Read berom Reto Fong Yohana 15 Bible Online

Reto Fong Yohana 15 - berom bible

Reto Fong Yohana 15

¹Ano arɔng, ma to di pyɛ cak e lagwi de ya sé ryey o, ko ya to sé pyɛ langat sizɔng. Ma di betom-lagwi betaama de ba vɔk nezap rezot netaama. Rezot o, rɛ à rê yɛnɛ mo, yaga e bamâ rɛ kwong shôm Dagwi ya rɔda yɛnɛ hɛ arɔng.

²Ma to di pyɛ cak de ya sé sede gworep de ba yong gwɛ na gyilâs, ko a sé sede kya ha lolo e ji gwɛ. Ko ma di bemat de bá kana di wɛng e ra gwongyama gwane mo, na e ra pyɛ de bá kana yong sede gwɛ, tanga e ra lamba wo rezâ gwɛ. Ba sé tumal e vwarâ gworep gyilâs o, ko yɛn a vɔk yōm e vɔ mɛn de Dagwi a nɔng ɛn.

³Yɛn a sé ra lwɛ̄lɛ de Mose, sam Dagwi, à kana ra tanga lwɛ̄lɛ̂ Ketyimit arɔng, yɛn a ye, “À Darwey, Dagwi Wo Retô Mwa! Tomong mō ba sé rey o, ba to sé pyɛ langat ding-ding. À hwo Gbɔng Gwɔ̀m mwa yére bemat jey! Begwong mō ba sé cik, ba sé vê tsak o arɔng.

⁴À Darwey, e wǎ de a rɔda wok bengyip mō wɛt arɛt? E wǎ de a rɔda nɔ̂ng reza mō nerey wɛt ɛ? E hwo nju mō zɔng de hwà sé jɛrɛ. Mwa yére bemat jey ya rɔda vey, na ye re a hwo fongol, yaga bemât mwa ba ga di tomong mō de ba sé cik.”

⁵E bamâ pyɛ yane, ma di Gbɔng Duk Re Fongol de wa sé pyot e hwomo e ji lagwi, ko buk de gwa dura, Dagwi a sé e hwomo gwa sé e ji mo.

⁶Ko betom-lagwi betaama de ba vɔk rezot taama ba nusu yi e Gbɔng Duk Re Fongol o. Ba tɛ̀sɛ berugu bepɛng jɛkjɛk de ba nɛp, ko ba rɔgɔs hɛn e beragey mɛn na betoro de ba yong na dyam shinang.

⁷Ko cak e ji pyɛ́ cen nyaas yane ya nɔ̂ng betom-lagwi betaama mo neshǐ netaama. Ba ga sila nɛ na shôm Dagwi, yɛ de a vɔk neken gbak-gbak.

⁸Gbɔng Duk Re Fongol o wa sila na sekyeng de sa yís yi na gbɔng nerey tanga retô Dagwi. Vit a mwat de a tɔk yel e ji wɛ sɛ̌ jeng de rezot taama rane de betom-lagwi betaama mo ba vey mɛ̀ ra kwey e ngyen.