Read berom Besuga Israyɛl 20 Bible Online

Besuga Israyɛl 20 - berom bible

Besuga Israyɛl 20

¹Ko mwa BeIsrayɛl ba nusu yi e Dan e rwa bato vɔk e Bɛɛr-Sheba e rwa batin, na yi e mwa yɛnɛ̂ vwêl Gileyat e rwa rak. Yɛn a man mwa myak sede mwat gwining e nuyêl Dagwi Darwey e Mizpa.

²Mwa bemât nuyêl yerê BeIsrayɛl bá sè e ji tula mo hê bemât Dagwi. Bemât comô bol de ba vɔk bewal, nepyak mɛn na sè gu naga banaas (400,000).

³Ko bemât yerê Bɛnyamin ba wok, bwang BeIsrayɛl ba tula hɛn e Mizpa. BeIsrayɛl ba rangal, ba ye, “Be ha a wot gwong de ba ra nengyas nemo mo.”

⁴Ko WoLevi de ba mɔrɔ hwā mɛ mo a ye, “Me tanga hwā hom wot a vey wul Gibeya e yenɛ̂ vwêl Bɛnyamin, na wot pɔl ɛ̀.

⁵Bemât Gibeya ba vey nabwalak, ba rɔnɔ lɔ de ma sé ɛ̀, yɛn a simo be mɔrɔ me. Sede yɛn a bit ɛ, ko yɛn a vɛ̌ dyɛngɛs na jɛn-hwā hom na retek, ba teshe na yɛ sɛ̌ a ku.

⁶Ko me ma jut revin o, ma yɛt rɛ bagap o, bagap o, ma gas, ko ma tomo e kawɛ bak wo BeIsrayɛl, yaga ba ga ra pyɛ̂ rekyen de ya sé byɛm-byɛm e ji sevwêl Israyɛl.

⁷Yin mwa de yin a sé e ngamo, yin vɛ à BeIsrayɛl, há in pyɛ de wot a rɔda ra e ra pyɛ́ yemo.”

⁸Bemat o ba sogo e tumal mwa jìp, ko ba ye, “Vit a mwat de a rɔda toyo wɔ e lɔ mɛ kɛ e buk mɛ.

⁹Pyɛ de wot a rɔda ra na bemât Gibeya: Wot a rɔda masa sesek na wot kasa bemat de bê wɔ̀ hwo ɛn na como.

¹⁰Bemat zap hining e ji bazap kuru e ji BeIsrayɛl ba rɔda wɔ̀ jāma a bemât como pyɛ̂ re, ko bwang o bê wɔ̀ tala BeGibeya pyɔlɔ mɛn, yaga pyɛ̂ byɛm-byɛm de yɛn a ga ra e ji Israyɛl.”

¹¹Ano kwong, BeIsrayɛl ba tula hɛn na yey rining, na be wɔ̀ hwo e ra repomô Gibeya na como.

¹²Ko yerê BeIsrayɛl ya tomo betom vɔk e yɛnɛ̂ vwêl Bɛnyamin, na be rangal hɛn, “E yere nɛ̌ nengyas à nemo de yin a ra ano arɛt?

¹³Vey in na nèy gul nane de na sé e ji Gibeya, na wot mɔbɔs nɛ, yaga na wot gas ot na neves e ji Israyɛl.” Ko BeBɛnyamin ba kyɛ́ ɛn nà sey hâ begwa mɛn BeIsrayɛl.

¹⁴Yɛn kwong ba nusu mwa yi e bapomo mɛn vey e Gibeya, na be tó como na BeIsrayɛl.

¹⁵E tuk hane BeBɛnyamin ba tula bemât como gu kuru baba na vɛ batyiimin (26,000) yi e bapomo mɛn. Bemât Gibeya ba kasa bemât tɔ̂k tô como naga betaama (700).

¹⁶E ji bemât como vane mo mwa bemât mɛ̀lɛng ba sè ɛ̀ naga betaama de ba tɔk tô pyɛ̂ bes na gazik tyɔng wɛt. Kawɛ e ji mɛn, ka sede a rene kewɔrɔ̂ng tot rato kining na gazik, ko a rɔda toro vwel wɛt.

