Read berom Reto Fong Yohana 16 Bible Online

Reto Fong Yohana 16 - berom bible

Reto Fong Yohana 16

¹A vane ano, ma wok gbɔng fwɔ hwak yi e Gbɔng Duk Re Fongol, gwa yâng betom-lagwi betaama mo, “Kyè in, na yin a wɔ̀ lusha e ra jey pyɛ́ de ya sila neshǐ netaama de ye dura shôm Dagwi!”

²Tom-lagwi wo mɛsɛng o a hwo kyè, a losho pyɛ de ya sé e ji shǐ mɛ e ra vwel, ko bebweykanang beves de ba royo tyɔng wɛt ba hwo e ra mwa vemo de bá kana jɛk jɔt gwongyama mo e ra yɛn, vemo de ba re a pyɛ de ba yong sede gwɛ fongol.

³E bama mo, tom-lagwi wo neba a losho pyɛ de ya sé e ji shǐ mɛ e ra gworep, ko nshî gwɛ na wɔ̀ tɛ́ ɛn sede nemî mwat de a ga ku. Ko kayɛ pyɛ cen de ya sé e gworep o ya ku.

⁴Ano arɔng, tom-lagwi wo netat a losho pyɛ de ya sé e ji shǐ mɛ e ra nerɔt tanga lel nshi, ko mwa na tɛ́ ɛn nemi.

⁵Ko ma wok tom-lagwi de e bɛrɛng nshi a ye, “À hwo Wo Jɛrɛ! Hwo de hwà sé a remo, ko hwà kana sè a raane! Hwà gas badu e tē e ji shɔ̄t yemo mo.

⁶Yɛn a ga lusha nemî bemat de be raa hwo tanga ne bezarap mo, ko hwà ga nɔng ɛn nemi na yɛn a sɔ arɔng. A sé ano de ba sé tala hɛn, yaga pyɛ de yɛn a ra!”

⁷Ko ma to wok fwɔ yi e gàgbang rangâs pyɛ́ vɔk na Dagwi, gwa ye, “À Darwey, Dagwi Wo Retô Mwa! Yɛ̂t shɔ̄t mō ha sé tsak o, ko hwó gas yɛ̄ e tē arɔng!”

⁸Ko tom-lagwi wo nenaas a losho pyɛ de ya sé e ji shǐ mɛ e ra gwi, ko ba simo a gwi o na gwo rangas bemat na nepêp kyâ gwɛ.

⁹Kyâ gwɛ mo ha re bemat ding-ding, ko yɛn a dùsa rezâ Dagwi, yɛ de a vɔk reto e ra nezap rezot nemo mo. Ko mwa ano, yɛn a kyɛ́ ɛn nà doyo yi e banɛn mɛn na yɛn a nɔng ɛ nerey.

¹⁰E bama mo, tom-lagwi wo netungun a losho pyɛ de ya sé e ji shǐ mɛ e ra gwofwa negwɔm gwongyama mo, ko lwīl gwa hwo e ra neyɛnɛ̂ segwɔm gwɛ. Bemat ba hwo roros balem mɛn yaga nepyak royo de yɛn e ririm mɛ̀.

¹¹Yɛn a dùsa Dagwi wo lagwi yaga nepyak royo mɛn o tanga ne bebweikanang o arɔng. Ko mwa ano, yɛn a kyɛ́ ɛn nà doyo yi e begwong beves mɛn.

¹²Ano arɔng, tom-lagwi wo netyiimin a losho pyɛ de ya sé e ji shǐ mɛ e ra Gwɔrɔt Ɛifaratɛs. Nshî gwɔrɔt o na ye jɔng, yaga na begbɔng begwɔ̀m de ba rɔda yi e rak be bin sɛ̀ gwông kwey.

¹³Ko ma di cēng tyat de ya sé sede bebót. Ya sé nunus yi e nenu gwalwel o, na gwongyama mo, na zarap Dagwi wo bɔs.

¹⁴Cēng o ye yís yi na Shetan, ko ye ragas pyɛ̂ bes arɔng. Ye kyě kyè na begbɔng begwɔ̀m jêy mwa na ye wuna hɛn, na be bin tó como e gbɔng tûk Dagwi Wo Retô Mwa.

¹⁵Ko Yɛsu a ye, “Ma sé kyè vey sede gbik! Wo yey pyɛng a womo de e bɛɛ nekanang, na a gyeng berugu mɛ e vwâ gwóng mɛ, yaga na a kwon kyè warap wɛt! Yɛ a rɔda vo rekyên bemat arɔng wɛt.”

¹⁶Ko cēng o ya tula begbɔng begwɔ̀m o mwa e kwɔn hak de be tâng hɛ na relêm BeIbrani, à Harmagɛdɔn.

¹⁷E bama mo, tom-lagwi wo netaama a losho pyɛ de ya sé e ji shǐ mɛ e gul, ko gbɔng fwɔ gwa nusu yi e kwɔ̂n gwofwa negwɔm de gwa sé e Gbɔng Duk Re Fongol, gwa ye, “Ba ga yɛnɛ!”

¹⁸Ko balêm kya ba hwo tabas, kwɔn o ha sila na rewɔng, gbara wa sǎ e de taksal, ko vwel ha digis sizɔng. Yerê digis o ba ga kyɛm be ra hɛ wɛt yimo de bemasi bà hwo sangal e ji jey yemo. Digis o ha dal kahɛ mo na neves!

¹⁹Gbɔng repomo mo ra cɛgɛt hɛ zang tat, ko bapomo vê kayɛ yerê bemat jey ba gabsa. Dagwi a bare na gbɔng repomô Babilɔn arɔng, ko gbɔng shom mɛ ya hwo e ra rɛ. Shom o ya rɔda sè sede nshî anap de ne reneng, nemo de Dagwi ê tɛ̀ rɛ, re sɔ gbing-gbing.

²⁰Ko karɛ rezik ra ye bit, ba to di beraku arɔng wɛt.

²¹Bègbɔng bècung fwala de kagwɛ mo gwa sé sede kilo kuru batungun (50) ba gabsa e ra tɛ̂t bemat yi e lagwi. Ko bemat ba dùsa Dagwi yaga gbɔng reyɔ̂m fwala mo de ra sé pyɛ bengyip sizɔng.