Read berom Besuga Israyɛl 8 Bible Online

Besuga Israyɛl 8 - berom bible

Besuga Israyɛl 8

¹BeƐfrayim ba yâng Gidɛyɔn, “Yaga sɛ́ de hwà ra a wot ano arɛt? Yaga sɛ́ de hwà yishi hot vɔk e de tô como na BeMedya o wɛt ɛ?” Yɛn a gyong ɛ ding-ding e ra pyɛ yane.

²Ko a toyo a yɛn na ha, a ye, “E sɛ́ de ma ra de ya dal myin ɛ? Pyɛ de wot a ra bê ka tyɛngrɛ yɛ na myin, yin bemât Ɛfrayim wɛt, yaga yin a ra pyɛ de ya dal yemo de me na bemat hom BeAbiyɛzɛr wot a ra sizɔng.

³Di in, Dagwi a ga nɔng begwɔ̀m Orep na Zeep vê Midyan e vwɔ min. E sɛ́ de ma sɛ̀ de ya dal myin arɛt?” Jeng de a ha a yɛn ano ko shom mɛn ya vɔk ya ye lɔ̀ɔ kwong.

⁴Gidɛyɔn tanga bemat mɛ vane naga betat ba re nuyel na rô bemât repugu mɛn o, ba wɔ̀ ye dɔ à Rɔt Yɔrdan, mwa ano de yɛn a ga ruru na be to wok vyong, ko yɛn a re nuyel na ro ɛn gbak.

⁵Jeng de yɛn a wɔ̀ wul Sukɔt, Gidɛyɔn a yang bemât repomo mo, “Gabɔk wɛt, nɔng in bemat hom pyɛ̂ re, yaga yɛn a ga ruru ko be to wok vyong. Di, ma sé re nuyel na rô Zeba na Zalmuna begwɔ̀m Midyan.”

⁶Ko bemât nuyêl Sukɔt ba yang ɛ, “Hwà ga kana re Zeba na Zalmuna e ngyen wɛt, ko yaga sɛ́ de wot ê jut pyɛ̂ re mot na wot nɔng bemât como mō a?”

⁷Gidɛyɔn a yang ɛn, “Tála ma hane. Jeng de Dagwi Darwey ê nɔng me Zeba na Zalmuna e vwɔ hom, ko ma rɔda ba dak babek min na serɔgɔ̂ hey.”

⁸Yi e hwomo, a wɔ e Pɛnuwɛl, a rangal bemât repomo mo, ko yɛn arɔng ba toyo a yɛ na ha tyɛng na hê bemât Sukɔt.

⁹Ko Gidɛyɔn a toyo a yɛn, a ye, “Jeng de ma ba toyo tyang, ko ma rɔda ba gangas gwotyɔ̌n gwomo.”

¹⁰Zeba tanga Zalmuna bá sè e Karkɔr tanga bemât como mɛn gu kuru na vɛ batungun (15,000), bwâng pyɛ de ya pɔl a yane yi e ji mwa bemât como vê yére bemat yi e rwa rak, yaga ba ga kana mɔbɔs bemât como mɛn gu naga na gu kuru baba (120,000).

¹¹Gidɛyɔn a kyè, a kwey e gwông vwarâ kpang de gwa sé e rwa rak na Noba tanga Yogbeha, a wɔ̀ hwo e ra regyeng bemât como sana tɔ́k mɛn.

¹²Begwɔ̀m beba vê Midyan o, vɛ à Zeba tanga Zalmuna, ba tele, ko Gidɛyɔn a raa hɛn na setele mo, a wɔ̀ vos ɛn. A tɛ̀ regyeng bemât como mɛn o a sè a yɛn kpɛɛ na bengyip.

¹³E bama mo, Gidɛyɔn Yowash, a to ɛ yî como mo, ko a kwey e Gwông Turûs Heres,

¹⁴a pere vo wen hwak wo Sukɔt. Gidɛyɔn a hwo ra a yɛ nerangsal. Wen o kwong a jɛk a yɛ bazâ bemât nuyel tanga vê bemakûk Sukɔt o, bemat o ba wul kuru bataama na vɛ betaama (77).

¹⁵Gidɛyɔn kwong a wɔ na bemât Sukɔt, ko a yang ɛn, “Bare hin, má gà yang in, yin sɛlɛ me, na yin nɔ̂ng bemat hom de ba ga ruru na be to wok vyong arɔng pyɛ̂ re, ko yin a ro mɛ wɔgɔ, ma ga re Zeba tanga Zalmuna na como e ngyen wɛt, ko yin ê nɔng pyɛ́ min wɛt. Ko di, a vemo.”

¹⁶Ano kwong, Gidɛyɔn a vos bemât nuyel o, a tow serɔgɔ yi e hey, ko a yɛt a yɛn shɔt, a dak ɛn mɛ̀ na hɛ.

¹⁷A to gangas gwotyɔ̌n Pɛnuwɛl, ko a mɔbɔs berâs repomo mo.

