Read berom 2 Yohana 1 Bible Online

2 Yohana 1 - berom bible

2 Yohana 1

¹Bwok-rwang gwomo yi e vwɔ̂ mwakûk ekilisiya, Vɔk na neng-gwɔ de Dagwi a kasa, tanga nèy mō. Ma tɛ̀ yey hom na yin mwin. A sé e me de ma tɛ̀ yey na yin zɔng wɛt ko a sé e mwa vemo de ba tɔk tsak há arɔng.

²Yaga tsak há mo ha sé e neyey mot, ko ha rɔda nàra na wot nesheneshey.

³Tik na Dagwi Da tanga Yɛsu Kristi, Hwey mɛ, be dura a wot nerat mɛn, na be tosho reyɔm mot, na be tɛ̀ yey mot ye dyɛng arɔng. Pyɛ́ yemo yê sè myot, wot de wot a tɔk tsak há, de wot a tɛ̀ yey na bemót arɔng.

⁴Ma vɔk yey pyɛng sizɔng jeng de ma di, nèy mō nehak na sé raa gwong de gwa sé tsak o, tyɛng sede remo de Dagwi Da á nɔng ot redu.

⁵Ko a remo, ma sé ra won na hwo, à neng-gwɔ, tik na wot mwa wot a tɛ̀ yey na bemót. Redu de ma sé jɛk a yin e ra rɛ ra sé repas o wɛt, ko ra sé redu de bá kana nɔng ot yimo e susu mo.

⁶Ka sede wot a tɛ̀ yey na Dagwi, ko hemo he dura wɔgɔ, e sangal mot e jey wot e gyeng badu mɛ. Ko redu remo de yin á kana wok yimo yi e susu mo ra sé wɔgɔ, yin dopse tɛ̀ yey na bemat.

⁷Di in, bemât kwɛlɛ̂ng bemat pyak ba ga yel e kahɛ kwɔn e jey, ko yɛn vane mo be kyɛ́ ɛn nà simo wɔgɔ, Yɛsu Kristi á vey e jey na rebêk mwasi. Kawɛ mwat de e ra ano a sé wo kwɛlɛ̂ng bemat, a to sé wo repugû Kristi.

⁸Yaga ano, tē in naka, yin kwon bidɛ kayɛ pyɛ de wot a ga kana ra fwom yaga yɛ. Ko cí in, na yin a ba sɛ̀ pyɔlɔ min mwa myak.

⁹Kawɛ mwat de e nàra e de raà pyɛ́ de Kristi a basa wɛt, ko a gwɛ̌ pyɛ cak e ra pyɛ́ mo e wuna nesa na Dagwi wɛt. Ko kawɛ mwat de e nàra e de raà pyɛ́ de Kristi a basa e wuna nesa na Dagwi Da tanga Hwey mɛ.

¹⁰Yaga ano, ka sede mwat hwak a vey na yin, ko a ha pyɛ́ cak detu na basa de Kristi á kana basa, ko yin sey ɛ e lɔ min wɛt, yin yang ɛ show na vey mwa arɔng wɛt.

¹¹Yaga yɛ de a yang ɛ show a ga ra gafiri na yɛ e ji râ tomong ves.

¹²Ma vɔk pyɛ́ cak pyak de me simo me ha a yin, ko me simo na me jɛk yɛ̄ e bwok-rwang wɛt. Ko ma sɛt yey hom, ma rɔda vey di in, na wot a ra há mo bayis na bayis e negya, yaga na wot a bin vɔk yey pyɛng sizɔng mwa hot.

¹³Nèy neng-gwɔ de a sé gwa mō, yɛ womo de Dagwi a kasa hɛ arɔng, ne tang o show.