Read berom Besuga Israyɛl 18 Bible Online

Besuga Israyɛl 18 - berom bible

Besuga Israyɛl 18

¹E jeng yane BeIsrayɛl vit a yɛn à gwɔ̀m. E jeng yane arɔng bemât yerê Dan bá sè jāma kwɔ̂n sangal hê tó mɛn, kwɔn de ha rɔda tɛ́ ɛ hê nedanelɔ mɛn, na yɛn a sangal ɛ̀. Yaga vey e jeng yane yɛn a ga sɛ̀ mɛn à kwɔn o e ji nekwɔn de ba gas a yɛn e ji yére Israyɛl wɛt.

²Ko yerê Dan ya kasa besuga beting o betungun yi e mwa cáng mɛn, yi e bapomô Zora na Ɛstawɔl. Yɛn a yang ɛn, be wɔ̀ gwɔrɔ sevwel o, na yɛn a bɛrɛng sɛ e lɛrɛ. Bemat o ba kyè vɔk e bak vwêl bahwôl Ɛfrayim, yɛn a wɔ̀ wul e lɔ Mika, yɛn a pɔl ɛ̀.

³Jeng de yɛn a sé sangal e lɔ mo, ko yɛn a wok fwɔ̂ wen BeLevi wane, yɛn a pere wɔ̀ tɔk lem mɛ, ko yɛn a ra a yɛ nerangsal, “Hwà yi e gwa e ngamo ɛ? Hwà sé ra sɛ́ e ngamo arɛt? Fwom mo à sé e ngamo arɛt?”

⁴Ko a toyo a yɛn, a ye, “Mika wɛ de a jut me, wot a yong ɛ̀ na yɛ, na me sè a yɛ piris, ko yɛ e talsa me.”

⁵Ko yɛn a yang ɛ, “Gabɔk, rangal a wot yi na Dagwi, na wot tɔk, kɛ wot a rɔda di wɛng e kwɛngɛl o arɛt?”

⁶Ko piris o a yang ɛn, “Kyè in tyang, Dagwi Darwey a sé tanga yin, wɛng e ra gwong min.”

⁷Ko bemat vane betungun ba sogo, ba kyè, yɛn a wɔ̀ wul repomô Layish. Ba sɛ̀ bemat vane ba sé sangal washak, tyɛng sede BeSidɔn. Yɛn a ra gashishim wɛt, yɛn a sangal e ji nehywɛ; vit a mwat de a bɔrɔk hɛn, ko yɛn a bidɛ pyɛ cak arɔng wɛt. Yɛn a sangal yikyik yi na BeSidɔn, ko yɛn a wuna hɛn e ji ra pyɛ cak na mwat hwak wɛt.

⁸Jeng de bemat vane betungun ba toyo vɔk na bemɛn e Zora na Ɛstawɔl, ko bemɛn o ba rangal hɛn rehâ kwɛngɛl mɛn o.

⁹Yɛn a toyo a yɛn, ba yang ɛn, “Sogo hin, na wot wɔ hwo e ra yɛn. Wot a ga di vwel o, ha sé rat sizɔng! Yin a sé sangal zɔng, yin e ra sɛ́ arɛt? Yin kwon lashe jeng wɛt. Sogo hin, na yin wɔ sey ɛ hɛ.

¹⁰Jeng de yin ê wɔ e hane, ko yin a rɔda di bemat o ba sé sangal washak zɔng, vwel o arɔng ha sé tes, ha vɔk kayɛ pyɛ, vit a pyɛ de mwat ê bidɛ e hwomo. Dagwi a ga nɔng in hɛ.”

¹¹Ko bemât como naga betyiimin yi e ji yerê Dan ba yong ɛn na pyɛ̂ como, ba nusu yi e Zora tanga Ɛstawɔl, yɛn a vo gwong wɔ.

¹²Yɛn a wɔ̀ tut, ba tɛ̀ dúra como e rwa ta na Kiriyat-Yɛyarim, e yɛnɛ̂ vwêl BeYuda. Yaga ano be rɔɔ yishi kwɔn o, à Mahane-Dan, wɔgɔ dúra comô Dan.

¹³Yi e hwomo, yɛn a kwey vɔk e vwêl bahwôl Ɛfrayim, yɛn a wɔ̀ wul lɔ Mika.

¹⁴Ko bemat vane betungun de bà kana wɔ̀ bɛrɛng yɛnɛ̂ Layish e lɛrɛ, yɛn a yang bemɛn, “Yin a tɔk, pyɛ sekwit de ba tsep, na yemo de ba yong na dyam pyɛng ya sé e ji nelɔ nemo a? Pyɛ̂ sekwit cak tanga pyɛ de be ra mɛ̀ fwom na be tɔk pyɛ de Dagwi e simo yā sé arɔng. Bare hin, e sɛ́ de wot ê ra ɛ?”

