Read berom Besuga Israyɛl 5 Bible Online

Besuga Israyɛl 5 - berom bible

Besuga Israyɛl 5

¹E tuk hane Dɛbɔra tanga Barak Abinowam, ba ra lwɛlɛ gwomo ngan:

²Be somo Dagwi Darwey! BeIsrayɛl ba nɔng bato mɛn na be tó como, yɛn a nɔng bato mɛn na yey rining.

³Wok in, à yin begbɔng begwɔ̀m! Wet in betong, à yin bedaberey! Ma rɔda ra a Dagwi Darwey lwɛlɛ, ma rɔda ra yom yaga Dagwi Darwey wo BeIsrayɛl.

⁴À Dagwi Darwey, jeng de hwà tik berakû Seyir, jeng de hwà nusu yi e bak vwêl Ɛdɔm, vwel ha digis, rwak wa shusha yi e larwak, ey, nshi na hwo tele yi e bale.

⁵Beraku ba digis e nuyêl Dagwi Darwey wo Sinai, e nuyêl Dagwi Darwey, Dagwi wo BeIsrayɛl.

⁶E jeng Shamgar, hwêy Anat, e jeng Yayel arɔng, bejik ba kyɛ́ ɛn nà kweres e vwel o, bemât kwɛngɛl ba kweres e begwong besɛl o zɔng.

⁷Bapomô BeIsrayɛl ba tɛ́ ɛn barin, vit a mwat e ji mo, sɛ̌ jeng de hwà sogo, à Dɛbɔra, sɛ̌ jeng de hwà sogo, à dê BeIsrayɛl.

⁸Jeng de BeIsrayɛl ba kasa bedagwi bepas, ko como ya hwo e ri repomo. E ji bemat gu kuru banaas e Israyɛl, vit a mwat de a vɔk bara kɛ ruga!

⁹Yey hom ya wuna hɛ na begwɔ̀m comô BeIsrayɛl, na vemo de ba nɔng bato mɛn na yey rining. Be somo Dagwi Darwey!

¹⁰Bare hin, a yin de yin e lagsa berɔgɔ̂ bemadung, yin de yin e sangal e ra bewap de ba lasha a vɛ, ko yin de yin e kyè e bol e begwong.

¹¹Wok in jɔngɔl bemat e hes nshi; ba sé ha neha wɛ̂ng Dagwi Darwey de a di, wɛng de BeIsrayɛl ba di arɔng. Ko bemât Dagwi Darwey ba gyirik wɔ e ri repomo.

¹²À Dɛbɔra, sene, sene! À Dɛbɔra! Sogo, jut lwɛlɛ mō! À Barak, sogo! À hwêy Abinowam, jut bemat de hwà vos e como!

¹³Ko bwâng bemat ba gyirik e kwɔ̂n bemât nuyel mɛn, bemât Dagwi Darwey ba vey na yɛ, ba ga yong ɛn yaga tô como:

¹⁴Ba vey ba raa regyeng yerê Bɛnyamin de ba gyirik arɔng. Begwɔ̀m como ba gyirik yi e Makir, yi e Zɛbulun begbɔng o ba vey na cwang como.

¹⁵Bemât nuyêl Isakar ba vey tanga Dɛbɔra, ey, mwin BeIsakar ba vey, Barak arɔng a vey. Ba ye dedung, ba raa hɛ e bama vɔk e nɛk o. Ko bemât cáng Rubɛn, nehywɛ mɛn na gas ɛn, yɛn a tɔk tɛ̀ e yey na be vey wɛt.

¹⁶Yaga sɛ́ de yin a ka sangal e ngyen tanga vyēl ɛ, na yin wok bemât gyeng vyēl de be yishi vyēl a? Ey, mwin bemât cáng Rubɛn, nehywɛ mɛn na gas ɛn, yɛn a tɔk tɛ̀ e yey na be vey wɛt!

¹⁷Yerê Gat ya sangal e Gileyat e gurâ Yɔrdan e nedem mɛn zɔng, yerê Dan ya sangal e kwɔ̂n bedwa-nshi arɔng zɔng, ko yerê Ashɛr arɔng ya sangal e vwara gworep.

¹⁸Ko BeZɛbulun ba ye waa a bato mɛn, ano arɔng BeNaftali ba ye waa a bato mɛn e como mo.

¹⁹Begwɔ̀m ba vey, ba tó como e Taanak, bagat na rɔt Megido; begwɔ̀m Kanaan o ba tó como, ko ba ka jut ɛ̀ dyam pyɛng wɛt.

²⁰Betangacɛn ba tó como yi e larwak, yi e begwong mɛn, ba tó como na Sisera.

²¹Tɛmɛ-nshi Rɔt Kishɔn ha vey ha rung ɛn. Rɔt Kishɔn ha yi na gap. Tik na me re nuyel, me re nuyel na kwɛngɛl na yey ting.

²²Bedwa kwong ba yi na sesuga, bekwǒk bol vɛ ba tó vwel gwòrok, gworok.

²³Tom-lagwî Dagwi Darwey a ye, “Tɛ̀ in gawey e ra Mɛrɔs, tɛ̀ in gbɔng gawey e ra bemat de be sangal e hwomo, yaga yɛn à vey sɛlɛ Dagwi Darwey wɛt, yɛn a vey sɛlɛ hɛ sede bemât como wɛt.”

²⁴Wo wɛng e ji beha, yɛ Yayel, hwâ Hɛbɛr, WoKeni, hwā de a dal na wɛng e ji beha de be sangsal e buk.

²⁵Sisera a lolo hɛ nshi sɔ, ko a nɔng ɛ nevasal. A nɔng ɛ nevasal de na sé nerat pɔgɔdɔk e shǐ bedaberey.

²⁶A nára vwɔ mwɛlɛng, a jut mɛ kwagam buk, a nára vwɔ yege, a jut mɛ remos. A kagam mɛ Sisera e rato, a pere bunut rɛ, a kulu rwanang mɛ, ko a mɔrɔ gwɛ.

²⁷Sisera a gaba ngung e cat bol mɛ, dɔɔlɔl, a dyɛng ɛ e hwomo yuu. E kwɔn de a dyɛng ɛ gup, a nàra revin o.

²⁸Neng Sisera a ye byak na a di ɛ e repɔk, a hwo sesin, a ye, “E sɛ́ de ya té de bekyɛkyɛ̂ bedwa como mɛ ba rɔngɔl ɛ? Yaga sɛ́ de bedwa mɛ ba rɛn ɛn ano ɛ?”

²⁹Behywi mɛ de ba dal na netsitsɛng ba toyo a yɛ na ha, ko yɛ arɔng, a sè tâng to mɛ,

³⁰Yɛn a sé rɔɔ jāma pyɛ́ de bê sɛ̀ yɛ e como na yɛn a gas, sede hwong gwining kɛ beba ayi yaga kawɛ e ji mɛn, ko berugu berat yaga Sisera, na berugu berat beba de ba jining vɛ na jɔ̄t yat yaga kawɛ hwā de ba vo e como.

³¹Yaga ano kwong, à Dagwi Darwey, tik na bemât repugu mō mwa be wey, ko bemat de ba tɛ̀ yey na hwo be nɛp sede gwi, de gwa nusu e rezâng gwi gasi. Vwel o kwong ha sangal tyang neshey kuru banaas.