Read berom Besuga Israyɛl 3 Bible Online

Besuga Israyɛl 3 - berom bible

Besuga Israyɛl 3

¹Dagwi Darwey a tik bwâng yére cak e sevwel o, yaga na yɛ̀ a bin mara mɛ̀ BeIsrayɛl de ba ga kana masa tô como e Kanaan wɛt.

²A ra ano zɔng, na a bin basa a kahɛ zamâng BeIsrayɛl tô como, a kat mɛ̀ hemo de ha ga kana tɔk tô como wɛt.

³Yére bemat de ba tik ɛn e vwel o, à BeFilisti e bapomo betungun mɛn, na mwa BeKanaan, na mwa BeSidɔn, tanga mwa BeHivi de bá sè sangal e bak berakû Lɛbanɔn, yi e rakû Baal-Hɛrmɔn vɔk e Lebo-Hamat.

⁴Ba tik ɛn e hwomo, yaga na be tɛ́ ɛn pyɛ marâ BeIsrayɛl, na be di kɛ gyeng yɛn a rɔda raa badu de Dagwi Darwey à kana nɔ̂ng bedabeda mɛn yi e vwɔ̂ Mose.

⁵Ano kwong BeIsrayɛl bà sangal e tê BeKanaan, na BeHiti, na BeAmɔr, na BePɛrizi, na BeHivi, tanga BeYebus.

⁶Ko yɛn a hwo wuna hɛn e râ weneng na bemɛn, yɛn a nɔng ɛn behwong mɛn, ko yɛn a jut a nèy mɛn behwông bemat o arɔng, ko yɛn a re a bedagwi mɛn fongol.

⁷Ano kwong, BeIsrayɛl ba ye bam à Dagwi mɛn, yɛ Dagwi Darwey. Ba ragas pyɛ́ vyes e bayis mɛ, yaga yɛn a hwo re a pyɛ̂ sekwît Baal na Ashera fongol.

⁸Yaga ano, Dagwi a wok shom sizɔng na BeIsrayɛl, ko a vɛ̌ nára hɛn e vwɔ̂ Kushan-Rishatayim, hwak e ji begwɔ̀m Mɛsɔpɔtamya. BeIsrayɛl ba sap ɛ, ko a re negwɔm e ra yɛn neshey rwit.

⁹Jeng de BeIsrayɛl ba tosho a Dagwi Darwey, ko yɛ a nɔng ɛn mwat de a sey ɛn yi e vwɔ̂ bemât repugu mɛn, reza mɛ, à Ɔtniyɛl, hwêy Kenas, gwa Kalɛp swɛl o.

¹⁰Gabik Dagwi Darwey ha hwo e ra Ɔtniyɛl, ko a tɛ́ ɛ mwât nuyêl BeIsrayɛl. A wɔ̀ to como na gwɔ̀m o, Dagwi Darwey a nɔng ɛ wɛng, ko a re ɛ e como mo.

¹¹Vwel o ha sangal tyang neshey kuru banaas (40) vɔk e jeng de Ɔtniyɛl Kenas, a ku.

¹²Ano arɔng, BeIsrayɛl bà to ra pyɛ́ vyes e nuyêl Dagwi Darwey. Yaga banɛn vane de yɛn a ga ra mo, Dagwi a nɔ̂ng Ɛglɔn, gbɔng gwɔ̀m Mowap, gap e ra yɛn.

¹³Ɛglɔn kwong a wɔ̀ rini BeAmɔn na BeAmalɛk, yɛn a wɔ̀ tó como na BeIsrayɛl. Yɛn a re BeIsrayɛl na como, yɛn a re Repomô Tyét Ryey wɔgɔ, Yeriko, ko ra tɛ́ ɛ remɛn.

¹⁴BeIsrayɛl ba sap Ɛglɔn, gbɔng gwɔ̀m Mowap, ko a re negwɔm e ra yɛn neshey kuru na nɛ rwit (18).

¹⁵Ko BeIsrayɛl ba tosho a Dagwi Darwey. Yɛ kwong a nɔng mwat de a sey ɛn, reza mɛ, à Ehut, hwey Gera, yi e yerê Bɛnyamin. Yɛ a sé mwat mwɛlɛng. BeIsrayɛl bà tomo hɛ, na a wɔ̀ nɔng pyɛ́ de gbɔng gwɔ̀m Mowap a tɛ̀, be nɔngɔs hɛ yɛ̄.

