Read berom Besuga Israyɛl 16 Bible Online

Besuga Israyɛl 16 - berom bible

Besuga Israyɛl 16

¹Tuhak Samsɔn a wɔ́ e repomô Gaza, e hwomo a man na devwes hwak, ko a wɔ̀ dyɛng na yɛ̀.

²Ba ha a bemât Gaza, Samsɔn a sé e ngamo. Ko yɛn a wɔ̀ rɔnɔ kwɔn o, yɛn a sǎ e waba bagat na rwi repomo mwa naturuk, yɛn a sǎ yuu, yɛn a ye, “Tík ɛ, sɛ̌ gasi ha ye gbey, na wot de mɔrɔ hɛ e zang-gwi.”

³Samsɔn kwong a dyɛng pyɛ mɛ vɔk e tê turuk. Ko a sogo, a hwo pom e rwi repomo mo, ko a sɛ̀ gwɛ e banga; a vɛ̌ bugut rwi mo, a lut gwɛ mwa na cɔgɔ̂t gacik tanga dyam bang o, ko a jut mwa e ra sanat mɛ, a kyè mɛ̀ vɔk e ra tɛ̂t rahwol de wo bɛrɛng Hɛbrɔn.

⁴Bamâ hane, Samsɔn a to sɛ̀ hwā hwak, reza mɛ à Delila, a tɛ̀ yey na yɛ. Hwā mo á sè na sangal e Vwak Sɔrɛk.

⁵Ko begwɔ̀m BeFilisti betungun ba wɔ́ na hwā mo, ba yang ɛ, “Ra a yɛ netsitsɛng, na hwo rangal hɛ, na hwo tɔk kwɔn de gbɔng gap mɛ hane ha yi ɛ̀, na wot sɛ̀ gwong de wot a rɔda dal gap mɛ, na wot rɔgɔs hɛ. Kawɛ e ji mot a rɔda nɔng o dyam pyɛng gu rining na naga gwining (1,100).”

⁶Ko Delila a yâng Samsɔn, “Gbɔng gap mō hemo ha yi e gwa arɛt? Ha a me, e gwɛ̌ gwong de ba rɔda dal gap mō, na be rɔgɔs hwo arɛt? Gabɔk wɛt, ha a me.”

⁷Ko Samsɔn a yang ɛ, “Ka sede ba rɔgɔs me na rǐk gbàng pas o taama lǎ mo, ko ma rɔda tɛ́ me gbɛrɛk tyɛng sede bwâng bemat.”

⁸Ano kwong begwɔ̀m BeFilisti ba vey a Delila na rik pas o taama lǎ mo, ko Delila a rɔgɔs mɛ̀ Samsɔn na vɛ.

⁹A kana tik BeFilisti e duk hwak e lɛrɛ, ko a vey, a yila hɛ, “À Samsɔn! Yēe, BeFilisti à vemo e ra to mō yēe-èy!” Ko Samsɔn a vɛ̌ tuyu rik vane càatat, sede ba tuyu shwey na kya. Yaga ano, vit a mwat de a tɔk kwɔ̂n gbɔng gap mɛ mo.

¹⁰Delila kwong a yâng Samsɔn, “Di, hwà ga kwɛlɛng me, hwà to shɛgɛsh me. Gabɔk wɛt, ha a me gwong de ba rɔda rɔgɔs hwo kwong.”

¹¹Ko Samsɔn a toyo a yɛ, a yang ɛ, “Ka sede ba rɔgɔs me na rǐk pas de ba ga sang rá mɛ̀ pyɛ cak na vɛ wɛt, ko ma rɔda tɛ́ me gbɛrɛk tyɛng sede bwâng bemat.”

¹²Delila kwong a jut rik pas o, a rɔgɔs mɛ̀ Samsɔn. Bemat o ba sè e lɛrɛ e duk hwak, ko a yila hɛ, “À Samsɔn! Yēe BeFilisti a vemo e ra to mō yēe-èy!” Ko Samsɔn a vɛ̌ tuyu rik o tsǔt sede shwey zɔng.

¹³Delila a yang Samsɔn, “Hwà sé re nuyel na kwɛlsɛng me zɔng, hwó sǎ e de shɛgɛsh me. Ha a me gwong de ba rɔda rɔgɔs hwo kwong.” Ko Samsɔn a yang ɛ, “Ka sede hwà vo badúk tot hom vemo bataama, na hwo ták vɛ e cɔgɔ̂t lɔ̂k toro, na hwo kagam na kwagam e vwâ dùk, ko ma rɔda tɛ́ me gbɛrɛk tyɛng sede bwang bemat.”

¹⁴Delila kwong a mɛlɛm Samsɔn, na a wɔ̂ nevwa, yɛ̀ kwong a wɔ́ nevwa. A hwo vo badúk tot mɛ vane bataama, a tak vɛ na cɔgɔ̂t lɔ̂k toro, ko a kagam vɛ na kwagam. Ko a yila hɛ, “À Samsɔn! Yēe BeFilisti a vemo e ra to mō yēe-èy!” Ko a vɛ̌ sene yi e nevwa mo, a vɛ̌ lut cɔ́gɔt yane mo mwa na tot mɛ.

¹⁵Ko Delila a yang ɛ, “E rɛ̌ de hwà ye, hwà tɛ̀ yey na me, ko hwà tɛ̀ me e yey mō wɛt ɛ? Hê tat a hemo de hwà sé shɛgɛsh me, ko hwà kyɛ́ o nà ha a me kwɔn de gbɔng gap mō mo ha yi ɛ.”

