Read berom Besuga Israyɛl 7 Bible Online

Besuga Israyɛl 7 - berom bible

Besuga Israyɛl 7

¹Gidɛyɔn de ba to tang ɛ, à Yɛrubaal, yɛ na mwa bemat mɛ yɛn a nusu bop gasi, yɛn a tɛ̀ durâ como bagat na lwel nshî Harot. Ko dura mo gwô BeMidyan gwa sè e rwa bato na yɛn e nɛk e bak Rahwol More.

²Dagwi Darwey a hwo yang Gidɛyɔn, “Bemat de hwà vey mɛ̀ ba kat a me de ma rɔda nɔng o wɛng yi na vɛ e ra BeMidyan. Gyɛng BeIsrayɛl o ba rɔda ye, yɛn a re como mo yi na gap mɛn, ko yɛn a rɔda nɔng me nerey wɛt.

³Yaga ano, mok a yɛn wɔgɔ, ‘Kawɛ mwat de e vow rebek na bengyip, ko tik na a to ɛ vɔk e lɔ sede gwonon de gwo tele yi e raku Gileyat.’ ”

⁴Dagwi Darwey a to yang Gidɛyɔn, “Bemat vemo mo ba to kat gbak, jut vɛ, na hwo kyè mɛ̀ vɔk e kwɔ̂n nshi. E hwomo ma rɔda kasa a hwo vemo de hwà rɔda kyè na yɛn vɔk e de como mo. Womo de mê yang o, a rɔda kyè tanga hwo, ko ê kyè, ko womo de mê yang o, a rɔda kyè tanga hwo wɛt, ko ê kyè wɛt.”

⁵Ko Gidɛyɔn a kyè na bemat o vɔk e kwɔ̂n nshi. E hwomo Dagwi Darwey a yang ɛ, “Kawɛ mwat de ê sɔ nshi na lem sede vu, ko hwo tik wane detu, ko kawɛ mwat de ê ye guduruk na bakwot na a sɔ nshi, ko hwo tik wane detu arɔng.”

⁶Bemat de ba vɛ nshi na vwɔ na be sɔ na lem sede vu bá sè naga betat. Ko bwang o mwa ba ye guduruk na be sɔ nshi mo.

⁷Dagwi Darwey a yang Gidɛyɔn, yi na bemat naga betat vemo de ba sɔ nshi na lem sede vu, “Ma rɔda sey in, na me nɔng in wɛng e ra BeMidyan. Yang bwâng bemat o be kyè wɛrɛn, kawɛ vɔk e lɔ mɛ.”

⁸Gidɛyɔn kwong a tɛ̀ bemat o e gwong na be to ɛn vɔk e lɔ, a yang ɛn be nɔng bemɛn naga betat o pyɛ̂ re de yɛn a vɔk tanga bedurum mɛn arɔng. Durâ comô BeMidyan gwa sé e vwel o na yɛn e nɛk o.

⁹E ji turuk hane Dagwi Darwey a yang Gidɛyɔn, “Sogo, na hwo wɔ hwo e durâ BeMidyan, yaga ma ga nára a hwo hɛn e vwɔ mō, hwà rɔda di wɛng e ra yɛn.

¹⁰Ko ka sede hwô wok bengyip, na hwo hwo e ra yɛn, ko jut mwât fwom mō Pura, na yin kyè tanga yɛ vɔk e durâ como mɛn o.

¹¹Ko hwà rɔda wok pyɛ de yɛn a sé ha, hane ha rɔda nɔng o yey ting, na hwo wɔ̀ hwo e ra yɛn.” Gidɛyɔn kwong a sogo yɛ tanga mwât fwom mɛ Pura vɔk e vwarâ durâ como mɛn.

¹²BeMidyan na BeAmalɛk tanga yére bemat yi e rwa rak ba tula hɛn e hwomo pasasas sede rawal de wa dyɛng, ko bemaryat mɛn ba sé sede bazɛk e vwâ gworep, vit a basa yaga nepyak.

¹³Jeng de Gidɛyɔn a pom, ko a wok mwat hwak a sé há a sa mɛ negwi de a ranas, a ye, “Di, ma ranas negwi, ma di regat kpam-tuk de ba kyé na nemuk baale ra sé biring vey e ji durâ como mot, ko ra tɛ̄sɛ buk o hwak. Buk o gwa pere gaba kang-gang, ko gwa ngwɔgɔt hɛ hwiri.”