¹⁸Gidɛyɔn kwong a rangâl Zeba na Zalmuna, “E yere vɛ̌ bemat de yin a mɔbɔs e Tabɔr arɛt?” Yɛn a toyo a yɛ, ba ye, “Ba sé sede hwo, kawɛ e ji mɛn á sè sede hwey gwɔ̀m.”

¹⁹Gidɛyɔn a yang ɛn, “Yɛn á se begwa hom, neng mot a sé gwining o na yɛn, ma sira na Dagwi Darwey ka yin a kana mɔbɔs hɛn wɛt, ka ma yang mɔbɔs hin arɔng wɛt.”

²⁰A yâng hwey mɛsɛng mɛ Yɛtɛr, “Sogo na hwo mɔbɔs hɛn.” Ko wen o a sogo wɛt, yaga a wok bengyip, yaga a rɔngɔl hwey e ngyen.

²¹Ko Zeba tanga Zalmuna ba yang ɛ, “Sogo pyɛ mō, na hwo mɔbɔs hot, yaga fwom gwomo gwa sé gwô rwas.” Gidɛyɔn a sogo pyɛ mɛ, a mɔrɔ Zeba tanga Zalmuna, ko a paa yɔ̀m yi e tɔ̀ bemaryat mɛn.

²²Ano kwong, BeIsrayɛl ba yâng Gidɛyɔn, “Rē negwɔm e ra wot, hwo vɔk e nèy mō na nèy nèy mō, yaga hwà ga sey ot yi e vwɔ̂ BeMidyan.”

²³Gidɛyɔn kwong a yang ɛn, “Me kɛ hwey hom wot a rɔda re negwɔm e ra yin wɛt. E Dagwi Darwey wɛ̀ de a rɔda re negwɔm e ra yin.”

²⁴A to yang ɛn, “Mê ra wôn pyɛ jining na yin zɔng, kawɛ e ji min a nɔng me dyam-tong jining ye dyam shinang de yin a hashe yi na BeMidyan.” BeMidyan be tɛsɛ dyam-tong ye dyam shinang tyɛng sede yére cak yê vwel kpang ye tɛsɛ.

²⁵Yɛn a yang ɛ, “Ey mwin, wot ê nɔng o”, ko remo-remo yɛn a hwo lasha gworugû banga, ko kawɛ mwat a vey, a tɛ̀ ɛ̀ dyam-tong de a sey ɛ̀ yi e de como.

²⁶Dyam-tong de ba tula a yɛ nedirîk yɛ na wul sede kilo kuru baba. Ko ba wuna na yɔ̀m, na lɛ̀lɛ-fwɔ, na bègbɔng berugû begwɔ̀m de ba sé zwey, de begwɔ̀m BeMidyan ba tɔrɔ hɛn mɛ̀, tanga pyɛ́ de be tɛ̀sɛ e tɔ bemaryat na be tɔrɔ hɛn mɛ̀.

²⁷Gidɛyɔn a jut dyām yane, ko a yong mɛ̀ pyɛ sekwit, a tɛ̀ yɛ e repomo mɛ e Ɔfra. Ko mwa BeIsrayɛl ba tik nà raa Dagwi, ko ba kyese e hwomo na be re a pyɛ sekwit yane mo fongol e negya. Pyɛ yane ya tɛ́ ɛ a Gidɛyɔn na belɔ mɛ segun.

²⁸Ano kwong, BeIsrayɛl ba re negwɔm e ra BeMidyan neshey kuru banaas, vit a pyɛ bengyip cak, ko vwel o ha sangal tyang e jeng Gidɛyɔn.

²⁹Gidɛyɔn kwong de ba to tang ɛ à Yɛrubaal a kyè a wɔ̀ sangal e lɔ hê tó mɛ.

³⁰A vɔk nèy beras kuru bataama, yaga á vɔk beha pyak.

³¹A vɔk jɛn-hwā e Shɛkɛm de a tɔ a yɛ hwey wen, ko á vo a yɛ rezâ Abimɛlɛk.

³²Gidɛyɔn Yowash, a kwop kpushuk, ko a de ku. Ba lɛrɛ revin mɛ e ji sak da mɛ Yowash e Ɔfra wo câng Abiyɛzɛr.

³³E Bama de Gidɛyɔn a ku, BeIsrayɛl ba nɔng Dagwi bama, ko yɛn a re a BeBaal fongol. Yɛn a tɛ̀ Baal-Berit na a se dagwi mɛn,

³⁴ko yɛn a tɔk to bare na Dagwi Darwey, Dagwi mɛn wɛt, yɛ de a ga kyě seres hɛn yi e vɔ bemât repugu mɛn de ba gwɔrɔ hɛn.

³⁵Ano arɔng yɛn a tɔk dura a belɔ Gidɛyɔn feng mɛn, yaga pyɛ́ ryat de a ga ra a vwêl Israyɛl wɛt.