Read berom Reto Fong Yohana 1 Bible Online

Reto Fong Yohana 1 - berom bible

Reto Fong Yohana 1

¹Bwok-basa gwomo gwa sé e ra pyɛ́ de Yɛsu Kristi a dura a besam Dagwi. Dagwi a tānga dura a yɛ pyɛ́ yemo mo, yaga na a bin tɛ̀ besam o, be tɔk pyɛ́ de ye ba té e jeng de ye kyè vey bagat. Ko Yɛsu Kristi a tomo tom-lagwi mɛ, na a wɔ̀ dura a Yohana, sam mɛ, pyɛ́ yemo mo.

²Yohana arɔng a ga ha e ra pyɛ̂ mwa de a ga di. A ha wɛshɛrɛk e ra hâ Dagwi de Yɛsu Kristi a dura, ha sé tsak o.

³Wo yey pyɛng a womo de e basa bwok-basa gwomo; vê yey pyɛng a vemo arɔng de be wet betong na neha nane mo de ne yís yi na Dagwi, na be to gyeng nɛ! Yaga jeng de pyɛ́ yemo mwa ya rɔda té ya ga vey lɛs.

⁴Bwok-basa gwomo yi e vwɔ hom Yohana, Vɔk na yin bemât be-ekilisiya betaama vemo de ba sé e ji sevwêl Asiya: Tik na Dagwi a dura a yin nerat mɛ, na a tɛ̀ yey min ye dyɛng. Yɛ womo de a sé a remo à kana sè a raane, ko e kyè vey. Tik na begabik betaama vê Dagwi de ba sé tumal e nuyêl gwofwa negwɔm mɛ,

⁵tanga Yɛsu Kristi de a sé mwât nuha de be tó yey na yɛ wɛt be nɔng in nerat mɛn, na be to tɛ̀ yey min ye dyɛng arɔng. Yɛsu Kristi a sé wo susu mo de a sene yi e reku, ko a to sé re negwɔm e ra mwa begbɔng begwɔ̀m jey. Yɛ a tɛ̀ yey mɛ na wot. Ko jeng de á ku, á shushu nemi mɛ, yaga na a vibis hot yi e banɛn mot.

⁶Á to tɛ̀ ot na wot a sè bemat de e re negwɔm e ra vɛ, na wot a to sè bepiris, yaga na wot a ra a Dagwi Da mɛ fwom. Tik na gbɔng nerey na reto be sè bemɛ gbak-gbak! Ano.

⁷Di in, a sé kyè vey e bale! Bemât mwa ba rɔda ba di ɛ, mwa na vemo de bá kana luga hɛ na bāra. Ko mwa yére bemat jey yɛn a rɔda ba tosho yaga yɛ. Ey, a rɔda sè ano! Ano.

⁸Darwey Dagwi Wo Retô Mwa e tē, “Ma sé Alfa na Omega.”[1] E yɛ de a sé a remo à kana sè a raane, ko e kyè vey.

⁹Ma sé gwà min Yohana, ko me tanga yin, wot a ga wuna nesa na Yɛsu. Yaga ano, me tanga yin, wot e sɔ reyɔm, wot e to niri, ko wot a rɔda sangal e ji Segwɔm Dagwi arɔng. Bá kana tik me e rezik rehak de be tâng rɛ, à Patmɔs, yaga ma kana shara a bemat hâ Dagwi, ko ma to ha a bemat há wɛshɛrɛk e ra Yɛsu arɔng.

¹⁰Á sè Tuk Wusal hak; Gabik Dagwi há sɛ̀ reto e ra me, ko ma hwo wok gbɔng fwɔ hwak e bama hom sede fwɔ̂ durum.

¹¹Gwá ye, “Jɛk e ji bwok-basa pyɛ́ de hwà sé di, na hwo tomo a be-ekilisiya betaama vê bapomô Ɛfɛsus, na Simirna, na Pɛrgamɔs, na Tiyatira, na Sardis, na Filadɛlfya, tanga Lawɔdikya.”

¹²Ma doyo na me di mwat de a sé ha na me, ko ma di pyɛ̂ tik bekywa-kya tyaama yê dyam shinang.

¹³Ma di sede mwasi a sé tumal e tê pyɛ́ yane mo. A tɛ̀ gworugu de gwa wɔ̀ wul bol mɛ, ko a rɔgɔs hɛ e ragey na toro de ba yong wɛ na dyam shinang.

¹⁴Setôt rato mɛ sa pɛngɛ pes sede toro pwɛng, ko yenêng bayis mɛ ya lolo sede kya.

¹⁵Bol mɛ ba nɛp sede dyam pama de ba ga rugut, ko ba ga to tugut yɛ na ye nɛp. Fwɔ mɛ gwa wus sede nshi de ne ta e gwɔrɔt.

¹⁶A vɔk netangacɛn netaama e vwɔ yege mɛ, ko wal wo bak bà de wa sé vootot wa nunus yi e nu mɛ. Bwang bayis mɛ arɔng gwa sé gbey sede gwi de gwo ta e tê-gwi.

¹⁷Jeng de ma di ɛ, ma gaba e cât bol mɛ sede mwat de a ga ku. Ko a tɛ̀ vwɔ yege mɛ e ra me, a ye, “Hwo vɔk bengyip wɛt! Ma sé wo susu mo na wo yɛnɛ mo.

¹⁸Ma sé womo de a vɔk neken. Ma kana ku, ko a remo, ma to vɔk neken gbak-gbak. Ma vɔk reto e ra reku tanga kwɔ̂n bevuvwel arɔng.

¹⁹Yaga ano, jɛk pyɛ́ yemo de hwà di wɔgɔ, pyɛ́ de ya sé té a remo na yēmo de ye ba té e nuyel.

²⁰Di, netangacɛn netaama de hwà sé di e vwɔ yege hom tanga pyɛ̂ tik bekywa-kya tyaama yê dyam shinang — nezɛɛt pyɛ́ yemo ma net ngan: Netangacɛn netaama na sé e tô betom-lagwi vê be-ekilisiya betaama mo, ko pyɛ̂ tik bekywa-kya ya sé e tô be-ekilisiya vane mo arɔng.”