Read berom Reto Fong Yohana 14 Bible Online

Reto Fong Yohana 14 - berom bible

Reto Fong Yohana 14

¹A vane ano, ma bɛrɛng, ko ma di Ketyimit e tumal e ra Raku Siyɔn. E hwomo tanga kɛ, ma to di bemat gu naga rining na gu kuru banaas na gu banaas (144,000) de ba ga kana jɛk rezâ kɛ tanga rezâ Dâ kɛ e batili mɛn.

²Ko ma wok fwɔ yi e lagwi de gwa wus sede nshi de ne ta e gwɔrɔt, ko gwa sé sede gbara de wo takla na gap sizɔng. Gwa to sé sede fwɔ̂ yōm de bemat be ra.

³Bemat o ba sé ra lwɛ̄lɛ pwas e nuyêl gwofwa negwɔm, na pyɛ́ cen o nyaas yane, tanga bemakuk vane mo. Vit a mwat hwak de a tɔk masa lwɛ̄lɛ mo sɛ̌ yɛn bemat gu naga rining na gu kuru banaas na gu banaas de ba ga viri hɛn yi e ji jey.

⁴A sé e yɛn de ba ga lashe bato mɛn na râ jɛ̀m wɛt; yɛn a ga tik bato mɛn jɛrɛ. Ko yɛn e dopse raa Ketyimit vɔk e kahɛ kwɔn de ke kyese ɛ̀. Ba ga vibis hɛn yi e ji bemât jey, ko yɛn a ga tɛ́ ɛn vê mɛsɛng de ba tik ɛn jaram yaga Dagwi na Ketyimit o arɔng.

⁵Yɛn a ga sang vɛ́ bɔs wɛt, ko vit a pyɛ cak vyes e ra yɛn arɔng.

⁶E bama mo, ma to di tom-lagwi hwak de a sé tele e gwi. A vɔk Yɛgɛt Yat yê neshey gbak-gbak na a bin ha a bemat de ba sé sangal e ji jey yɛ̄, vemo de ba sé yi e kayɛ yerê bemasi na kayɛ yere jining, yi e karɛ relem na kayɛ yere bemat jey arɔng.

⁷A hanat na gbɔng fwɔ, a ye, “Sap in Dagwi, na yin a somo gbɔng nerey mɛ! Yaga jeng de a rɔda ra a bemasi shɔt ya ga vey. Ré in a yɛ fongol, yɛ de à kana yong lagwi, na jey, na gworep, na lel nshi mwa!”

⁸Tom-lagwi o wo neba a raa wo mɛsɛng o, a ye, “Gbɔng repomô Babilɔn ra ga gaba! Ey, ra ga gaba! Repomo ma rane de rá kana tɛ̀sɛ mwa yére bemat jey be sɔ nshî anap rɛ̄. E nshî anap o de ná tɛ̀sɛ hɛn, be raa rɛ̄ e de vɔk cwey pyɛ́ vyes na râ nejwang arɔng!”

⁹Tom-lagwi o wo netat a to raa vê mɛsɛng o beba vane, ko a hanat na gbɔng fwɔ, a ye, “Kawɛ mwat de e re a gwongyama mo tanga pyɛ de ba yong sede gwɛ fongol, ko e to simo be jɛk a yɛ jɔt gwɛ e retili kɛ e vwɔ yege mɛ,

¹⁰yɛ arɔng a rɔda di gbɔng shôm Dagwi. Shom o ya rɔda sè sede nshî anap ne gap de Dagwi a tɛ̀ mwat o a sɔ gbing-gbing. Ko a rɔda di rezot e ji kya tanga kyâ negang e nuyêl betom-lagwi vê jɛrɛ tanga Ketyimit arɔng.

¹¹Sekyêng kya de he nɔng ɛn rezot o ha rɔda dopse nunus gbak-gbak. Ko mwa vemo de be re a gwongyama mo tanga pyɛ de ba yong sede gwɛ fongol, vemo de ba jɛk a yɛn jɔt rezâ gwɛ, yɛn a rɔda pɔnglɔ yi e reyɔm mɛn o wɛt nagwi na naturuk rining o.”

¹²E jeng a yane de ya sé tyɛng na bemât Dagwi be niri. Yɛn a sé vemo de be gyenges badu mɛ, ko be raa Yɛsu na yey mɛn mwa.

¹³Ko ma to wok fwɔ yi e lagwi, gwa ye, “Jɛk pyɛ yemo ngan: Vê yey pyɛng a vemo de ba rɔda kushu e ngamo nuyel e ji fwom de ba sé ra a Darwey!” Ko Gabik Dagwi ha ye, “Ey! Yɛn a rɔda wok netâ pɔnglɔ yi e fwom mɛn de gwa sé gbang, yaga tomong mɛn ba sé raa hɛn.”

¹⁴Ano arɔng, ma bɛrɛng, ko ma di rele repɛng, ma to di sede mwasi de a sé sangal e ra rɛ. A tɛ̀ kpîn negwɔm de ba yong na dyam shinang e rato mɛ, ko a vɔk gwobwa bwal de gwo re e vwɔ mɛ.

¹⁵Ko tom-lagwi hwak a nusu yi e Gbɔng Duk Re Fongol. A sé yishi mwat de a sé sangal e ra rele mo na gbɔng fwɔ, a yang ɛ, “Jut gwobwa bwal mō, na hwo yɛt mɛ̀ bwal o, yaga jeng bwal ya ga vey. Bwâl jey gwa ga vel naka.”

¹⁶Ko yɛ de a sé sangal e ra rele mo a nára gwobwa bwal mɛ e ra jey, ko ba yɛt mɛ̀ pyɛ̂ jey o mwa.

¹⁷Tom-lagwi o hwak a to nusu yi e Gbɔng Duk Re Fongol e lagwi; yɛ arɔng a vɔk gwobwa bwal de gwo re.

¹⁸Ko tom-lagwi o hwak a yi e gàgbang rangâs pyɛ́ vɔk na Dagwi. E yɛ de e bɛrɛng kyâ kwɔn o. A hwo dɛrɛ tom-lagwi de a vɔk gwobwa bwal de gwo re, a yâng ɛ, “Jut gwobwâ bwal mō de gwo re, na hwo yɛt mɛ̀ vɔ nèy cɔ́gɔt anap de na sé e jey, yaga nèy o na ga vel!”

¹⁹Tom-lagwi o a hwo nára gwobwâ bwal mɛ e ra jey, ko a yɛt mɛ̀ nèy anap mwa de na sé e ji yɛ̄. A bomos nɛ e ji revɔng de be farang ɛ̀ nèy anap o; revɔng o ra sé e tô gbɔng shôm Dagwi.

²⁰Ko revɔng o ra sé e bamâ repomo. Ba farang nèy anap o, ko nemi na tele yi e revɔng o sede gwɔrɔt: Neciwil o na sé sede bol tungun, ko nelis o na wul lyōsho naga betat (300).