Read berom Besuga Israyɛl 9 Bible Online

Besuga Israyɛl 9 - berom bible

Besuga Israyɛl 9

¹A vane ano, Abimɛlɛk, hwêy Gidɛyɔn, a hwo wɔ na begwa neng mɛ e Shɛkɛm, ko a ha na yɛn tanga mwa cáng neng mɛ mo, a yang ɛn,

²“Rangal hin bemât Shɛkɛm, yang in hɛn, ‘E hɛ̌ mo ha dal a yin ɛ: nèy Gidɛyɔn bewen kuru bataama be re negwɔm e ra yin, kɛ mwat gwining a re negwɔm e ra yin ɛ?’ Bare hin, ma sé nemi min kɛ ano wɛt ɛ?”

³Ano kwong, cáng neng mɛ ya ha a yɛ na mwa bemât Shɛkɛm e ra pyɛ́ yane mo, bemât Shɛkɛm ba wok ano, ko neyey mɛn na wet ɛn na yɛ, yaga yɛn a di a sé cang mɛn.

⁴Ko yɛn a nɔng ɛ dyam pyɛng kuru bataama yi e duk sekwît Baal-Berit. Abimɛlɛk a jut dyām o, a tala mɛ̀ bezɔ̂ng nèy gul na ne raa hɛ.

⁵A sogo, a kyè wɔ e lɔ da mɛ e Ɔfra, a wɔ̀ mɔbɔs begwa mɛ nèy Gidɛyɔn beras vane kuru bataama e ra gbondong hwak. Ko Yotam nju mɛ zɔng, yɛ tashal mɛn a hywit ɛ, yaga a lɛrɛ hɛ.

⁶Ko bemât Shɛkɛm mwa tanga bemât Bet-Milo ba kyè wɔ e retîn cɔgɔ̂t ouk de ba gyep rɛ, na be wɔ̀ tɛ̀ Abimɛlɛk a tɛ́ ɛ gwɔ̀m mɛn.

⁷Jeng de ba ha a Yotam ha mo, a wɔ̀ tut e ra tɛ̂t raku Gɛrizim, a moklo na gbɔng fwɔ a ye, “A yin bemât Shɛkɛm, wet in betong na ha hom, yaga na Dagwi a bin wet betong na ha min arɔng.

⁸Tuhak batîn cɔ́gɔt ba tula hɛn na be tɛ gwɔ̀m mɛn, ko yɛn a yâng retîn pwat, ‘Tɛ́ o gwɔ̀m mot.’

⁹Ko retîn pwat o ra yang ɛn, ‘Sɛ̌ mê tik něy hom de be nɔng mɛ̀ bedagwi tanga bemat nerey, na me re negwɔm e ra yin a?’

¹⁰Batîn cɔ́gɔt o ba yâng retîn regwi, ‘Vey na hwo tɛ́ o gwɔ̀m mot.’

¹¹Ko retîn regwi o ra yang ɛn, ‘Sɛ̌ mê tik nèy hom de na tá de na to sé nerat, na me wɔ̀ re negwɔm e ra yin a?’

¹²Batîn cɔ́gɔt o ba to yâng retîn anap, ‘Vey na hwo tɛ́ o gwɔ̀m mot.’

¹³Ko retîn anap o ra yang ɛn, ‘Sɛ̌ mê tik nshî tá hom de ne tɛ̀ bedagwi na bemat be vɔk yey pyɛng, na me re negwɔm e ra yin a?’

¹⁴Mwa batîn cɔ́gɔt o ba yâng retîn serɔgɔ, ‘Vey na hwo tɛ́ o gwɔ̀m mot.’

