Read berom Besuga Israyɛl 21 Bible Online

Besuga Israyɛl 21 - berom bible

Besuga Israyɛl 21

¹Jeng de BeIsrayɛl ba kana tula hɛn e Mizpa, ko ba sira hɛn na sirâ mwin wɔgɔ, “Vit a mwat e ji mot de a rɔda nɔng WoBɛnyamin hwóng mɛ e weneng.”

²Ko a remo BeIsrayɛl ba wɔ̀ tula hɛn e nuyêl Dagwi e Bet-Ɛl, ko ba sangal e hwomo, ba dak sekun, yimo gasi vɔk e hywegelek, ba tosho ding-ding.

³Yɛn a ye, “A Dagwi Darwey, Dagwi wo BeIsrayɛl, yaga sɛ́ de pyɛ́ yemo ya té ano e ji Israyɛl arɛt? Yaga sɛ́ de yere jining ya rɔda sè vit e ji Israyɛl arɛt?”

⁴Nusu hwol, bemat ba tulu bop nagasi, ba lɔk gàgbang rangâs yas, ko yɛn a nása ɛ̀ nenɔrɔ̂ yas de be rangas burang tanga nenɔrɔ̂ sangâl netyang vɔk na Dagwi.

⁵Yɛn a rangal, ba ye, “E vɛ̌ bemat e ji yére Israyɛl de ba kana wɔ́ e kwɔ̂n tula e nuyêl Dagwi Darwey wɛt ɛ?” Yaga yɛn a ga kana sira hɛn wɔgɔ, kawɛ de a tút vɔk e de tula e nuyêl Dagwi e Mizpa wɛt, ba rɔda mɔrɔ hɛ.

⁶Ko a remo BeIsrayɛl kwong ba wok nemwishish begwa mɛn yerê Bɛnyamin, ko ba ye, “Yunung, ba ga wey na yere jining yi e ji Israyɛl.

⁷E sɛ́ de wot a rɔda ra na beras vemo de ba tɛt ɛ̀, na be sɛ̀ behâ weneng ɛ? Sede remo de wot a ga kana sira hot na Dagwi Darwey, wot a rɔda nɔng ɛn behwong mot, na be ra weneng o wɛt ɛ?”

⁸Yɛn a rangal, ba ye, “E yɛ̌ yere e ji yére Israyɛl de ya kana wɔ̂ tula e nuyêl Dagwi Darwey e Mizpa wɛt ɛ?” Ko yɛn a sɛ̀, vit a mwat gwining yi e Yabɛsh e yɛnɛ̂ vwêl Gileyat de a kana wɔ̂ tula mo,

⁹yaga jeng de yɛn a bara bemat o, ko ba sɛ̀ vit a mwât Yabɛsh gwining de á sè ɛ̀.

¹⁰Ko bemât tula mo ba tomo bemât yey ting gu kuru na vɛ baba (12,000), ba yang ɛn, “Kyè in, ko yin wɔ̀ mɔbɔs bemât Yabɛsh mwa na beha tanga nèy!

¹¹Pyɛ de yin a rɔda ra a yet ngan, mɔbɔs hin beras mwa, ko mɔrɔ hin kawɛ hwā de a ga ra weneng.”

¹²Jeng de yɛn a wɔ́, yɛn a sɛ̀ e ji BeYabɛsh beyorom-behwong naga benaas de ba rɔngɔl nà ra weneng, ko yɛn a vey na vɛ e dura mɛn e Shilo de wa sé e vwêl Kanaan.

¹³Ko bemât tula mo mwa ba tomo na be há a BeBɛnyamin de ba tele ba sangal e Gwofwa Rimɔn, ba ga gwɔt como, sɛ̌ sangâl netyang zɔng a remo.

¹⁴BeBɛnyamin o ba toyo hɛn vɛ hɛn, ko ba nɔng ɛn behwong BeYabɛsh vane de ba tik ɛn beken, na be tɛ́ mɛ behâ weneng, ko behwong o ba radɛ a yɛn.

¹⁵Ko BeIsrayɛl ba wok nemwishish BeBɛnyamin, yaga Dagwi Darwey a ga tɛt yere yi e ji yére Israyɛl.

¹⁶Ko bemakûk BeIsrayɛl ba ye, “Remo de beha ba radɛ a BeBɛnyamin, yaga ba ga mɔbɔs vɛ, e sɛ́ de wot a rɔda ra na beras de ba tɛt ɛ̀, na be sɛ̀ behâ weneng arɛt?”

¹⁷Ko yɛn a ye, “A sé gbing-gbing na bwâng BeBɛnyamin be sɛ̀ nedanelɔ, yaga na be kwon wey na yere jining yi e ji yére Israyɛl wɛt.

¹⁸Ko mwa ano, wot ê tɔk nɔ́ng ɛn behwóng mot e weneng wɛt yaga wot a ga sira hot wɔgɔ, tik na gawey he hwo e ra mwat de a nɔ̂ng WoBɛnyamin hwóng mɛ e weneng.”

¹⁹Yɛn a hwo ye, “Di, nzem Dagwi Darwey de be ra e Shilo kahɛ shey na vey bagat.” Shilo mo wa sé e rwa bato na Bet-Ɛl, e rwa batin na Lebona, ko e rwa rak na gwong de gwa sé e tê Bet-Ɛl na Shɛkɛm.

²⁰Ano kwong bemakuk o ba yang BeBɛnyamin, “Kyè in, na yin wɔ̀ dyɛng e lɛrɛ e ji câp anap.

²¹Gyɛng in jeng de behwông yi e Shilo ba nusu ba hwo rɛɛ nzem o, ko yin vɛ̌ nunus yi e ji câp anap o, ko kawɛ a kaba mwɛ à hwong o na gap, ko a kyè mɛ̀ wɔ e yɛnɛ̂ vwêl Bɛnyamin, a wɔ̀ tɛ́ mɛ̀ hwā mɛ.

²²Ka sede beda mɛn kɛ begwa mɛn ba vey na sekun o na wot, ko wot a rɔda yang ɛn, ‘Tík in a yɛn vɛ yaga wot. Jeng de bá teshe na BeYabɛsh, ko bá tɔk vos beha de ba vey a yɛn mwa wɛt. Yin arɔng, yin a lashe sira mwin min wɛt, yaga yin a nɔng ɛn vɛ e weneng wɛt, ko yaga ano gawey ha rɔda hwo e ra yin wɛt.’ ”

²³Ano de BeBɛnyamin ba ra. Kawɛ e ji mɛn a vo hwong yi e ji behwông rɛɛ mo, ko a vɛ̌ kyè mɛ̀, a wɔ̀ tɛ́ mɛ hwā mɛ. Yɛn a toyo vɔk e yɛnɛ̂ vwel mɛn, ba to wɔ̀ lɔk bapomo mɛn, ba sangal ɛ̀.

²⁴Ano kwong, bwâng BeIsrayɛl ba to ɛn, kawɛ vɔk e yere mɛ, vɔk na belɔ mɛ, na vɔk e kwɔ̂n nedanelɔ mɛ.

²⁵E jeng yane BeIsrayɛl vit a yɛn à gwɔ̀m de ê re negwɔm e ra yɛn. Yaga ano, kawɛ mwat a ra pyɛ de yey mɛ ya simo zɔng.