Read berom Reto Fong Yohana 17 Bible Online

Reto Fong Yohana 17 - berom bible

Reto Fong Yohana 17

¹E bama mo, hwak e ji betom-lagwi betaama de ba vɔk neshǐ netaama mo a vey, ko a yang me, “Vey na me dura a hwo gwong de ba rɔda tabak mɛ̀ gbɔng devwes, de a sé e tô gbɔng repomo de ba lɔk rɛ bagat na nerɔt pyak.

²Begbɔng begwɔ̀m jey ba ga ragas nejwang na yɛ. Mwa bemât jey arɔng ba ga ra nejwang na yɛ na cilis, sede bemat de ba ga feng nshî anap.”

³Gabik Dagwi ha sɛ̀ reto e ra me, ko tom-lagwi o a jut me vɔk e hey. E hwomo, ma di hwā hwak de a sé sangal e ra gwongyama gwoswinang o zoyong. Bá kana jɛk baza de ba lashe rezâ Dagwi e ra rebêk gwɛ mwa. Gwongyama mo gwa vɔk bato bataama na ngɛngɛ kuru (10).

⁴Hwā mo a tɔrɔ hɛ na berugû dyām pyak de ba sé zwey, ko behak ba senge zoyong. A to tɔrɔ hɛ na pyɛ̂ dyam shinang, na cak de ba yong na dyéngere ryat sizɔng, na cak yê beta berat sedesi. A vɔk e vwɔ mɛ keshi kehak de ba yong na dyam shinang, ko ba sila kɛ na pyɛ́ de ya sé byɛm-byɛm tanga pyɛ́ de ya sé gbiridik, de ya yi e ragâs nejwang mɛ mo.

⁵Bá kana jɛk e retili mɛ reza rehak de cap-hâ rɛ ya sé e lɛrɛ wɔgɔ, “Gbɔng Babilɔn, nêng bedebeves na wo kayɛ pyɛ de ya sé byɛm-byɛm e jey.”

⁶Ko ma di, hwā mo a ga feng na nemî bemât Dagwi, a ga to feng na nemî bemat de ba ga mɔbɔs, yaga yɛn a nɔng nuha e ra Yɛsu. Jeng de ma di hwā mo, ma langat me sizɔng.

⁷Ko tom-lagwi o a yang me, “Yaga sɛ́ de hwó langat hwo arɛt? Tik na me ha a hwo cap-há de ya sé e lɛrɛ e ra hwā mó tanga e ra gwongyama de e lagsa gwɛ, de gwa vɔk bato bataama tanga ngɛngɛ kuru.

⁸Gwongyama de hwá bɛrɛng o gwa kana sè na neken a raane, ko gwa to sé gwokwen a remo wɛt. Gwa vey bagat wɔ̀ nusu yi e revɔng de ra vɔk yɛnɛ wɛt, ko gwô wɔ e kwɔn de bê wey na gwɛ. Bemât jey de yimo yi e susû jey, ba ga jɛk ɛn wɛt e ji bwok-basa de be jɛkɛs ɛ̀ bazâ vemo de ba vɔk neken, mwa hɛn yɛn a rɔda langat hɛn jeng de yɛn ê di gwongyama mo. Yaga gwa kana sè na neken a raane, gwa to sé gwokwen a remo wɛt, ko gwa rɔda ba toyo.

⁹“E jeng a yemo de ya sé tyɛng na bemat be vɔk tɔ́k na netsitsɛng e ra pyɛ́ yemo. Bato bataama mo ba sé e tô berahwol betaama de hwā mo a sé sangal e ra vɛ. Ba to sé e tô begbɔng begwɔ̀m betaama arɔng.

¹⁰Ba ga paa betungun e ji vɛ yi e negwɔm mɛn, gwining a rɔngɔl e ji nɛ, ko gwining o a rɔngɔl nà vey e ngyen. Ko jeng de a rɔda vey, a sé gbing-gbing na a re negwɔm yaga jeng tyɔng zɔng.

¹¹Gwongyama de gwa kana sè na neken a raane, ko gwa to sé gwokwen a remo wɛt, e gwɛ de gwa sé gbɔng gwɔ̀m wo rwit. Gwa sé e ji begbɔng begwɔ̀m betaama vane, ko gwô wɔ e kwɔn de bê wey na gwɛ.

¹²“Ngɛngɛ kuru de hwá di ba sé e tô begbɔng begwɔ̀m kuru de ba ga hwo re negwɔm e ngyen wɛt. Ko ba rɔda nɔng ɛn reto na yɛn a re negwɔm tanga gwongyama mo yaga dyam gwi jining zɔng.

¹³Mwa yɛn kuru mo ba vɔk báre mɛn yerê hining o, ko yɛn ê jut reto mɛn na negwɔm mɛn, be nɔ̂ng gwongyama mo.

¹⁴Yɛn a rɔda tó como na Ketyimit. Ko Ketyimit o tanga bemât kɛ de ka ga yila hɛn, ko ka to kasa hɛn, vemo de be raa kɛ na yey mɛn mwa ka rɔda re ɛn, yaga e kɛ de ka sé Darwêy bedaberey mwa tanga Gbɔng Gwɔ̀m begbɔng begwɔ̀m mwa.”

¹⁵Ko tom-lagwi o a to yang me, “Hwà ga di mwa nshi nane de devwes e sangsal e vwarâ nɛ. Nshi mo na sé e tô bagyɛng bemat, na yére bemat jey, na yére bemasi, tanga bemât balem detidetu.

¹⁶Ko ngɛngɛ kuru de hwá di tanga gwongyama mo ba rɔda bɛrɛng devwes o ves tyɔng wɛt. Yɛn a rɔda hashe kayɛ pyɛ de a vɔk na be tik ɛ warap. Yɛn a rɔda re banamâ rebek mɛ, ko bê dak ɛ̀ kya e ra yɛ.

¹⁷Yaga Dagwi a tɛ̀ e ji neyey mɛn, na yɛn a ra pyɛ de yɛ à ga kana yong gyam. Bê ra ano na báre mɛn hining, na be jut reto mɛn rê rê negwɔm, yaga na be nɔ̂ng gwongyama mo rɛ vɔk e jeng de neha de Dagwi a ha nà sila.

¹⁸“Hwā de hwá di mo a sé e tô gbɔng repomo de ré re negwɔm e ra begbɔng begwɔ̀m jey.”