Read berom Besuga Israyɛl 6 Bible Online

Besuga Israyɛl 6 - berom bible

Besuga Israyɛl 6

¹A vane ano, BeIsrayɛl kwong ba to hwo râ pyɛ́ vyes e nuyel Dagwi Darwey. Yaga ano Dagwi a nára hɛn e vwɔ̂ BeMidyan, ko ba re negwɔm e ra yɛn neshey netaama.

²BeMidyan kwong ba dal BeIsrayɛl na gap, ba tak a yɛn reyɔm. Yaga ano BeIsrayɛl ba lɛsɛ hɛn e ji tara beta na e ji nekwɔn dál nehak e beraku.

³Kayɛ jeng de BeIsrayɛl ba how pyɛ́, ko BeMidyan na BeAmalɛk tanga yére bemat yi e rwa rak be dopse vɛsɛ jugu hɛn.

⁴Yɛn a vey, ba tɛ̀ durâ como, ko ba lashe pyɛ̂ BeIsrayɛl pere vɔk e vwêl Gaza. Ba ka tɛt a BeIsrayɛl pyɛ cak wɛt, kɛ vyel, kɛ rɔndɔng, kɛ madung ayi.

⁵Yɛn a vey mwa na yas mɛn tanga bǔk mɛn, ko bá sè mwa pasasas sede rawal de wa dyɛng, yɛn na bemaryat mɛn vit a basa. Ano de yɛn a jugu vwel o, ko ba lashe hɛ.

⁶BeIsrayɛl kwong ba di reyɔm e vwɔ̂ BeMidyan, ba tɛ́ ɛn pɛng-pɛng, ko ba tosho a Dagwi Darwey.

⁷Jeng de BeIsrayɛl ba tosho a Dagwi Darwey, na a sɛlɛ hɛn yaga reyɔm o,

⁸yɛ kwong a tomo a yɛn na zarap Dagwi, a yang ɛn, “Wok in há de Dagwi Darwey wo BeIsrayɛl a ye, ‘Ma pat in yi e ji Misra, ma nusu na yin yi e ji sevwêl sesam.

⁹Ma pat in yi e vwɔ̂ BeMisra, tanga yi e vwɔ̂ bemat mwa de ba tak a yin reyɔm e ji sevwel semo, ko ma ro ɛn yi e nuyel min, ko ma nɔng in sevwel mɛn.

¹⁰Ma ha a yin, me Dagwi Darwey ma sé Dagwi min, yin kwon re a bedagwî BeAmɔr fongol wɛt, bemat de yin a sé sangal e sevwel mɛn. Ko mwa ano yin a ka tɛ̀ tong na yin wok ha hom wɛt.’ ”

¹¹Tom-lagwî Dagwi Darwey a vey, a sangal e retîn cɔgɔ̂t ouk rê Yowash, mwât cang Abiyɛzɛr, e kerepomo Ɔfra. Hwey mɛ Gidɛyɔn á sè dâk alkama e kwɔn de be piri ɛ̀ nshî anap, na a bin dul ɛ̀ yi na BeMidyan.

¹²Ko tom-lagwi o a nusu a yɛ, a yang ɛ, “Dagwi Darwey a sé tanga hwo, à hwo sugâ como wo yey ting.”

¹³Ko Gidɛyɔn a toyo a yɛ, a ye, “Gabɔk, à da, ka sede Dagwi Darwey a sé tanga wot, ko yaga sɛ́ de pyɛ́ yemo ya sé té na wot ano arɛt? Pyɛ̂ bes mɛ yemo de wot a wokos yi na bedabeda mot wɔgɔ, a sé e Dagwi Darwey de a pat ot yi e Misra ya sé e gwa arɛt? Ko di a remo, Dagwi Darwey a ga bomo hot na bama, a tik ot e vwɔ̂ BeMidyan de be tak a wot.”

¹⁴Ko Dagwi Darwey a yang ɛ, “Ci na gap mō mo, na hwo wɔ̀ sey BeIsrayɛl yi e vwɔ̂ BeMidyan. A sé e me reto hom de ma sé tomo hwo.”