¹⁷Ko bwang yerê BeIsrayɛl ya tula besugâ como de ba wul gu naga banaas (400,000).

¹⁸BeIsrayɛl kwong ba wɔ́ e kwɔ̂n rê fongol e Bet-Ɛl, na yɛn wɔ̀ rangâl Dagwi, ba ye, “E yɛ̌ yere e ji mot de ya rɔda tānga wɔ̀ hwo tó como na yerê Bɛnyamin arɛt?” Ko Dagwi Darwey a yang ɛn, “Yerê Yuda yɛ̀ ya rɔda tānga wɔ̀.”

¹⁹BeIsrayɛl kwong ba nusu nagasi, yɛn a wɔ̀ tɛ̀ durâ como bagat na Gibeya.

²⁰Ba gwɛ̌ sek wɔ̀ tó como na BeBɛnyamin, yɛn a yong ɛn ba saras e nekwɔn mɛn, ba bɛrɛng mɛ̀ Gibeya.

²¹Ko bemât comô Bɛnyamin ba nusu yi e Gibeya, ba tó como na BeIsrayɛl, ko e tuk hane, ba mɔbɔs bemat gu kuru baba na vɛ baba (22,000).

²²BeIsrayɛl ba toyo wɔ e kwɔ̂n rê fongol, ba wɔ̀ tosho e nuyêl Dagwi Darwey nabwalak o. Yɛn a to rangal hɛ, ba ye, “Ko sɛ̌ wot to wɔ̂ como na begwa mot yerê Bɛnyamin o, kɛ e rɛ̌?” Ko Dagwi a toyo a yɛn, a yang ɛn, “Ey, kyè in.” Yaga ano bemât comô BeIsrayɛl ba gwɛ̌ yey ting. Yɛn a to wɔ̀ yong ɛn, ba saras e nekwɔn mɛn tyɛng sede jwaane.

²³

²⁴Ba to gwɛ̌ sek wɔ̀ tó como na BeBɛnyamin tuk he neba.

²⁵BeBɛnyamin o arɔng ba to nusu, ba man e como mo, ko ba to mɔbɔs BeIsrayɛl de ba tɔk como gu kuru na gu rwit (18,000).

²⁶Jeng de BeIsrayɛl ba di ano, yɛn a sogo mwa wɔ e Bet-Ɛl. Yɛn a wosho e hwomo. Yɛn a tik rê pyɛ́ tuk hane vɔk e turuk. Yɛn a sangal e vwel, yɛn a tosho e nuyêl Dagwi. Yɛn a nása nenɔrɔ̂ yas de be rangas burang tanga nenɔrɔ̂ sangâl netyang vɔk na Dagwi.

²⁷Kundung Wuna-na-sirâ Dagwi gwa sè e hwomo e Bet-Ɛl e jeng yane. Ko Pinehas Ɛlɛyazar Aharon, a ra fwôm piris. BeIsrayɛl ba rangâl Dagwi Darwey, ba ye, “Ko sɛ̌ wot to wɔ̂ como na begwa mot BeBɛnyamin, kɛ wot tik ɛ?” Ko Dagwi Darwey a toyo a yɛn, a yang ɛn, “Ey, kyè in, ma rɔda ba nára hɛn e vwɔ min nahwol.”

²⁸

²⁹BeIsrayɛl ba wɔ̀ tɛ̀ bemat e nekwɔn waba, ba gwɔrɔ mɛ̀ repomô Gibeya.

³⁰Yɛn a sogo e tuk hê tat, yɛn a wɔ̀ hwo tó como na BeBɛnyamin; yɛn a yong ɛn ba saras e nekwɔn mɛn be bɛrɛng mɛ̀ Gibeya, sede remo de ba ga tɔ́k ɛn bé rá.

³¹Jeng de BeBɛnyamin ba nusu yi e ji repomo, na be tó como, ko BeIsrayɛl ba ye sede be tele, na be bin hwɔtɔ hɛn mɛ̀ yi e repomo mo. Sede remo de BeBɛnyamin ba tɔ́k ɛn, ba hwo mɔbɔs BeIsrayɛl behak e cwɛl, e gwong de gwa sé vɔk e Bet-Ɛl na gwane de gwa sé vɔk e Gibeya. Vane de ba mɔbɔs ba sé sede kuru batat.