¹⁴Sa mɛ a toyo a yɛ, a yang ɛ, “Hemo ha sé pyɛ cak wɛt sɛ̌ e wâl Gidɛyɔn Yowash, WoIsrayɛl a wɛ̀ zɔng, yaga Dagwi a ga nɔng ɛ wɛng e ra BeMidyan tanga mwa durâ como mot.”

¹⁵Jeng de Gidɛyɔn a wok hâ negwi o na cap-hâ nɛ, ko a hwo gaba e vwel, a re a Dagwi fongol. E bama mo, a toyo vɔk e durâ como mɛn gwô BeIsrayɛl, ko a hanat a yɛn, “Sogo hin, Dagwi Darwey a ga nɔng ot wɛng e ra durâ como BeMidyan.”

¹⁶A gas bemat vane naga betat o bagyɛng batat, a nɔng kawɛ mɛn durum e vwɔ mɛ, a to nɔng ɛn betsung de vit a pyɛ e ji vɛ, sɛ̌ bemôl kya zɔng.

¹⁷Ko a yang ɛn, “Bɛrɛng hin me; jeng de ma wɔ̀ wul bagat na vwarâ durâ como mɛn, ko yin bɛrɛng kayɛ pyɛ de mê ra, ko yin ra tyɛng ano.

¹⁸Jeng de yin a wok me tanga regyɛng bemat hom, wot a pɛl bedurum mot, ko yin pɛl bemin e gwɔrɔ̂ dura mo arɔng, ko yin mok, yin tē, ‘Vê Dagwi Darwey tanga vê Gidɛyɔn!’ ”

¹⁹Gidɛyɔn tanga bemat naga de ba sé na yɛ ba wɔ̀ wul vwarâ durâ como mo tê turuk, bama de ba ga sege bemât bɛrɛ̂ng nekanang. Yɛn a vɛ̌ pɛl bedurum mɛn, ko yɛn a to mɔbɔs betsung de ba sé e vɔ mɛn.

²⁰Bwang bagyɛng baba mo ba ra tyɛng na pyɛ de yɛn a ra. Yɛn mwa ba vɔk kyâ mol e vɔ mɛ̀lɛng mɛn, ko ba vɔk bedurum e vɔ yege mɛn, ko ba mok, ba tē, “Wâl Dagwi Darwey tanga wo Gidɛyɔn!”

²¹Kawɛ e ji mɛn a tumal e dem mɛ, yɛn a gwɔrɔ durâ como mo, ko mwa bemat e dura mo ba dak sekun, yɛn a kyě tele shaam.

²²Yɛn vane naga betat ba pɛsɛl bedurum mɛn o, ko Dagwi Darwey a tɛ̀ bemât repugu mɛn o mwa e dura mo ba hwo tow bemɛn na bewal, yɛn a kyě tele vɔk e Zereda, na vɔk e Bet-Shita, tanga vɔk e repomo Abel-Mehola, bagat na Tabat.

²³Ko ba yila BeIsrayɛl yi e yerê Naftali, na ye Ashɛr tanga mwa yerê Manase, yɛn a vɛ̌ nusu mwa, ko ba ró BeMidyan o.

²⁴Gidɛyɔn a tomo betom vɔk e mwa bapomô bahwol yerê Ɛfrayim, na be yang ɛn, “Vey in, na yin tó como na BeMidyan. Sey in ɛ̀ Rɔt Yɔrdan na nerɔt de na sé vɔk e Bet-Bara, na yin dul ɛn nà ye dɔ.” BeƐfrayim kwong, ba nusu mwa, ko ba sey ɛ̀ nekwɔn té dɔ ne Rɔt Yɔrdan tanga nerɔt vɔk e Bet-Bara.

²⁵Yɛn a vo begwɔ̀m Midyan beba, yɛn à Orep na Zeep. Yɛn a mɔrɔ Orep e gwofwa Orep, ko ba to mɔrɔ Zeep bagat na kwɔ̂n pirî nshî anap hê Zeep. Yɛn a re nuyel na rô BeMidyan o, yɛn a vey a Gidɛyɔn na batô Orep na Zeep yi e gurâ Yɔrdan.