¹⁵Ko retîn serɔgɔ mo ra yang ɛn, ‘Ka sede yin a sé ha mwin, yin e simo na me tɛ́ me gwɔ̀m min, ko tik na yin vey lɛrɛ hin e necam hom. Ko ka sede yin a simo ano wɛt, tik na kya he nusu yi e retîn serɔgɔ, na he re bagbɔng batîn cɔ́gɔt sida vê Lɛbanɔn.’ ”

¹⁶Yotam a re nuyel, a yang ɛn, “Sɛ̌ na yey min mwa de yin a ga tɛ̀ a Abimɛlɛk negwɔm mwin à wane arɛt? Sɛ̌ yin a tala a Gidɛyɔn na belɔ mɛ na pyɛ́ ryat à yane arɛt? Pyɛ de ya jam na yin tala mɛ tomong de a ga ra a yin à yane arɛt?

¹⁷Bare hin, da hom a tó como yaga yin, a ye waa a neken mɛ, yaga na a bin sey in mɛ̀ yi e vwɔ̂ BeMidyan.

¹⁸Ko yunung yin a ga tɛ́ in vê repugu lɔ da hom. Yin a ga mɔbɔs nèy mɛ kuru bataama beras o e ra gbondong hwak, ko yin a ga tɛ̀ a Abimɛlɛk de a tɔ̀ na hwā sam mɛ, negwɔm Shɛkɛm, yin a ra ano yaga yɛ a sé cang min.

¹⁹Ka sede pyɛ de yin a ra a Gidɛyɔn tanga belɔ mɛ ya sé tyɛng mwin, ko vɔk in yey pyɛng na Abimɛlɛk, ko tik na yɛ a vɔk yey pyɛng na yin arɔng.

²⁰Ko ka sede a sé ano wɛt, ko tik na kya he nusu yi na Abimɛlɛk na he re in, à yin bemât Shɛkɛm na Bet-Milo, ko tik na kya he nusu yi na yin bemât Shɛkɛm tanga bemât Bet-Milo na he re Abimɛlɛk arɔng.”

²¹Ano kwong, Yotam a tele a wɔ̀ lɛrɛ hɛ e Beer, yaga a wok bengyip gwa mɛ Abimɛlɛk, a wɔ̀ sangal e hwomo.

²²Abimɛlɛk a re negwɔm e ra Israyɛl neshey netat.

²³Dagwi kwong a tɛ̀ repugu e tê Abimɛlɛk na bemât Shɛkɛm, ko yɛn a kyɛ́ ɛn hɛ.

²⁴Hemo ha té ano yaga na be talâ Abimɛlɛk byɛ̂ nemî begwa mɛ nèy Gidɛyɔn kuru bataama beras de a mɔbɔs, na be talâ BeShɛkɛm arɔng byɛ mɛn de yɛn a sɛlɛ hɛ na a mɔbɔs begwa mɛ.

²⁵Bemât Shɛkɛm ba tɛ̀ repugu na Abimɛlɛk, ko ba tɛ̀ bemat e waba e ra beraku. Kawɛ mwat de a kwey e gwong gwane, ko ba vo ɛ, ba sey ɛ pyɛ́ mɛ. Ba wɔ̀ ha a Abimɛlɛk pyɛ́ yane.

²⁶Ko Gaal, hwêy Ɛbɛt, a sogo tanga begwa mɛ, ba wɛrɛn na sangal e Shɛkɛm, ko bemât Shɛkɛm kwong ba sey ɛ, ko ba tɛ̀ gap mɛn e ra yɛ.

²⁷Yɛn a wɔ́ e hey, yɛn a wɔ̀ vos nèy anap, yɛn a piri nɛ, yɛn a yong mɛ̀ nshî anap, ko yɛn a tula hɛn na be ra nzem. Yɛn a yel e lɔ̂ dagwî mɛn, yɛn a re ba sɔ, ko yɛn a dùsa Abimɛlɛk.

²⁸Gaal Ɛbɛt, a hwo ye, “E wǎ à Abimɛlɛk arɛt? Ko wot BeShɛkɛm, wot a sé yerê vivɛ̌ bemat o, na wot ra a yɛ fwom arɛt? E yɛ de a sé hwêy Gidɛyɔn, ko Zebul a sé gwɔ̀m como mɛ wɛt arɛt? Nduga yin ra a bemât bedabeda min Hamor yɛ dâ Shɛkɛm fwom.

