Read berom Reto Fong Yohana 18 Bible Online

Reto Fong Yohana 18 - berom bible

Reto Fong Yohana 18

¹E bamâ pyɛ yane, ma to di tom-lagwi hwak de a sé gyirik yi e lagwi. A vɔk reto sedesi, ko nedyɛt gbɔng nerât mɛ na tɛ̀ jey ya sè wɛshɛrɛk.

²Ko a tɛ̀ sekun na gbɔng fwɔ, a ye, “Gbɔng repomô Babilɔn ra ga gaba! Ey, ra ga gaba! Ra ga tɛ́ ɛ kwɔ̂n sangâl cēng tanga begabik beves. Kayɛ yerê gwonon gwovwes de be kyɛ́ ɛn gwɛ gwa sé e hwomo.

³Yaga mwa yére bemat jey ya ga sɔ nshî anap rɛ. E nshî anap o de na tɛ̀sɛ hɛn, be raa rɛ e de vɔk cwey pyɛ́ vyes na râ nejwang. Begbɔng begwɔ̀m jey ba ga ragas nejwang na rɛ arɔng; ko begbɔng bejik jey ba ga tɛ́ ɛn bedaberey yi na pyɛ̂ netâ jey de re tē mɛ̀ shɛrɛk.”

⁴Ko ma to wok fwɔ mo hwak yi e lagwi, gwa ye, “À bemat hom, nusu hin yi e repomo mo, na yin a tɛ̀ vɔ min e ji ragâs banɛ̂n rɛ wɛt, na yin a yel e ji rezot ves tanga rɛ arɔng wɛt!

⁵Yaga banɛ̂n rɛ ba ga tula hɛn pyak, sede ba rɔda wɔ̀ wul lagwi, ko Dagwi a bare na pyɛ́ vyes de ra ga ragas.

⁶Rá in a rɛ tyɛng na pyɛ de ra ga ra a yin arɔng, tala hin rɛ neves de ra ga ra a yin zang ba. Nɔng in rɛ e ji keshi nshî anap de na dal nane de rá kana nɔng in na gap zang ba.

⁷Tak in a rɛ reyɔm, na yin a lashe a rɛ yey, tik na nepyak reyɔm o ne sè tyɛng na nepyak nerey tanga pyɛ̂ netâ jey de ra ga nɔ̂ng tô rɛ. Yaga re dopse tâng tô rɛ, ‘Ma sé gbɔng gwɔ̀m e sangal hom hemo! Ma sé kuma wɛt, ko pyɛ cak ya rɔda nɔng me lashê yey wɛt!’

⁸Yaga ano, gbɔng rezot ra rɔda hwo e ra rɛ tuk hining, rɛ à reku, na lashê yey, tanga vyong. Ko ba rɔda rangas rɛ na kya, yaga Darwey, Dagwi de e ra a rɛ shɔt, a vɔk retô mwa.”

⁹Jeng de begbɔng begwɔ̀m jey, de ba ga ragas nejwang na rɛ, ko ba to re pyɛ̂ netâ jey mɛn tanga rɛ ba rɔda di sekyêng kya de ha sé re rɛ, ba rɔda tosho na dâk sekun yaga rɛ.

¹⁰Bengyip reyɔ̂m kya mo ba rɔda vo ɛn sizɔng, ko yɛn a rɔda tumal yikyik, be tē, “Yaa kukuuk! Yaa kukuuk! À hwo gbɔng repomô Babilɔn de hwá kana vɔk reto! E ji dyam gwi jining zɔng de tabak mō ha ga pe vey!”

¹¹Ko begbɔng bejik jey arɔng bê tosho, bê to lashe neyey mɛn yaga repomo mo, yaga vit a mwat de ê sey pyɛ̂ rɛsɛl mɛn,

¹²yɛ̄ à dyam shinang, na dyam pyɛng, na dyéngere ryat sizɔng, na beta berat sedesi; yɛ̄ à berugû dyām pyak yerê vemo de be pɛngɛ pes, na vemo de ba sé zwey, na vemo de ba sé besinang zoyong, tanga silikyi arɔng; yɛ̄ à kayɛ yerê cɔ́gɔt de ya vɔk nesang hyɔɔlɔl, tanga pyɛ́ detidetu de ba tsep na yìn gbin, na cɔ́gɔt ryat yê dyām pyak, mwa na yēmo de ba yong na dyam, na dyam shì, tanga beta lɔk de be nɛp.

