Read berom Reto Fong Yohana 10 Bible Online

Reto Fong Yohana 10 - berom bible

Reto Fong Yohana 10

¹A vane ano, ma di tom-lagwi hwak de a vɔk gap hyiw, a sé gyirik yi e lagwi. Rele ra bang ɛ, ko shatong wa to sé e rwa rato mɛ. Bwang bayîs mɛ gwa nɛp sede gwi, ko bol mɛ arɔng ba sé sede lêm kya de ha sé rey o sede swesêk duk.

²A vɔk kebwok-basa de ba ga kana wunta kɛ e vwɔ mɛ. A tɛ̀ bwol yege mɛ e ra gworep ko gwô mwɛlɛng e ra vwel.

³Ko a dɛrɛ na gbɔng fwɔ de gwa lumla sede lulûm begukum. E bama de a ga dɛrɛ ano, ko begbara betaama ba simo na taksal arɔng.

⁴Ko e bamâ taksal mɛn o, ma simo na me jɛk pyɛ́ mo; ko ma wok fwɔ de gwa yi e lagwi, gwa ye, “Lɛrɛ pyɛ́ yane de begbara betaama vane mo ba ha! Hwo jɛk yɛ̄ wɛt.”

⁵Ko tom-lagwi de ma bɛrɛng e tumal e ra gworep tanga e ra vwel a nára vwɔ yege mɛ vɔk e lagwi.

⁶A hwo sira na rezâ Dagwi de a sé kwen gbak-gbak; e yɛ de à kana yong lagwi, na jey, tanga gworep, mwa na kayɛ pyɛ de ya sé e ji yɛ̄ arɔng. A ye, “Ba rɔda to be lashe jeng wɛt!

⁷Ko jeng de tom-lagwi wo netaama e ba pɛl durum o mwɛ, Dagwi a rɔda sila pyɛ neyaang mɛ de à ga kana yong, tyɛng sede remo de à ga kana ha a bemât fwom mɛ de bà sè bezarap mɛ.”

⁸Ko ma to wok fwɔ gwane de gwa kana ha na me yi e lagwi, gwa yang me gbak wɔgɔ, “Ci wɔ̀ jut kebwok-basa de ka sé pyot e vwɔ̂ tom-lagwi de a sé e tumal e ra gworep tanga e ra vwel.”

⁹Ma hwo wɔ na tom-lagwi o, ma yáng ɛ, a nɔng me kebwok-basa mo. Ko a yang me, “Nā, rē kɛ! Ka rɔda ta rɔkrɔk sede shok e nu mō, ko ka rɔda royo a hwo jim.”

¹⁰Ma sey kebwok-basa mo yi e vwɔ mɛ, ma re kɛ, ko ka ta rɔkrɔk sede shok e nu hom. Ko bama de ma wɔlɔk kɛ, ka tɛ̀ jim hom ya royo.

¹¹Ano arɔng ba yang me, “A sé gbing-gbing na hwo to ha neha de na yi na Dagwi e ra yére bemat jey pyak na yére bemasi pyak, e ra balem detidetu na begbɔng begwɔ̀m pyak arɔng.”