yaga ano ma jut ɛ, ma nɔ̂ng sa mō. Ko di, gwa mɛ swɛl o a dal ɛ na nerat; ma rɔda nɔng o hɛ e weneng e to mɛ.”

³Samsɔn a yang ɛn, “A remo kayɛ pyɛ de mê ra a BeFilisti, be kwon di renɛn hom wɛt! Tik na yin di!”

⁴A sogo, a kyè wɔ e hey, a wɔ̀ vos nevu hey naga betat, a manas rùm nɛ bineba, a dopos ɛ̀ bemôl kya.

⁵Ko a tɛ̀ kya e bemol o, a hala nevu hey o e hirî alkama BeFilisti. Kya mo ha re alkama e hiri, na womo de ba ga kana tula; kya mo ha re mwa na hirî cɔ́gɔt pwat na ve anap.

⁶Sede BeFilisti ba di ano, ko yɛn a rangal, “E wa de a ra pyɛ́ yemo ngan arɛt?” Ko ba yang ɛn, “A sé Samsɔn à wɛ, yɛ sɔ̂ mwât Timna, de a jut hwâ Samsɔn o, a nɔ̂ng sa mɛ e weneng.” Ano kwong, BeFilisti ba wɔ̀ rangas hwā mo na kya, mwa na lɔ da mɛ, ba vɔk be wey na yɛn.

⁷Samsɔn a yang ɛn, “Ano de yin a ra kwong a? Ma sira me, ma rɔda tik nà tala pyɔ̌n o wɛt gyam na me de kyè!”

⁸A sogo, a wɔ hwo ɛn, a mɔbɔs bemat pyak e ji mɛn. Bama mo a sogo, a kyè wɔ̀ sangal e fwarâ gwofwa Etam.

⁹A vane ano, BeFilisti ba tút, ba wɔ̀ tɛ̀ durâ como e neyɛnɛ̂ vwêl Yuda, ko ba wɛrɛn e de jugu e Lehi.

¹⁰BeYuda ba rangal hɛn, “Yaga sɛ́ de yin a ba hwo ot na como ano ɛ?” Yɛn a ye, “Wot a ba vo Samsɔn, na wot tɛ̀ ɛ e ngyang, na wot teshe na yɛ arɔng, sede remo de a teshe na wot.”

¹¹BeYuda gu batat ba sogo, ba wɔ́ e kwɔn de Samsɔn a sé ɛ e fwarâ gwofwa Etam o, yɛn a yang ɛ, “Hwà tɔk, BeFilisti ba sé re negwɔm e ra wot wɛt a? Yaga sɛ́ de hwà ra a wot ano ɛ?” Ko a toyo a yɛn, “Ma ra a yɛn tyɛng na pyɛ de yɛn a ra a me arɔng.”

¹²Yɛn a yang ɛ, “Wot a vey, na wot ba rɔgɔs hwō, na wot wɔ̀ nɔng ɛn.” Ko Samsɔn a yang ɛn, “Há in a me mwin, yin a rɔda mɔrɔ me na vɔ min wɛt.”

¹³Yɛn a yang ɛ, “Kée wey, wot a rɔda mɔrɔ hwo wɛt, wot a rɔda rɔgɔs hwō zɔng, na wot wɔ̀ nɔng ɛn hwo.” Yaga ano, yɛn a rɔgɔs hɛ na rǐk pas ba, yɛn a nusu na yɛ yi e fwara mo.

¹⁴Jeng de ba kyè na yɛ, ba wul Lehi, ko BeFilisti ba di ɛ, yɛn a ta gwolwɛlɛ́ vey sɛ̀ ɛ mɛ̀. Ko Gabik Dagwi Darwey ha hwo e ra yɛ na reto, ko a vɛ̌ tuyu rǐk vane tsǔt, sede ba tùt shwey na kya, ko bà hala vɔ mɛ washak.

¹⁵A di gwokup gbigîn madung gwopwas o, a jut gwɛ ko a pere mɔbɔs mɛ̀ bemat gu rining na gwɛ.

¹⁶Ko Samsɔn a ra lwɛlɛ, a ye, “Ná gwokup gbigîn madung, ma mɔbɔs bemat gu, na gwokup gbigîn madung ma tɛ̀ vɛ̄ bagwɔt o bagwɔt o.”

¹⁷Bama de a yɛnɛ, a vɛ̌ bomo gwokup o. Ba pere vo a kwɔn hane mo rezâ Ramat Lehi wɔgɔ, Rahwol gwokup gbigîn madung.

¹⁸Yey ya hwo hwɔshɔ hɛ ding-ding, ko a yishi Dagwi Darwey, a ye, “E hwo wɛ de hwà nɔng me, sam mō, gbɔng wɛng hemo, ko sɛ̌ hwô tík me, na me ku na yêy hwɔshɔ, na me gaba e vwɔ̂ BeFilisti, bemât sekwit arɛt?”

¹⁹Dagwi a wunta kwɔ̂n sorok hak e Lehi, ko lwel nshi gwa nusu yi e ji mo, Samsɔn a sɔ, yey mɛ ya ye tyaang, ko nehywɛ mɛ na toyo hɛn arɔng. Yaga ano, ba vo a kwɔn hane mo rezâ Lwel wo Yishi. Kwɔ̂n sorok hane mo ha sé e Lehi vey e yunung.

²⁰Samsɔn á sè mwât nuyêl BeIsrayɛl neshey kuru baba, jeng de BeFilisti bá sè re negwɔm vwel o.