¹³Ko vit a mwat de ê sey nedirî pyɛ́ mɛn de na vɔk nesang nerat sede sinamɔn, na pyɛ nesang hyɔɔlɔl, na mir, tanga firankinsɛn; vit a mwat de ê sey nshî anap mɛn, na něy, na nemuk nerat, tanga alkama; na berɔndɔng, na tyimit, na bedwa, tanga bekyɛkyɛ̂ bedwa, mwa na bemasi de ba sé besam.

¹⁴Ko begbɔng bejik o bê yâng rɛ, “Hwà ga bidɛ pyɛ́ ryat de hwá kana vɔk cwey yɛ̄. Yas mō arɔng tanga pyɛ́ de hwá tɔrɔ hwo mɛ̀ mwa ya ga wey, ko hwà rɔda tɔk to ba sɛ̀ yɛ̄ wɛt!”

¹⁵Begbɔng bejik de bá sɛ̀ yas yi na ragâs byɛ e ji repomo mo ba rɔda tumal yikyik yi na rɛ, yaga yɛn ê vo bengyip reyɔm de ra sé sɔ. Yɛn a rɔda tosho, ko bê lashe neyey mɛn,

¹⁶ba rɔda ye, “Yaa kukuuk! Gawey e ra gbɔng repomo remo! Ra sé sede hwā de a tɔrɔ hɛ na berugû dyām pyak yerê vemo de ba pɛngɛ pes, na vemo de ba sé zwey, tanga vemo de ba sé besinang zoyong. A to tɔrɔ hɛ na pyɛ̂ dyam shinang, na cak de ba yong na dyéngere ryat sizɔng, na yê beta berat sedesi!

¹⁷Ko e ji dyam gwi jining zɔng mwa pyɛ̂ nedanerey yemo ya ga vɔ ye wey!” Mwa bedâ bedwa-nshi, na bemât lagsa vɛ, na bemât fwôm vɛ, tanga mwa vemo de be kyě kyè e ji vɛ e de ragâs nejik mɛn ba tumal yikyik.

¹⁸Jeng de ba di sekyêng kya de ha sé re repomo mo, ba dak sekun, ba ye, “Vit a repomo rehak de ra rɔda wul repomo remo!”

¹⁹Yɛn a vɛ́sɛ nefongol, ba shusha e bato mɛn, ko ba tosho tyɔng wɛt, ba lashe neyey mɛn, ba ye, “Yaa kukuuk! Gawey e ra gbɔng repomo remo! Kavɛ bemat de ba vɔk bedwa-nshi ba tɛ̀ yas yi na nepyak yas rɛ! Ko e ji dyam gwi jining zɔng repomo mo ra ga vɔ re wey!

²⁰Mwa yin de yin a sé e ji lagwi, vɔk in yey pyɛng, yaga ba ga wey na repomo rane mo! Ko yin bemât Dagwi, na yin betom mɛ, na yin bezarap mɛ, vɔk in yey pyɛng arɔng! Dagwi a ga ra a rɛ shɔt, yaga pyɛ de ra ga ra a yin!”

²¹E bama mo, tom-lagwi hwak de a vɔk gap hyiw a jut gwofwa gwohwak de gwa sé sede gbɔng gwofwa hwongo. A barak gwɛ e ji gworep, a ye, “A sé ano de ba rɔda barak gbɔng repomô Babilɔn na gap, ko ba rɔda to di rɛ wɛt!

²²À Babilɔn, bê to wok lwɛ̄lɛ yōm, kɛ gwô nu, kɛ gwô jū, kɛ gwô bedurum e ji mō ko tyɔng wɛt! Bê to sɛ̀ mwât râ kagwɛ fwôm vwɔ e ji mō ko tyɔng wɛt. Ko bê to wok fwɔ̂ gwofwa hwongo e ji mō ko tyɔng arɔng wɛt.

²³Bê to di negbêy kywa-kya e ji mō ko tyɔng wɛt, ko bê to wok fwɔ̂ rwâs-gwel na gwô gwel e ji mō ko tyɔng arɔng wɛt. Bejik mō bá kana sè begbɔng bemât jêy mwa, ko hwá kwɛlɛng mwa yére bemat jey na vyoshon mō ye bɔs!

²⁴Ba shushu nemî bezarap Dagwi tanga nè bemât Dagwi e ji repomo mó. Nemî bemât mwa de bá kana mɔbɔs e ji jey na sé e ratô rɛ.”