¹⁵Ko Gidɛyɔn a toyo a yɛ, a ye, “Gabɔk, à Darwey mê yi e rɛ̌ na me sey bemat o ɛ? Cáng hom ya sé shɛl o mwa e ji yerê Manase, ko e me de ma sé swɛl o mwa e lɔ mot.”

¹⁶Ko Dagwi Darwey a yang ɛ, “Di, ma rɔda sè tanga hwo, ko hwà rɔda wey na BeMidyan o sede e mwat gwining zɔng.”

¹⁷Gidɛyɔn a yang ɛ, “Ka sede ma jam a hwo, ko hwo ra pyɛ de yê dura a me, hwà sé tanga me.

¹⁸Sede hwà simo, ko gyéng me, hwo kyè wɛt, sɛ̌ ma vey nɔng o nɔrɔ pyɛ̂ re e ngyen.” Ko a yang ɛ, “Ma rɔda gyeng o sɛ̌ hwà toyo.”

¹⁹Gidɛyɔn kwong a nára hɛ vɔk e lɔ, a wɔ̀ yɛrɛ kevyel, a kyé kɛ naka, a mara nemuk e gwopey, a yong mɛ̀ kpam-tuk sana géy-sing, a tɛ̀ banama mo e shap, ko a tɛ̀ nshî banama mo e wáng, a vey mɛ̀, ko a nára a tom-lagwi o e retîn cɔgɔ̂t ouk.

²⁰Tom Dagwi o a yang ɛ, “Jut banama mo na kpam o, na hwo tik pyɛ́ mo e ra gbondong, ko hwo shusha nshî banama mo e rak o.” Gidɛyɔn a ra tyɛng ano.

²¹Ano kwong, tom Dagwi Darwey a nára nû gwele de a vɔk e vwɔ mɛ, a ra mɛ̀ banama mo na kpam o, ko kya ha yi e gbondong o, ha vɛ̌ re pyɛ́ yane mo mwa, ko tom Dagwi o a ye bit, a to di ɛ wɛt.

²²Jeng de Gidɛyɔn a tɔk, a sé tom-lagwî Dagwi Darwey, ko a ye, “Yaa kukuuk! À Darwey, Dagwi Darwey, ma ga di tom-lagwî Dagwi Darwey bayis na bayis!”

²³Ko Dagwi Darwey a yang ɛ, “Hwo kwon sap wɛt, yey mō ye dyɛng, hwà rɔda ku wɛt.”

²⁴Ano kwong Gidɛyɔn a lɔk gàgbang rangâs yas vɔk na Dagwi e kwɔn hane mo, ko a yishi hɛ wɔgɔ, “Dagwi Darwey a sé wo yêy dyɛngɛ.” Kwɔn o ha rɔngɔl e Ɔfra womo de wa sé wo câng Abiyɛzɛr.

²⁵E ji turuk hane Dagwi Darwey a yang ɛ, “Jut mus rɔndɔng wo neba e ji vê da mō, womo de wa vɔk neshey netaama, ko hwo gangas gàgbang rangâs yas vɔk na Baal wo da mō, na hwo to tow swesêk Ashera de ya sé bagat na wɛ.

²⁶E bama mo, hwo lɔk gàgbang rangâs yas vɔk na Dagwi Darwey, Dagwi mō e ra tɛ̂t rahwol wane mo. Lɔk wɛ, ngyɛrɛ beta mo naka, na hwo de jut mus wo neba mo, na hwo nára wɛ nɔrɔ̂ pyɛ̂ rangas, ko hwo jut cɔgɔ̂t Ashera de hwà ga kana tow yɛ, tɛ̀ mɛ̀ kya mo.”

