Read berom Reto Fong Yohana 12 Bible Online

Reto Fong Yohana 12 - berom bible

Reto Fong Yohana 12

¹Gbɔng pyɛ langat cak ya nusu yi e lagwi: Ba di hwā hwak de gwi gwa bang rebek mɛ sede a tɛ̀ rugu, ko a tumal e ra pwɛl. A to tɛ̀ kpîn negwɔm de ba yong wɛ na netangacɛn kuru na nɛ neba.

²Hwā mo a vɔk jim, ko a hwo dak sekun, a ririm yaga jîm tɔ ya kaba hɛ.

³Ko pyɛ langat o cak ya to nusu e lagwi o: Gwogbɔng gwalwel gwohwak gwoswinang o gwa nusu. Gwa vɔk bato bataama na ngɛngɛ kuru (10), ko gwa tɛ̀ bekpîn negwɔm e ra karɛ mo.

⁴Gwa paa bak gwining e ji betat wo netangacɛn yi e lagwi na rûm gwɛ, ko gwa bomos nɛ vey e jey. Gwa wɔ̀ tumal e nuyêl hwā de a sé kyè wɔ̀ tɔ, yaga na gwo bin re hwey mɛ mo jeng de a tɔ hɛ.

⁵Ko hwā mo a tɔ hwey wen. Hwey o ha rɔda vɔk gwele de ba yong na dyam, na he re negwɔm e ra mwa yére bemât jey. Ko ba pere ta hwey o vɔk e kwɔ̂n Dagwi na gwofwa negwɔm mɛ.

⁶Hwā mo a tele vɔk e hey, vɔk e kwɔn de Dagwi a ga kana yong yaga yɛ, na be bin bɛrɛng hɛ e hwomo nepɔlɔ gu rining na naga beba na kuru batyiimin (1,260).

⁷Ko como ya hwo sogo e lagwi. Gbɔng tom-lagwi de be tang ɛ, à Mikayɛl tanga betom mɛ ba tó como na gwalwel o. Gwalwel o tanga betom gwɛ ba toyo a yɛn mɛ̀ arɔng,

⁸ko betom-lagwi ba re ɛn. Ba to simo a yɛn na be gwɛ̌ sangal e lagwi o wɛt.

⁹Yaga ano, ba gang gwogbɔng gwalwel o vey e jey. E gwɛ, à gwɔ̄m de wà sè yimo raane, womo de be tâng wɛ, à gwɔ̀m cēng kɛ Shetan, de wo kwɛlsɛng bemât jêy mwa. Ba gang gwɛ vey e jey, mwa na betom gwɛ.

¹⁰Ano arɔng, ma wok gbɔng fwɔ hwak e lagwi, gwa ye, “A remo, Dagwi a ga sey ot! A remo, Dagwi a ga dura reto mɛ rê gbɔng gwɔ̀m! A remo, Mwat mɛ de a kasa na a sey bemat a hwo re negwɔm mɛ! Yaga ba ga gang Shetan yi e lagwi, yɛ de e dopse tumsal e nuyêl Dagwi mot, na a tɛ̀sɛ sekûn begwa mot nagwi na naturuk.

¹¹Ko begwa mot ba ga di wɛng e ra yɛ yi na retô nemî Ketyimit tanga yi na rehâ tsak o de yɛn á kana shara rɛ. Ko yɛn a simo na be nɔng neken mɛn, kɛ na be ku gbak.

¹²Yaga ano, tik na yey pyɛng ye sè e belagwi! Yin mwa vemo de yin a sé sangal e ji vɛ, vɔk in yey pyɛng arɔng! Ko gawey e ra vwel tanga e ra gworep, yaga gwɔ̀m cēng a ga gyirik vey na yin! A vɔk shom sizɔng, yaga a tɔk, jeng mɛ ya pɔl ɛ̀ tyɔng zɔng!”

¹³Sede gwalwel o gwa di, ba ga gang gwɛ vey e jey, gwa hwo ro hwā de á kana tɔ hwey wen hane mo.

¹⁴Ko ba nɔ̂ng hwā mo bafabak baba vê gwokim, yaga na a bin tele e gwi vɔk e kwɔ̂n lɛrɛ mɛ e ji hey. E kwɔn o, a rɔda hywit ɛ yi e vwɔ̂ gwɔ̄m o, ko ba rɔda bɛrɛng hɛ yaga neshey netat na rebit o.

¹⁵Ko gwɔ̄m o wa hwo tabas nshi yi e nû gwɛ sede rɔt e bamâ hwā mo, yaga na tɛmɛ-nshi mo ne bin rungta hɛ, ne kyè mɛ̀.

¹⁶Ko vwel ha vey sɛlɛ hwā mo, ha takla, ha sɔ tɛmɛ-nshi de gwalwel o gwa ga kana tabas yi e nû gwɛ.

¹⁷Ko gwalwel o gwa wok shom sizɔng na hwā mo, gwa vɔk gwa kyè wɔ̀ tó como na bwang nèy hwā mo. Nèy o na sé bemat de be gyeng badu Dagwi, ko yɛn e to nɔng nuha na yey mɛn mwa e ra tsak há de Yɛsu a dura a yɛn.

¹⁸Ko gwalwel o gwa wɔ̀ tumal e rekwogôm gworep.