²⁹Ka a sé me de ma sé mwât nuyêl bemat vemo, ka ma yâng pat Abimɛlɛk! Ma yâng yang ɛ, ‘Tula bemât como mō mwa, na hwo nusu mɛ̀, na wot man e dem como.’ ”

³⁰Jeng de Zebul, mwât nuyêl repomo mo, a wok pyɛ de Gaal Ɛbɛt a ha, shom ya sogo a yɛ sizɔng.

³¹Ko a tomo betom na ha e lɛrɛ vɔk na Abimɛlɛk wɔgɔ, “Di, Gaal Ɛbɛt tanga begwa mɛ ba ga vɛ̄ hɛn e Shɛkɛm, yɛn a sé tɔgɔs bemât repomo, na be kyɛ́ ɛn hwo.

³²Ano kwong, tik na hwo tanga bemat mō, yin sogo naturuk, na yin vey sangal e waba e regyéng.

³³Ko hwo sogo nagasi jeng de gwi gwa sé nusu, na yin yel e ji repomo mo. Ka sede Gaal tanga bemat mɛ yɛn a nusu, na be man gèy na yin, ko yin teshe na yɛn na yɛnɛ̂ gap min.”

³⁴Jeng de Abimɛlɛk a wok ano, a vɔk a sogo tanga mwa bemat mɛ, yɛn a wɔ̀ dyɛng e waba e bamâ repomo; yɛn a gas ɛn bagyeng o banaas.

³⁵Gaal a sogo nagasi, a wɔ tumal e rwi repomo, ko Abimɛlɛk na bemat mɛ ba sogo yi e nedem waba mɛn arɔng.

³⁶Jeng de Gaal a di bemat o, ko a yâng Zebul, “Di, bemat ba sé gyirik yi e ra tɛ̂t beraku!” Ko Zebul a yang ɛ, “Hwà di necam beta, ko hwà té mɛ̀ bemat a?”

³⁷Gaal a to yang ɛ, “Di, bemat ba sé gyirik yi e Tabur-Ɛrɛs wɔgɔ, e cwɛl, regyɛng o rehak a rane yi e bak cɔgɔ̂t ouk de be ra ɛ̀ vyoshon.”

³⁸Ano kwong Zebul a yang ɛ, “Dâk kaa mō hemo ma hɛ̌? Hwo de hwà tē, ‘Abimɛlɛk a sé wǎ de wot ê raa hɛ, na wot ra a yɛ fwom arɛt?’ Bemat a vemo de hwà ga byɛs vɛ. Nusu a remo, na hwo wɔ̀ man como mo na yɛn!”

³⁹Gaal a nusu e nuyêl bemât Shɛkɛm, yɛn a tó como na Abimɛlɛk.

⁴⁰Gaal kwong a tele, ko Abimɛlɛk a dopɛ e yɛ, bemat mɛ behak pyak ba tele, ba mǎ hɛn, ko ba ro ɛn vɔk e rwi repomo.

⁴¹Abimɛlɛk kwong a sangal e Aruma, ko Zebul a ro Gaal na begwa mɛ, yɛn a to tɔk sangal e hwomo wɛt.

⁴²Nusu hwol bemât Shɛkɛm ba nusu wɔ e cwɛl, ko bemât Abimɛlɛk ba wɔ̀ ha a yɛ.

⁴³Yɛ kwong a yong bemat mɛ, a gas ɛn bagyɛng batat, ko yɛn a wɔ̀ dyɛng e waba e cwɛl. Jeng de a di bemat ba sé nunus yi e rwi repomo, a vɔk a hwo e ra yɛn, ko a mɔbɔs hɛn.