²⁷Ano kwong Gidɛyɔn a jut bemat kuru yi e ji bemât fwom mɛ, ko a ra tyɛng na pyɛ de Dagwi Darwey a ha a yɛ. Yɛ kwong, yaga a wokos bengyip bemât lɔ mɛ tanga bemât repomo mo, a tɔk ra fwom o nagwi wɛt sɛ̌ naturuk.

²⁸Jeng de bemât repomo ba nusu gasi bop, ko yɛn a di ba ga gangas gàgbang rangâs yas vɔk na Baal, ba ga tow swesêk Ashera, ba ga rangas mus wo neba e ra gàgbang rangâs yas vɔk na Dagwi pas o de ba ga lɔk.

²⁹Yɛn a hwo yang bemɛn, “E wa de a ra pyɛ́ yemo ano arɛt?” Yɛn a kyě rangsal, ba ngyɛgɛt, ko yɛn a de sɛ̀, e Gidɛyɔn Yowash wɛ̀ de a ra pyɛ́ yemo.

³⁰Ano kwong bemât repomo mo ba yang Yowash, “Vey na hwey mō, na wot mɔrɔ hɛ, yaga a ga gangas gàgbang rangâs yas vɔk na Baal, ko a to tow swesêk Ashera de gwa sé bagat na yɛ.”

³¹Ko Yowash a yang mwa bemat vane de ba paa shom, “Yin ê ra a Baal yol a? Kɛ yin ê gyep ɛ arɛt? Kawɛ mwat de e ra a yɛ yol, a rɔda ba wul ɛ gasi hwol wɛt! Ka sede Baal a sé dagwi mwin, ko tik na yɛ a ra yol na tó mɛ, yaga ba ga gangas gàgbang rangâs yas mɛ.”

³²Yi e tuk hane ba vo a Gidɛyɔn reza, à Yɛrubaal, yaga Yowas a ye, “Tik na Baal a ra yol na tó mɛ, a sé e gàgbang rangâs pyɛ́ vɔk na yɛ de ba ga gangas.”

³³A vane ano, mwa BeMidyan na BeAmalɛk tanga yére bemat yi e rwa rak ba wuna bato mɛn, ba ye dɔ a Rɔt Yɔrdan, ko ba tula hɛn e Nɛk Yɛzrɛɛl.

³⁴Gabik Dagwi Darwey ha hwo e ra Gidɛyɔn, ko a hwo pɛsɛl durum na a yishi mɛ̀ bemât câng Abiyɛzɛr, na yɛn a raa hɛ.

³⁵A tomo betom vɔk e neyɛnɛ̂ bavwêl Manase, na be yishi hɛn na be sè ɛ arɔng. A to tomo betom behak vɔk na yére Ashɛr, na Zɛbulun tanga Naftali, ko yɛn mwa ba vey ba wuna hɛn na yɛn.

³⁶Ano kwong, Gidɛyɔn a yang Dagwi, “Hwà ye, a sé yi na me de hwà rɔda sey BeIsrayɛl.

³⁷Ko di, ma rɔda lasha tôt vyel e gazu; ka sede ma di mwɛngɛ gwa dyɛng e ra tot o zɔng, ko bwang gazu mo hwogot, ma rɔda tɔk, hwà rɔda sey BeIsrayɛl yi na me, sede remo de hwà ha.”

³⁸Ko pyɛ mo ya té tyɛng ano. Gidɛyɔn a tulu bop gasi, ko a jut tot o, a piri hɛ, ko a ngyisi hɛ sɛ̌ nshi mo na sila shi.

³⁹Ko Gidɛyɔn a to yang Dagwi, “Hwo kwon tɛ̀ shom na me wɛt, ko simo a me, na me to hanat hining zɔng. Tik na me to mara pyɛ jining na tot hemo mo: Ma rɔda to lasha tot o e gazu, ko tik na mwɛngɛ gwo dyɛng e gazu mo zɔng, ko tot o hwogot.”

⁴⁰Ko nabwalak nane mo, Dagwi a ra a yɛ tyɛng ano: setot o zɔng sa sé hwogot, ko bwâng vwel ha vɔn ɛ na mwɛngɛ.