Read berom Besuga Israyɛl 19 Bible Online

Besuga Israyɛl 19 - berom bible

Besuga Israyɛl 19

¹E jeng yane BeIsrayɛl vit a yɛn à gwɔ̀m, ko mwât Levi hwak de a sé na sangal e rwa vwêl bahwôl Ɛfrayim a jut hwong hwak yi e Bet-Lɛhɛm e vwêl Yuda, na a tɛ́ ɛ jɛn-hwā mɛ.

²Tuhak hwā mo a wok shôm rwas o, ko a tele vɔk e lɔ da mɛ e Bet-Lɛhɛm wo BeYuda, a sangal e hwomo sede pɛl naas.

³Ko sa mo a sogo wɔ̀ tɛ̀ gabɔk na hwā mɛ mo a toyo na yɛ. A vɔk ɛ̀ sam mɛ hwak na bemadung beba. Jeng de a wɔ̀ wul lɔ tya mɛ mo, hwā mo a yel na yɛ̀ e ji lɔ da mɛ, ko tya mɛ a sey ɛ na yey pyɛng.

⁴Tyà mɛ a shonong e ra yɛ na a ka sangal ɛ, ko a simo, a sangal e hwomo pɔlɔ tat, yɛn a sé re, ba sé sɔ, ko ba pɔlɔs ɛ̀.

⁵Tuk hê naas yɛn a hwo sene bop gasi, ba yong ɛn na be vo gwong. Ko dâ hwā mo a yang sɔ mɛ, “Kā tɛ̀ wɛng e ngyen, na hwo sɛ̀ mɛ̀ gap, na hwo de kyè hywɛ.”

⁶Yɛn à vane beba ba to sé re, ba sé sɔ, ko dâ hwā mo a to yang ɛ, “To pɔl ɛ yunung, na hwo wok neta.”

⁷Jeng de sa mo a sogo, na a kyè, ko dâ hwā mo a to shonong e ra yɛ, sa mo kwong a to simo a pɔl ɛ̀.

⁸E tuk hê tungun sa mo a sogo bop gasi na a kyè, ko dâ hwā mo a to yang ɛ, “Sangal e ngyen, na hwo tɛ̀ wɛng, na hwo gyɛng sɛ̌ gwi gwa ye sɛndɛng e ngyen.” Sa mo kwong a to sangal. Yɛn à vane ba to gwɛ̌ re, ba sɔ e dem o.

⁹Jeng de sa mo, na jɛn mɛ, tanga sam mɛ ba sogo, na be hwo kyè, ko dâ hwā mo a to yang ɛ, “Di, gwi gwa ga wɔ, nahywelek na ga vey, pɔl in zɔng! Di, jey ya wɔ̂ wɔ̀ ye mwangalang, pɔl na hwo gwɛ̌ wok neta sɛ̌ nagasi hwol bop, na yin de ba kyè vɔk e lɔ.”

¹⁰Ko sa mo a to simo na a pɔl ɛ wɛt. A sogo, yɛ na jɛn mɛ mo, tanga sam mɛ, na bemadung vane beba de ba tɛ̀ a vɛ pyɛ́ e ra ma, ba vo gwong. Yɛn a vey bagat na repomô Yebus de be tang rɛ, à Yɛrusalɛm.

¹¹Sede remo de gwi gwa ga wɔ́ wɔ̀ gaba, ko yɛn a sé bagat na Yebus o, sam mɛ a yang ɛ, “Ê sè naka, na wot ye rɛng, wot pɔl e repomô BeYebus remo.”

¹²Ko dalɔ mɛ a yang ɛ, “Wey, wot ê pɔl e repomô bemat bedūk wɛt, yɛn a sé e ji yerê BeIsrayɛl wɛt. Wot kyè, wot wɔ̀ pɔl e Gibeya e negya.”

¹³A to ye, “Wot gwɛ̌ kyè tyɔng wɔ bagat, na wot wɔ̀ pɔl e hak e ji bapomô Gibeya kɛ Rama ayi.”

¹⁴Yɛn a gwɛ̌ kyè kwɛngɛl mɛn o. Gwi gwa gaba jeng de yɛn a ga wɔ bagat na Gibeya e ji vwêl BeBɛnyamin.

¹⁵Yɛn a ye rɛng, na be pɔl e ji repomo mo. Yɛn a hwo sangal e majey-jɔgɔ hwak e tê repomo mo, ko vit a mwat hwak de a yila hɛn, na be wɔ̀ pɔl e lɔ mɛ.