¹⁶Ko Ehut a turu wal de nelis wɛ na wul bwol gwining na rebit o, de wa sé vootot bak ba. A rɔgɔs wɛ e rawît gwong mɛ hê bak vwɔ yege, ko a dul wɛ na gworugu mɛ.

¹⁷A kyè na pyɛ́ mo, a wɔ̀ nɔ̂ng gbɔng gwɔ̀m Mowap. Gwɔ̀m o a mɔsɔ, a vɔk gwobek tyɔng wɛt.

¹⁸Bama de Ehut a ga nɔng ɛ pyɛ́ mo, ko a wɔ̀ tɛ̀ bemat de ba gà vɔk a yɛ pyɛ́ mo e gwong.

¹⁹Ehut kwong a to wɔ̀ toyo e gwong yi e beta behak de bà kana tsep vɛ bagat na Gilgal. A wɔ yang gwɔ̀m o, “Neken mo ne ros, à Gbɔng Gwɔ̀m, ma vɔk hâ neyaang de me simo me ha a hwo.” Ko gwɔ̀m a yâng besam mɛ be sek, na be nɔng ɛn kwɔn. Yɛn kwong yɛn a nusu hɛn.

²⁰Ko Ehut a sek bagat na yɛ e kwɔ̂n sangal mɛ e lɔ̂ rak o de a yong, na a bin sɔ́ ɛ̀ gul tyaang; yɛ kwong a sè sangal nju mɛ e kwɔn o. Ko Ehut a yang ɛ, “Ma vey a hwo na reha de Dagwi a tomo me mɛ̀ vey na hwo.” Gwɔ̀m kwong a vɔk a sogo cik yi e kwɔ̂n sangal mɛ.

²¹Ko Ehut kwong a nára vwɔ mwɛlɛng mɛ, a hwɔtɔ wal mɛ de a rɔgɔs e wît gwông vwɔ yege, a luga mɛ̀ gwɔ̀m o e jim, pòrot!

²²Wal o wa yel e jim gwɔ̀m o ngyɔ̌t mwa na rekparak o, ko bwep ha pere wɔ̀ bang wɛ. Ehut a hwɔtɔ wal o wɛt, ko pyɛ̂ byɛm-byɛm ya nusu ɛ.

²³Ehut kwong a nu ɛ, a bang rwi duk o, a man gwɛ.

²⁴Bama de a ga kyè, ko besam gwɔ̀m o ba pom, ba sɛ̀ rwi duk o e mana, ko yɛn a bare, gyeng rɔ̌ gwɔ̀m a wɔ̀ nusu jey e hwomo e bak hwak wo duk o.

²⁵Yɛn a sǎ e de gyeng, sɛ̌ a yang ɛn kpɛɛ, ko rwi mo gwo rɔ̌ e mana gbak. Yɛn a hwo jut makwili, yɛn a wunta mɛ̀ gwɛ, ko yɛn a sɛ̀ darwey mɛn e dyɛngɛ, revin o e tîs duk.

²⁶Jeng de yɛn á rɔngɔl e de gyeng o, Ehut á vɔk a hywit ɛ, a pere wɔ̀ kwey beta de bà kana tsep, ko a pere wɔ̀ dal e Seyira.

²⁷Jeng de a wɔ̀ wul e hwomo, a vɔk a pɛl durum e bak vwêl bahwol Ɛfrayim. BeIsrayɛl ba wok, ko ba vɔk ba nusu, ba dopɛ e yɛ, ba kyè wɔ gyirik, ko yɛ á sè mwât nuyel mɛn.

²⁸A hwo yang ɛn, “Raa hin me! Dagwi Darwey a ga nɔng bemât repugu min, BeMowap e vwɔ min.” Yi ano, yɛn a raa hɛ, yɛn a gyirik, yɛn a wɔ̀ sey ɛ̀ kwɔ̂n de BeMowap be tē ɛ̀ dɔ̂ Rɔt Yɔrdan, ko yɛn a tik mwat hwak, na a ye dɔ e hwomo wɛt.

²⁹E jeng yane yɛn a mɔbɔs bemât comô Mowap de ba wul sede gu kuru (10,000) de ba vɔk gap tyɔng wɛt, ko vit a mwat de a hywit ɛ.

³⁰E tuk hane, BeIsrayɛl ba re BeMowap e como, ko sevwel o sa sangal tyang neshey kuru rwit (80).

³¹E bamâ Ehut, ko Shamgar, hwêy Anat, a sey BeIsrayɛl arɔng. A mɔbɔs BeFilisti naga betyiimin (600) na gwelê rô behywarak how cap.