³²BeBɛnyamin ba tē, “Wot a ga to re ɛn sede jojot!” Ko BeIsrayɛl ba ga kana yong ɛ̀, yɛn ê tele, na be hwɔtɔ hɛn yi e repomo vɔk e begwong.

³³Jeng de yɛn a sek yi e nekwɔn mɛn na bama, na be to yong ɛn e Baa-Tamar, ko bemat mɛn de ba sé e waba e bak ta na Gibeya ba sogo, ba ye gbuguruk.

³⁴Bemât como gu kuru rining, besuga de ba kasa yi e ji BeIsrayɛl mwa, ba hwo Gibeya na como. Como mo ya fes, ko BeBɛnyamin ba ka tɔk reyɔm ra ga hwo e ra yɛn wɛt.

³⁵Dagwi Darwey kwong a nɔ̂ng BeIsrayɛl wɛng e ra BeBɛnyamin. E tuk hane yɛn a mɔbɔs bemât como gu kuru baba na vɛ batungun na naga gwining (25,100).

³⁶A remo kwong BeBɛnyamin ba di BeIsrayɛl ba ga re ɛn e como mo. Bemât comô BeIsrayɛl ba sek na bama, na be nɔ̂ng BeBɛnyamin kwɔn, yaga yɛn a tɛ̀ gap mɛn e ra bemat de ba gwɔrɔ Gibeya e waba.

³⁷Bemat vane ba ye wuk yi e waba, yɛn a yel ziri e ji repomô Gibeya, ba bere hɛn, ba mɔbɔs bemât mwa hywiri.

³⁸Bwang BeIsrayɛl ba ga yong ɛ̀ na bemat e waba wɔgɔ, pyɛ dura mo yɛ̀ a sekyeng: Jeng de bê di gwokyeng gwo tugus yi e ji repomo mo,

³⁹ko BeIsrayɛl de ba sé e vwel e como mo yɛn a rɔda doyo. BeBɛnyamin ba ga kana hwo mɔbɔs BeIsrayɛl sede kuru batat, ko yɛn a yang bemɛn, “Wot a ga to re ɛn sede remo e pɛ́rɛ mo.”

⁴⁰Ko jeng de gwokyeng gwa hwo tugus yi e ji repomo tùk, tuk, tuk BeBɛnyamin ba di e bama mɛn, yɛn a di mwa repomo ra sé re kya!

⁴¹A remo BeIsrayɛl ba hwo doyo, ko BeBɛnyamin ba lingsit, yaga ba tɔk, reyɔm ra ga hwo e ra yɛn.

⁴²Yɛn a toyo, ba hwo tele vɔk e hey, ko yɛn a wɔ̀ dalas wɛt, yaga yɛn a wɔ̀ man na regyɛng bemat yi e ji repomo, ba raa hɛn, ba tɛ̀ ɛn e tē, ko ba mɔbɔs hɛn.

⁴³BeIsrayɛl ba gyep ɛn, ba ro ɛn, ba raa hɛn, be wey na yɛn vɔk e rwa rak e bak Gibeya.

⁴⁴Yi e ji BeBɛnyamin, bemat gu kuru na vɛ gu rwit (18,000) mwa hɛn besugâ como ba wey.

⁴⁵Bwang o ba doyo, ba tele vɔk e hey, vɔk e Gwofwa Rimɔn. Ko BeIsrayɛl ba wɔ mɔbɔs gu batungun (5,000) e gwong, ba ro bwang o vɔk e Gidɔm, ba to mɔbɔs gu baba (2,000).

⁴⁶Nepyak bemât comô BeBɛnyamin de ba mɔbɔs tuk hane na wul gu kuru baba na vɛ batungun (25,000), mwa hɛn vê yey ting.

⁴⁷Ko bemat naga betyiimin ba tele wɔ e hey, ba wɔ̀ dalas e Gwofwa Rimɔn, yɛn a sangal e kwɔn o pɛl naas.

⁴⁸Ko BeIsrayɛl ba toyo, ba kyě mɔbɔs bwâng BeBɛnyamin e ji bapomo mo mwa, beras na beha, na nèy tanga yas. E yɛnɛ mo ba tɛ̀ kya e bapomo mo mwa.