¹⁶Jeng de yɛn á sè sangal ano, mwakuk hwak á sè toyo yi e hey e de fwom nawiri. Mwakuk o á sè na sangal e Gibeya mo, yɛ á sè mwat yi e vwêl bahwôl Ɛfrayim, ko bwang bemât repomo rane bá sè yi e yerê Bɛnyamin.

¹⁷Jeng de a di sa mo e sangal e kwɔn hane ano, ko a rangal hɛ, “Hwà yi e gwa ɛ? Hwó kyè vɔk e gwa arɔng ɛ?”

¹⁸Sa mo a yang ɛ, “Wot a yi e Bet-Lɛhɛm e ji vwêl BeYuda, wot a sé kyè vɔk e vwâ vwêl bahwôl Ɛfrayim. Kwɔn a hane de me sangal ɛ̀. Ma wɔ e Bet-Lɛhɛm, ko ma sé toyo me vɔk e lɔ. Vit a mwat de a yila mɛ wɔ e lɔ mɛ.

¹⁹Di, wot a vɔk ɛ pyɛ̂ re na sehwey sehwogot yaga bemadung mot, wot a vɔk kpam-tuk na nshî anap yaga jɛn hom tanga me na sam hom. Vit a pyɛ de wot e jāma.”

²⁰Ko mwakuk o a yang ɛ, “Vey in, wɔ̀ pɔl in e lɔ hom. Kayɛ pyɛ de yin e simo, yin a rɔda sɛ̀ yɛ! Yin kwon pɔl e ngamo e majey-jɔgɔ wɛt.”

²¹Ano kwong a jut ɛn vɔk e lɔ mɛ, a nɔng bemadung mɛ pyɛ̂ re. Ba nɔng ɛn nshi ba kus mɛ bol, e bama mo yɛn a re, ba sɔ.

²²Jeng de ba sé wok neta, ko berâs repomo mo, nèy gul ba yi, yɛn a vey gwɔrɔ lɔ mo, yɛn a sé dak rwi lɔ hane de yɛn a sé ɛ̀, yɛn a yang dalɔ mo, “Pat a wot mwat wane de a vey e ji lɔ mō, na wot dyɛng na yɛ!”

²³Ko mwakuk o a nusu wɔ na yɛn e majey, a yang ɛn, “Wey, à begwa hom! Gabɔk wɛt yin kwon ra yerê pyɛ́ vyes yemo ano wɛt! Mwat womo a sé kwɛnɛt hom, yaga a gyirik e ji lɔ hom. Yin kwon ra pyɛ̂ byɛm-byɛm yemo wɛt.

²⁴Di in, mê nɔ́ng in hwóng hom, a sé yorom-hwong, ko mê wuna a yin ɛ̀ jɛn-hwā mɛ; yin ê tɔk ra kayɛ pyɛ de yin e simo na yɛn. Ko yin kwon ra pyɛ̂ byɛm-byɛm yemo wɛt!”

²⁵Ko nèy gul o nà ka wet betong, na be wok ɛ wɛt, ko sa mo a vɛ̌ pat a yɛn jɛn-hwā mɛ mo vɔk e majey. Yɛn a dyɛngɛs na yɛ, ko ba teshe na yɛ e ji nabwalak nane. Ba lashe hwā mo sɛ̌ rwa hwol gasi, ko yɛn a de hàla hɛ.

²⁶Jeng de gasi ha ye gbey ko hwā mo a toyo a ba gaba e rwi lɔ mwakuk de dalɔ mɛ a pɔl ɛ̀, a se e hwomo vɔk e zang-gwi gasi.

²⁷Jeng de dalɔ mɛ mo a wunta rwi duk na a vo gwong ko a vɛ̌ di hwā mo e dyɛngɛ e rwi lɔ na vɔ mɛ e ra gwofwa rwi mo.

²⁸Ko sa mo a yang ɛ, “Sogo, na wot kyè!” Ko yuu-yuu! A vɔk a jut ɛ, a lasha hɛ e ra mâ madung mɛ, a vɔk a vo mɛ̀ gwong wɛrɛ.

²⁹Jeng de a wɔ̀ wul lɔ, a vɛ̌ jut ba, ko a yɛt mɛ̀ revîn jɛn-hwā mo bagap o bagap o kuru na vɛ beba, a tomo na bagap banama mo e kahɛ kwɔn e ji sevwêl Israyɛl.

³⁰Kawɛ mwat de a di, ko a ye, “Wot a ga sang wok ba ra pyɛ cak yerê yemo wɛt, pyɛ cak yerê yemo ya ga mak té wɛt, yimo de BeIsrayɛl bà nusu yi e Misra vey e yunung! Bare hin naka e ra pyɛ́ yemo; ra in badu na yin tik ɛ̀ pyɛ de yin ê ra!”