Read berom Reto Fong Yohana 11 Bible Online

Reto Fong Yohana 11 - berom bible

Reto Fong Yohana 11

¹E bama mo, ba nɔng me cwang de wa sé sede gwelê masâ nelis, ko ba yang me, “Sogo, na hwo wɔ̀ masa Gbɔng Duk Re Fongol wo Dagwi tanga kwɔn de be rangas ɛ̀ pyɛ́ vɔk na yɛ. To basa nepyak bemat de be re a Dagwi fongol e hwomo.

²Ko hwo kwon masa lalâ Gbɔng Duk Re Fongol o wɛt. Tik hɛ, yaga ba ga nɔ̂ng bemat de ba sé BeYuda wɛt kwɔn o, ko yɛn a rɔda bɔrɔs Repomô Jɛrɛ mo pɛl kuru banaas na vɛ ba (42).

³Ko ma rɔda tomo bemât nuha hom beba. Yɛn a rɔda tɛ̀ cɛ̂k rugu shī, ko yɛn ê zarap yi na Dagwi nepɔlɔ gu rining na naga beba na kuru batyiimin (1,260).”

⁴A sé e batîn regwi baba tanga bekywa-kya beba de be tumsal e nuyêl Darwey wo jey o de ba sé e tô bemât nuha beba vane mo.

⁵Ka sede mwat hwak e simo a mǎ hɛn, ko kya hê nunus yi e nenu mɛn, na he wey na bemât repugu mɛn o. A sé e gwong gwomo de ba rɔda mɔrɔ kawɛ mwat de e simo a mǎ hɛn.

⁶Yɛn a vɔk reto na be ro rwak nà rop e jeng de yɛn a sé shara há de yɛn a yi mɛ̀ na Dagwi. Yɛn a to vɔk reto e ra nshî mwa e jey, na be tɛ̀ nɛ ne tɛ́ ɛn nemi. Ko yɛn a vɔk reto arɔng na yɛn a tɛ̀ karɛ rezot e jey e kayɛ jeng de yɛn e simo.

⁷Ano kwong, yɛn a yɛnɛ sharâ há mɛn o, gwongyama gwomo de gwo nunus yi e revɔng sana yɛnɛ gwa rɔda hwo ɛn na yol. Gwô dal gap mɛn, ko gwô mɔbɔs hɛn arɔng.

⁸Bavin mɛn ba rɔda sè e hyok rey hê gbɔng repomo de bá kana kak ɛ̀ Darwey mɛn. Be tâng rɛ na gwɔrɔ-há, à Sɔdɔm kɛ Misra.

⁹Bemat behak yi e kayɛ yere bemat jey na kayɛ yere, yi e karɛ relem na kayɛ yerê bemasi ba rɔda bɛrɛng bavin mɛn o nepɔlɔ netat na rebit o, ko ba rɔda simo a yɛn na be lɛrɛ vɛ wɛt.

¹⁰Bemât jey ba rɔda vɔk yey pyɛng yaga rekû yɛn beba vane mo. Yɛn a rɔda ra nzem, ko bê tomsal a bemɛn na nenɔrɔ, yaga bemat beba vê zarap yi na Dagwi o bá kana vɛ̀sɛ na reyɔm sizɔng e ra bemasi.

¹¹E bamâ nepɔlɔ netat na rebit o mo, Dagwi a tɛ̀ nesong neken e ji mɛn. Yɛn a sogo e tumal, ko bengyip sizɔng ba hwo e ra mwa vane de ba di ɛn ano.

¹²Bezarap Dagwi beba mo ba wok gbɔng fwɔ yi e lagwi, gwa yang ɛn, “Tút in vey e ngamo!” Ko yɛn a hwo kyè vɔk e lagwi e ji rele e bayîs bemât repugu mɛn o.

¹³E ji jeng yane mo, vwel ha hwo digis na gap ding-ding, ko bak gwining e ji kuru wo repomo mo wa gaba. Bemat gu bataama (7,000) ba kushu, ko bwang bemat o ba tɛ̀ bengyip sizɔng, ko ba nɔ̂ng Dagwi wo lagwi nerey.

¹⁴Gbɔng gawey hê neba ha ga kwey a hane, ko gbɔng gawey hê netat ha sé kyè vey bagat!

¹⁵Ano kwong, tom-lagwi wo netaama a pɛl durum o mwɛ. Ko ba wok tɔ̀ hak de ba gbɔ e lagwi, ba ye, “Darwey mot tanga Mwat mɛ de a kása na a sey bemat, ba ga sey reto na be re negwɔm e ji jey, ko a rɔda re negwɔm o gbak-gbak.”

¹⁶Ko bemakuk kuru baba na vɛ benaas (24) de be sangsal e ra beta negwɔm mɛn e nuyêl Dagwi yɛn a gaba e nuyel mɛ, ko yɛn a re a yɛ fongol.

¹⁷Yɛn a ye, “À Darwey, Dagwi Wo Retô Mwa, hwo de hwà sé a remo, ko hwà kana sè a raane arɔng: Wot a feng a hwo, yaga hwà ga ra fwom na gbɔng reto mō, ko hwà ga hwo re negwɔm!

¹⁸Yére bemât jey bá kana vɔk shom na hwo, ko a remo, jeng shom mō ya ga pom. Jeng a yemo de hwà rɔda ra a bemat de ba ga kushu shɔt. Jeng a yemo arɔng de hwà rɔda talâ besam mō de ba sé bezarap mo pyɔlɔ mɛn, tanga mwa bemat mō de be sap o, kɛ yɛn a sé bemat besɛl o kɛ berey o ayi. Ko jeng a yemo de ba rɔda wey na mwa vemo de be wey na jey!”

¹⁹E bama mo, ba wunta Gbɔng Duk Re Fongol wo Dagwi de wa sé e lagwi. Ko ba di e ji wɛ Kundung Wuna-na-Sirâ Dagwi tanga bemat. Ko balêm kya ba hwo tabas, kwɔn o ha sila na rewɔng, ko gbara wa sǎ e de taksal; vwel ha digis, ko bècung fwala ba gabsa arɔng.