¹⁶A dopse bɔrɔk hɛ na há kahɛ tuk, vit a pɔngɔ, ko yey Samsɔn ya vɛ̌ lashe hɛ, ko a di, nduga a ku ow.

¹⁷Ko a hwo ha a yɛ neyɛnɛ tsak o, a yang ɛ, “Yimo de ba tɔ me ba ga sang ra setot hom na bâ-hwon wɛt, yaga ba gyep me jaram yaga fwôm Dagwi. Ka sede ba hwon a me rato, ko gap hom ha rɔda gas ɛ na me, ko ma rɔda tɛ́ me gbɛrɛk tyɛng sede bwang bemat.”

¹⁸Jeng de Delila a tɔk, a ga ha a yɛ neyɛnɛ tsak o, ko a hwo tomo vɔk na begwɔ̀m BeFilisti, a yang ɛn, “Vey in a remo hining hemo zɔng, yaga ma di a ga ha a me tsak o.” Yɛn a hwo vey, yɛn a vɔk ɛ̀ dyam pyɛng o.

¹⁹Delila a mɛlɛm Samsɔn, na a wɔ́ nevwa e ra bol mɛ. Jeng de nevwa mo na jut ɛ, ko Delila a tomo be yila mwat, a tɛ̀ ɛ a hwon a Samsɔn badúk tot mɛ vane bataama. Ano kwong, hê mɛsɛng a hemo de a sɛ̀ reto e ra yɛ, yaga gap mɛ ha ga gas ɛ na yɛ̀.

²⁰Ko a yila hɛ, “À Samsɔn! Yēe BeFilisti à vemo e ra to mō yēe-èy!” Jeng de a sene, a ye, e sogo, na a dukta rebek mɛ, na a bin kyè sede jojot, ko a tɔk wɛt, Dagwi Darwey a ga gas ɛ na yɛ.

²¹BeFilisti ba vo ɛ, ko ba paa yéneng bayis mɛ. Ba rɔgɔs hɛ na ngyâng dyam shi, ba kyè na yɛ vɔk e Gaza, ba wɔ̀ tik ɛ a hwongo e duk ngyang.

²²Ko setôt rato mɛ sa to hwo ras bama mo de ba ga kana hwon sɛ.

²³A vane ano, begwɔ̀m BeFilisti ba tula hɛn, na be nára gbɔng nɔrɔ̂ yas de be yɛt vɔk na dagwi mɛn Dagɔn, na yɛn a bin ra nzem. Yɛn a ra lwɛlɛ, ba ye, “Dagwi mot a ga nɔng ɛ e vwɔ mot Samsɔn, mwat repugu mot!”

²⁴Jeng de yɛn a wok neta, ko ba ye, “Be vey a wot na Samsɔn! Tik na a vey ra a wot jɔgɔ!” Ba wɔ̀ pat Samsɔn yi e duk ngyang, ko a ra jɔgɔ e nuyel mɛn. E bama mo ba tɛ̀ ɛ, a tumal e tê bèsesek beba ve gyerêp gwoduk, ko bemat mwa ba di ɛ. Yɛn a hwo somo dagwi mɛn na lwɛlɛ, ba ye, “Dagwi mot a ga nɔng ɛ e vwɔ mot; mwât repugu mot de a ga lashe vwel mot, womo de a mɔbɔs pyak e ji mot.”

²⁶Samsɔn kwong a yang wen de e vɔk a yɛ vwɔ, “Hala me, me simo me ra besesêk gyerêp gwoduk o, yaga na me ye ɛ̀ yɛndɛng.”

²⁷Gwoduk o gwa sila na bemat, beras na beha. Begwɔ̀m BeFilisti vane betungun bá sè e hwomo arɔng, ko bemat sede gu batat, beras na beha, ba sangal e ragyip duk o, na be bɛrɛng jɔgɔ de Samsɔn á sè ra a yɛn.

²⁸Ko Samsɔn a ra won na Dagwi Darwey, a ye, “À Darwey Dagwi Darwey, gabɔk wɛt, bare na me, na hwo to nɔng me gap hom zang hining hemo zɔng, yaga na me bin tala mɛ̀ pyɔ̌n yéneng bayis hom de BeFilisti ba paa yɛ̄.”

²⁹Ko a kaba besesek beba ve gyerêp tê gwoduk o, a kaba gwining na vwɔ yege mɛ ko gwining na vwɔ mwɛlɛng mɛ, ko a ye yɛndɛng à rebek mɛ e ra vɛ.

³⁰A pɛl sekun, a ye, “Tik na me wey tanga BeFilisti!” A vɛ̌ ye ngyuk, ko a ye gbìk mwa na yɛnɛ̂ gap mɛ a gbugra gwoduk o. Gwoduk o gwa vɛ̌ gwo gaba e ra begwɔ̀m BeFilisti na bwang bemat, gwa bugut hɛn mwa. Bemat de Samsɔn a wey na vɛ e jeng reku me ba dal vane de a mɔbɔs jeng de á sè kwen na nepyak.

³¹Ko begwa mɛ tanga bemât lɔ mɛ ba vey, ko ba jut revin mɛ. Ba wɔ̀ lɛrɛ rɛ e tê Zora na Ɛstawɔl, e sak da mɛ Manowa. Samsɔn a ga kana sè mwât nuyel BeIsrayɛl neshey kuru baba.