Read berom Besuga Israyɛl 4 Bible Online

Besuga Israyɛl 4 - berom bible

Besuga Israyɛl 4

¹E bama de Ehut a ga ku, BeIsrayɛl ba to ra banɛn e nuyêl Dagwi Darwey.

²Dagwi kwong a hàla hɛn e vwɔ̂ Yabin, hwak e ji begwɔ̀m Kanaan, de a re negwɔm repomô Hazor. Gwɔ̀m como mɛ, à Sisera, de á sè na sangal e Harɔshɛt-Hagoyim.

³Yabin a vɔk bekyɛkyɛ̂ bedwa vê dyam naga shabetat (900) de ba tó mɛ̀ como. A tak a BeIsrayɛl reyɔm na neves neshey kuru baba. Yaga ano yɛn a tosho a Dagwi Darwey na a sɛlɛ hɛn.

⁴E jeng yane Dɛbɔra, hwâ Lapidot, a sé zarap Dagwi, a to sé mwât nuyêl BeIsrayɛl.

⁵A sangsal e necam retîn jolgo rehak de ba tang rɛ, à Jolgo Dɛbɔra, na a gas a BeIsrayɛl de ba kyese na yɛ ha. Retîn jolgo mo ra sé e tê Rama na Bet-Ɛl e vwêl bahwôl Ɛfrayim.

⁶Tuhak a hwo tomo be yila a yɛ Barak, hwêy Abinowam, de a sé sangal e repomô Kɛdɛsh, e vwêl yerê Naftali, ko a yang ɛ, “Dagwi Darwey, Dagwi wo Israyɛl a sé nɔng o nu wɔgɔ, ‘Jut bemat gu kuru (10,000) yi e ji yére Naftali na Zɛbulun, na hwo kyè e nuyel mɛn vɔk e rakû Tabor.

⁷Ko ma rɔda hwɔtɔ Sisera, gwɔ̀m comô Yabin, tanga bemât como mɛ na bekyɛkyɛ̂ bedwa mɛn, na be to como na yin. Yin a rɔda man tô como mo e Rɔt Kishɔn, ko ma rɔda nára hɛ e vwɔ mō, hwà rɔda re ɛ e como mo.’ ”

⁸Barak a toyo a yɛ, a ye, “Ka sede hwô wɔ tanga me, ko ma rɔda wɔ, ko ka sede hwô wɔ tanga me wɛt, ko me arɔng ma rɔda wɔ wɛt.”

⁹Ko Dɛbɔra a yang ɛ, “Ey mwin, ma rɔda kyè tanga hwo. Ko di, hwà rɔda sɛ̀ nerey e gwong o wɛt, yaga Dagwi Darwey a rɔda nára Sisera e vwɔ̂ hwā.” Ano kwong Dɛbɔra a sogo, yɛn a kyè tanga Barak o vɔk e Kɛdɛsh.

¹⁰Barak kwong a yila BeZɛbulun tanga vê Naftali vɔk e Kɛdɛsh, ko bemat gu kuru (10,000) ba raa he. Dɛbɔra arɔng a kyè tanga yɛ.

¹¹Hɛbɛr, mwât Keni, a ga kana gas ɛ yi na begwa mɛ bemât Keni, yére Hobap, mwali Mose, a wɔ̀ lɔk buk mɛ e hwomo bagat na retîn cɔgɔ̂t ouk e Zaananim de ha sé bagat na Kɛdɛsh.

¹²Jeng de ba ha a Sisera, Barak Abinowam, a ga tut vɔk e rakû Tabor,

¹³ko Sisera a hwo tula bemât como mɛ mwa, na bekyɛkyɛ̂ bedwâ como vê dyam naga shabetat (900) yi e Harɔshɛt-Hagoyim vɔk e Rɔt Kishɔn.

¹⁴Dɛbɔra a hwo yâng Barak, “Sogo, tuk a hemo de Dagwi Darwey a sé nɔng o Sisera e ji vwɔ mō. Dagwi Darwey a ga sey a hwo yel.” Barak a hwo gyirik yi e rakû Tabor, ko bemât como gu kuru (10,000) ba sé raa hɛ.

¹⁵Jeng de yɛn a hwo e ra Sisera, na bemât como mɛ, ko Dagwi a tɛ̀ ɛn na bekyɛkyɛ̂ bedwâ como mɛn ba kyě tele kpɛɛ. Barak na bemât como mɛ ba tow ɛn na bewal; Sisera kwong a gyirik yi e ra kyɛkyɛ̂ bedwâ como mɛ, ko a tele e bol.

¹⁶Barak kwong a ro bekyɛkyɛ̂ bedwâ como mo tanga bemât bol o, ba mɔbɔs vɛ na bewal vɔk e Harɔshɛt-Hagoyim, ba wey na yɛn mwa kyuruk, ba tɛt ɛ̀ mwat gwining na neken wɛt.

¹⁷Sisera kwong a tele e bol vɔk e bûk Yayel, hwâ Hɛbɛr, WoKeni, yaga e jeng yane Yabin, gwɔ̀m Hazor, ba sé sangal tyang na belɔ Hɛbɛr, WoKeni.

¹⁸Yayel kwong a hwo nusu, na a man na Sisera, ko a yang ɛ, “Vey yel e ngamo, vey, à darwey hom. Hwo kwon wok bengyip wɛt.” Yɛ kwong a hwo dopɛ vɔk e ji buk o, ko hwā mo a lɛrɛ hɛ, a bang ɛ na gworugu.

¹⁹A yang hwā mo, “Gabɔk wɛt, nɔt me kenshi na me sɔ, yey hom ye hwɔshɔ.” Hwā mo a hwo wunta tsûng rehwo, ko a vɛ a yɛ nevasal, a nɔng ɛ, ko a sɔ. E bama mo a to bang ɛ na gworugu mo.

²⁰Sisera a to yang ɛ, “Tumal e rwi buk o. Ka sede mwat hwak a vey rangal hwo, mwat hwak a sé e ngamo arɛt? Ko hwo yang ɛ, wey.”

²¹Sede Yayel, hwâ Hɛbɛr, a di Sisera a ga dyɛng yuu e de nevwa, yaga a ga ruru, a hwo jut kwagam buk tanga remos. A kyè mɛ yaang-yaang, a wɔ̀ kagam a yɛ e rwanang, a pere wɔ man na vwel, ko Sisera a vɔk a ku.

²²Jeng de Barak a sé kyě raa Sisera, ko Yayel a di ɛ, a vɛ̌ nusu wɔ̀ man na yɛ, a yang ɛ, “Vey, di mwat de hwà sé jāma hɛ, á wot e ngat.” Yɛ̀ kwong a hwo yel e ji buk tanga hwā mo, ko a pom a sɛ̀ Sisera e dyɛngɛ revin o, na kwagam buk e rwanang mɛ, a ga ku.

²³Tuk hane kwong Dagwi a nɔng Yabin, gbɔng gwɔ̀m Kanaan, e vwɔ̂ BeIsrayɛl.

²⁴BeIsrayɛl kwong ba tak a yɛ reyɔm, ba teshe na yɛ, sɛ̌ ba wey na yɛ.