Read berom Besuga Israyɛl 17 Bible Online

Besuga Israyɛl 17 - berom bible

Besuga Israyɛl 17

¹Mwat hwak de á sè na sangal e vwêl bahwôl Ɛfrayim, reza me à Mika.

²A yang neng mɛ, “Jeng de bá kana shigi dyam pyɛng mō yane gu rining na naga gwining (1,100), ko ma wok, hwá ye, gawey he hwo e ra gbik o. E me wɛ de ma jut dyām o, á yet ya sé na me.” Ko de mɛ a ye, “Dagwi a jut gawey yi e ra hwo ko a tɛ̀ a hwo nerat, à hwey hom.”

³Wen o a toyo a de mɛ na dyam pyɛng gu rining na naga gwining o, ko de mɛ mo a ye, “Ma sé tik dyām yemo mo jaram yaga Dagwi Darwey, na a tɛ̀ nerat e ra hwey hom. Tik na be tsep pyɛ sekwit, na be to yong cak na dyam pyɛng o mo arɔng. Yaga ano ma sé nɔng o yɛ̄.”

⁴Jeng de a toyo a neng mɛ na dyām o, neng mɛ mo kwong a pat ɛ cɛ̂k dyām o naga beba, a nɔ̂ng mwat de a sé zu yong pyɛ́ na dyam pyɛng, ko yɛ kwong a tsep pyɛ sekwit, ko a to yong cak na dyam pyɛng o, ko ba tik yɛ̄ e lɔ Mika.

⁵Mika mo kwong a lɔk duk sekwit mɛ, a yong pyɛ̂ sekwit cak, tanga pyɛ cak de be ra mɛ̀ fwom na be tɔk pyɛ de Dagwi e simo. A gyep hwey mɛ wen o hwak, a tɛ̀ ɛ, a sè piris mɛ.

⁶E jeng yane BeIsrayɛl ba vɔk gwɔ̀m wɛt. Yaga ano, kawɛ mwat a ra pyɛ de yey mɛ ya simo zɔng.

⁷Wen BeLevi hwak a sé de á sè sangal e Bet-Lɛhɛm wo BeYuda e jeng yane mo.

⁸A sogo, a hala Bet-Lɛhɛm o, a sé jāma kwɔn hak de a rɔda ka sangal ɛ̀. Jeng de a sé kyě kyè, ko a pom e lɔ Mika e vwêl bahwôl Ɛfrayim.

⁹Mika kwong a rangal hɛ, a ye, “Hwà yi e gwa ɛ?” Ko wen o a yang ɛ, “Ma sé WoLevi yi e Bet-Lɛhɛm wo BeYuda. Ma sé jāma kwɔn de ma rɔda ka sangal ɛ̀.”

¹⁰Ko Mika a yang ɛ, “Sangal e ngamo na me, na hwo tɛ́ o mwat vos a me badu, na hwo to tɛ́ o piris hom. Ma rɔda nɔngɔs hwo dyam pyɛng kuru kahɛ shey, ma rɔda to nɔngɔs hwo berugu na pyɛ̂ re arɔng.”

¹¹Wen BeLevi mo a simo sangal na yɛ Mika mo, ko Mika a jut ɛ a tɛ́ ɛ sede hwêy tɔ mɛ.

¹²A tɛ̀ ɛ, a sè piris mɛ, ko a sangal e ji lɔ mɛ.

¹³A ye, “A remo de ma ga sɛ̀ WoLevi, na a sè piris hom, ma tɔk Dagwi Darwey a rɔda tɛ̀ pyɛ́ ye se naka na me.”