Read berom Besuga Israyɛl 2 Bible Online

Besuga Israyɛl 2 - berom bible

Besuga Israyɛl 2

¹Tom-lagwî Dagwi Darwey a hwo tut yi e Gilgal vɔk e Bokim, ko a yâng BeIsrayɛl, “Ma ga nusu na yin yi e Misra vey e ngamo e sevwel de mà kana sira a bedabeda min, ma rɔda nɔng ɛn sɛ. Ma ye, ‘Ma rɔda lashe wuna-na-sira hom de mà kana sira na yin ko tyɔng wɛt.

²Yin arɔng, yin kwon wuna hin na sira tanga bemat de ba sé na sangal e vwel hemo wɛt. Tik na yin gangas nekwɔn rangâs yas vɔk na bedagwi mɛn.’ Ko mwa ano yin a raa há hom wɛt. Yaga sɛ́ de yin a ra ano arɛt?

³Yaga ano, me arɔng ma rɔda ro a yin hɛn wɛt, ko yɛn a rɔda sè sede bagun vos in, ko bedagwi mɛn ba rɔda hwɔshɔ nehywɛ min, ko hemo ha rɔda wey na yin.”

⁴Jeng de BeIsrayɛl mwa ba wok ha hane de tom-lagwi o a ha, yɛn a hwo tosho ding-ding.

⁵Yaga ano, yɛn a vo a kwɔn o rezâ Bokim wɔgɔ, vemo de be tosho. Yɛn a nása nenɔrɔ̂ yas de be yɛt vɔk na Dagwi Darwey e kwɔn hane mo.

⁶Bama de Yɔshuwa a ga tɛ̀ BeIsrayɛl e gwong, kawɛ a kyè vɔk e bak sevwel o mwɛ, na a wɔ̀ re ɛ̀ nedanelɔ.

⁷Ko BeIsrayɛl bá sap Dagwi Darwey jeng de Yɔshuwa á sè rɔ̌ kwen tanga jeng de bemakuk de bá rɔ̌ beken e bamâ rekû Yɔshuwa, yɛn bemakuk vemo de ba bɛrɛng gbɔng tomong de Dagwi Darwey o á kana ra a BeIsrayɛl.

⁸Ko Yɔshuwa Nun, sam Dagwi Darwey a tɛ̀ neshey naga na kuru (110), ko a de ku.

⁹Ba lɛrɛ hɛ e vwêl nedanelɔ mɛ de ba nɔng ɛ e Timnat-Hɛrɛs, e vwêl bahwôl Ɛfrayim e rwa bato na rakû Gaash.

¹⁰Bwâng bemât jeng Yɔshuwa ba kushu arɔng, ko bemat behak ba raa vane, ba dun Dagwi Darwey na gbɔng tomong de a ga ra a BeIsrayɛl.

¹¹Ano kwong BeIsrayɛl ba ra pyɛ́ vyes e nuyêl Dagwi Darwey, yɛn a sap BeBaal.

¹²Yɛn a kyɛ́ ɛn nà re a Dagwî bedabeda mɛn fongol, Dagwi Darwey de a pat ɛn yi e ji Misra. Yɛn a hwo raa bedagwî bemat vane de ba gwɔrɔ hɛn ba re a vɛ fongol, ko yɛn a ló a Dagwi Darwey yey.

¹³Yɛn a kyɛ́ ɛn nà re a Dagwi Darwey fongol, ko yɛn a sap dagwî Baal na ve Ashtarɔt.

¹⁴Dagwi kwong a wok shom sizɔng na BeIsrayɛl, ko a nára hɛn e vwɔ̂ bemat de ba jugu hɛn. A tɛ̀ ɛn e vwɔ bemât repugu mɛn de ba gwɔrɔ hɛn, ba re gap mɛn, ba tak a yɛn reyɔm. Ko BeIsrayɛl o vit a hɛn nà gap de bê tɔk gyeng mɛ̀ bato mɛn yi na bemât repugu mɛn o.

¹⁵Kayɛ jeng de yɛn a nusu wɔ̂ como, ko yɛn a tɔk di wɛng wɛt, yaga Dagwi Darwey a vɔk repugu na yɛn sede remo de a kana sira a yɛn. Yaga ano yɛn a sè e ji reyɔm sizɔng.

¹⁶Ano kwong, Dagwi Darwey a nɔng ɛn bemât nuyel, na be sey ɛn yi e vwɔ bemat de ba jugu hɛn.

¹⁷Mwa ano yɛn a tɔk wet betong, na be wok hâ bemât nuyel mɛn o wɛt. Yɛn a to bana hɛn na Dagwi Darwey wɛt, ko yɛn a re a bedagwi behak fongol. Bedabeda mɛn bà kana gyeng badu Dagwi Darwey, ko e jeng tyɔng zamang hemo ha tik nà ra ano.

¹⁸Kayɛ jeng de Dagwi Darwey a nɔng ɛn mwât nuyel, ko Dagwi á sè tanga yɛ, na a sɛlɛ hɛ, ko a sey ɛn yi e vwɔ bemât repugu mɛn kayɛ jeng de mwât nuyel o a sé kwen. A ra ano yaga e wok nemwishish mɛn jeng de e wok rus mɛn e nɛ̂n vemo de ba ngyit ɛn, ko ba tak a yɛn reyɔm.

¹⁹Ko bama de mwât nuyel mɛn o a ga ku, ko bemat o ba to ɛn e ji negwɔn neves, de na dal ne bedabeda mɛn. Yɛn a raa bedagwi behak, ba sap vɛ, ko ba re a vɛ fongol arɔng; yɛn a kyɛ́ ɛn nà hàla negwɔn neves na negbarak mɛn o.

²⁰Yaga ano Dagwi a wok shom sizɔng na BeIsrayɛl, ko a ye, “Yerê bemat vemo ba lashe wuna-na-sira hom de mà kana sira a bedabeda mɛn, ko yɛn a kyɛ́ ɛn nà wet betong na ha hom.

²¹E ngamo nuyel, ma rɔda to me ro a yɛn yére cak wɛt yi e ji bwâng yére bemat de ya rɔngɔl e jeng de Yɔshuwa a ku, a hàla ɛ̀ yɛ̄.

²²Yi na yɛ̄ ma rɔda mara BeIsrayɛl, na me di kɛ gyeng yɛn ê tɔk raa gwong hom tyɛng sede remo de bedabeda mɛn bà kana raa, kɛ wey arɛt.”

²³Ano kwong, Dagwi Darwey a tik yére yane ye sangal e sevwel o, ko a ro yɛ ziri wɛt, a ka nɔng ɛn e vwɔ̂ Yɔshuwa na a ro ɛn arɔng wɛt.