⁴⁴Remo-remo Abimɛlɛk tanga regyɛng bemat de ba sé na yɛ ba wɔ̀ dul rwi repomo, ko bemât bagyɛng baba vere ba hwo e ra mwa bemat de ba sé e cwɛl, ba mɔbɔs vɛ.

⁴⁵Ko Abimɛlɛk a wosho e de tô como na repomo mo, a pere gang ɛ̀ gwi, a re rɛ, ko a mɔbɔs bemat o. A gangas repomo mo, a vɔk a bere nevwashe e barin o.

⁴⁶Jeng de bemât nuyêl tyɔ̌n Shɛkɛm ba wok ano, yɛn a vɔk ba yel e ji gbɔng kyet wo duk rê fongôl dagwi mɛn Baal-Berit na be lɛrɛ hɛn ɛ̀.

⁴⁷Abimɛlɛk a wok, bemât tyɔ̌n Shɛkɛm mwa ba ga wɔ tula hɛn e hwomo,

⁴⁸yɛ tanga mwa bemat mɛ ba kyè, ba wɔ̀ tut e Raku Zalmɔn. A jut tyem, a tara mɛ̀ lâng cɔgɔt, ko a gana hɛ e ra sanat mɛ. A yang bemat mɛ, be rá ziri na be ra tyɛng na pyɛ de yɛ a ga ra.

⁴⁹Kawɛ e ji mɛn a tara lâng cɔgɔt o mɛ́, yɛn a gansa nɛ, yɛn a raa hɛ mɛ̀, yɛn a wɔ̀ bang mɛ̀ rwi gbɔng kyet de bemat o ba lɛrɛ hɛn ɛ̀, yɛn a tɛ̀ kya, ko bemat o mwa ba kushu e ji mo. Ko mwa bemât tyɔ̌n Shɛkɛm arɔng ba kushu, nepyak vɛ na wul sede gu rining, beras na beha.

⁵⁰E bama mo, Abimɛlɛk a kwey vɔk e Tɛbɛs, a wɔ̀ gwɔrɔ repomo mo, ko a re rɛ.

⁵¹Gwotyɔ̌n gwohwak gwo gap gwa sé e ji rɛ, ko mwa bemât repomo mo, beras na beha tanga bemât nuyel mɛn ba tele, ba wɔ̀ yel e ji mo; yɛn a bang bato mɛn e hwomo, ko yɛn a tút vɔk e ragyip tyɔ̌n o.

⁵²Jeng de Abimɛlɛk a wɔ̂ hwo gwotyɔ̌n o na como, a wɔ́ bagat na rwi gwɛ, na a nára kya e gwɛ.

⁵³Ko hwā hwak a vɔ̀k a jut gbɔng vwɔ̂ fwa hwongo, a bomo hɛ mɛ̀ e rato, ko gwa pere wɔ̀ mɔrɔ gwokup rato mo.

⁵⁴Remo-remo Abimɛlɛk a yila wen de e toros a yɛ pyɛ̂ como mɛ, a yang ɛ, “Hwɔtɔ wal mō, na hwo mɔrɔ me mɛ̀, yaga na bemat be kwon ye, e hwā de a mɔrɔ mɛ.” Wen o a vɔk a luga Abimɛlɛk o, ko a pere ku.

⁵⁵Jeng de BeIsrayɛl ba di Abimɛlɛk a ga ku, ko kawɛ e ji mɛn a vɔk a kyè wɛrɛ.

⁵⁶Gwong a gwane de Dagwi a talâ Abimɛlɛk pyɔlɔ mɛ, yaga nengyas de a ra a da mɛ jeng de a mɔbɔs begwa mɛ kuru bataama.

⁵⁷Ano arɔng, Dagwi a tɛ̀ nengyas bemât Shɛkɛm na toyo e ra to mɛn. Ano kwong, hâ gawey de Yotam Gidɛyɔn, a ha e ra yɛn, ha sila hɛ.