¹⁵Yɛn kwong yɛn a toyo vɔk e lɔ Mika vɔk e bak wen BeLevi wane, yɛn a wɔ̀ kyul ɛ.

¹⁶Ko bemât comô Dan vane naga betyiimin de ba ga yong ɛn na pyɛ̂ como yɛn a tumal e rwi lɔ mo.

¹⁷Bemat vane betungun o yɛn a yel, yɛn a wɔ̀ jut pyɛ sekwit yane de ba tsep, na yemo de ba yong na dyam pyɛng mwa na pyɛ̂ sekwit cak tanga pyɛ de be ra mɛ̀ fwom na be tɔk pyɛ de Dagwi e simo. Jeng de yɛn a sé ra ano, ko piris o a sé tumal e rwi lɔ mo tanga bemat vemo naga betyiimin.

¹⁸Jeng de bemat vane betungun ba yel e lɔ Mika, ba hashe pyɛ̂ sekwit yane mo tanga pyɛ de be ra mɛ̀ fwom na be tɔk pyɛ de Dagwi e simo. Ko piris wane a yang ɛn, “E sé à yane de yin a sé ra ɛ?”

¹⁹Yɛn a yang ɛ, “Sǎ yuu, man nu mō! Var a wot, raa hot, tik na hwo wɔ̀ tɛ́ o mwât vos a wot badu, na hwo tɛ́ o piris mot arɔng. A dal a hwo naka, na hwo tɛ́ o piris e ji yerê BeIsrayɛl de hwô sè piris e lɔ mwat gwining wɛt a?”

²⁰Jeng de piris o a wok ano, ko yey mɛ ya pɛngɛ. A jut pyɛ̂ sekwit yane mo, na pyɛ de be ra mɛ̀ fwom na be tɔk pyɛ de Dagwi e simo, ko a kyè tanga yɛn.

²¹Yɛn a toyo, yɛn a ta beha, na nèy, na yas mɛn e yel tanga pyɛ́ de yɛn a vɔk mwa, ba vɛ̌ kyè.

²²Jeng de yɛn a ga kyè yikyik tyɔng, Mika a hwo yila bemât vwara mɛ, yɛn a raa BeDan o, ko ba wɔ̀ vo ɛn e gwong.

²³Yɛn a hwo mok e bama mɛn. BeDan o ba doyo, ba di ɛn, ko ba yang Mika, “E sɛ́ de ya té de hwà tula bemat vemo arɛt?”

²⁴Ko Mika a yang ɛn, “Yin a vey hashe bedagwi hom de ma yong, yin a wuna ɛ̀ piris hom, yin a ka tik a me pyɛ cak wɛt, ko yin a yang me, e sɛ́ de ya té arɛt a?”

²⁵BeDan ba toyo a yɛ, “Man nu mō yuu! Ka sede hwà to hanat, ko sede shôm bemat vemo ya sogo, ko hwo tanga bemât lɔ mō yin a rɔda bidɛ neken min.”

²⁶Ko yɛn a re nuyel na kwɛngɛl mɛn. Jeng de Mika a di bemat o ba dal ɛ na gap, a vɔk a toyo wɛrɛ e lɔ mɛ.

²⁷E bama de BeDan ba ga hashe pyɛ́ de Mika a yong, tanga piris mɛ, yɛn a wɔ̀ hwo e repomô Layish, e hwomo de bemat ba sé sangal e ji nehywɛ, ko be ra gashishim wɛt. Yɛn a vɛ̌ wey na yɛn, ko ba tɛ̀ kya e repomo mo.

²⁸Vit a mwat de a tɔk sey bemât Layish o, yaga yɛn a sé sangal yikyik yi e Sidɔn, ko yɛn a kana wuna hɛn e ji râ pyɛ cak na mwat hwak wɛt. Repomo mɛn o ra sé e ji nɛk vɔk e Bet-Rehop. BeDan ba to lɔk repomo mo, ba sangal e hɛ.

²⁹Yɛn a vo a repomo mo rezâ Dan e ra rezâ dâ beda mɛn Dan, hwêy Yakɔp mwa ano de ba kana yishi reza repomo mo, à Layish.

³⁰Yɛn ba tɛ̀ pyɛ sekwit de ba tsep o, yaga na yɛn a bin re a yɛ fongol. Yɔnatan Gɛrshɔn Mose wɛ de a se piris wo yerê Dan, nèy mɛ na re nuyel na fwom o vɔk e tuk de ba hashe BeIsrayɛl vɔk e sesam.

³¹Ano kwong, BeDan ba re a pyɛ sekwît Mika yane fongol, mwa jeng de Bûk Sangâl Dagwi gwa se e Shilo.