Read berom Reto Fong Yohana 19 Bible Online

Reto Fong Yohana 19 - berom bible

Reto Fong Yohana 19

¹E bamâ pyɛ́ yane, ma wok pyɛ cak sede rewɔ̂ng gbɔng regyɛng bemat e lagwi, ra ye, “Haleluya, somo hin Dagwi! E yɛ de a ga sey ot, ko e yɛ de a vɔk gbɔng nerey na reto!

²Yɛ̂t shɔ̄t mɛ ha sé tsak o, ko e gas yɛ̄ e tē. A ga yɛrɛ a gbɔng devwes shɔt, womo de a lashe jey na nejwang mɛ; Dagwi a ga tala hɛ yaga besam mɛ de a mɔbɔs.”

³Ko yɛn a to gbɔ, ba ye, “Haleluya, somo hin Dagwi! Sekyêng kya de he re gbɔng repomo mo sé turus vɔk e rak o gbak-gbak!”

⁴Bemakuk kuru baba na vɛ benaas (24) tanga pyɛ́ cen nyaas o ba gaba e vwel, ko ba re a Dagwi fongol, yɛ de a sé sangal e ra gwofwa negwɔm, ba ye, “Ano! Somo hin Dagwi!”

⁵Ko ma wok fwɔ de gwa nusu yi e kwɔ̂n gwofwa negwɔm, gwa ye, “À yin besam Dagwi mwa, mwa yin de yin e sap ɛ, kɛ yin a sé besɛl kɛ berey o, tik na yin a somo Dagwi mot!”

⁶Ko ma to wok pyɛ cak sede rewɔ̂ng gbɔng regyɛng bemat. Ra sé sede wûs nshi de ne ta e gwɔrɔt kɛ sede gbara de wo lumla na gap. Ba ye, “Haleluya, somo hin Dagwi! Yɛ Darwey, Dagwi mot Wo Retô Mwa a sé re negwɔm!

⁷Tik na wot a vɔk yey pyɛng vit à yere mo, na wot a nɔng ɛ nerey arɔng! Jeng wenêng Ketyimit ya ga vey, ko gwel o a ga yong ɛ́ yaga kɛ.

⁸Ba ga nɔng ɛ gworugu gworwat gwopwɛng de gwa sé jɛkjɛk ko gwa nɛp, na a tɛ̀.” Gworugu gwopwɛng o mo gwa sé e tô tomong bemât Dagwi de yɛ a di pyɛ cak vyes e ji mɛn wɛt.

⁹Ko tom-lagwi o a yang me, “Jɛk neha nemo: Mwa vemo de ba rini hɛn vey nzem wenêng Ketyimit o yɛn a rɔda vɔk yey pyɛng!” Ko a to yang me, “Nemó na sé neha Dagwi ne tsak o.”

¹⁰Ma hwo gaba e cat bol mɛ, na me bin re a yɛ fongol. Ko a yang me, “Hwo ra ano wɛt! Ma sé sâ fwom mō tanga wo mwa begwa mō de be nɔng nuha e ra tsak há de Yɛsu a dura a bemat. Rē a Dagwi fongol!” Tsak há mo de Yɛsu a dura, e hɛ de ha sé tô há hê bezarap Dagwi.

¹¹Ano arɔng, ma di lagwi e wunta pyot, ko rɔgɔ hwak wa sé e hwomo. Be tâng mwât laga wɛ, à Mwât Tsak o, tanga, à Mwat De Be Tó Yey Na Yɛ Wɛt. E gas shɔt e tē, ko e tó como e gwong de gwa sé cik.

¹²Yenêng bayis mɛ ya lolo sede kya, ko a tɛ̀ bekpîn negwɔm pyak e rato mɛ. A vɔk reza rehak de ba jɛk rɛ e ra yɛ, ko vit a mwat de a tɔk rɛ sɛ̌ yɛ nju mɛ zɔng.

¹³A tɛ̀ gworugu de ba gyira gwɛ e ji nemi. Ko reza de ba yila hɛ na rɛ, à Rehâ Dagwi.

¹⁴Mwa bemât comô lagwi ba raa hɛ. Yɛn a lagsa berɔgɔ, ko ba tɛ̀sɛ berugu berat de ba sé jɛkjɛk, ko bà pɛngɛ pes.

¹⁵Wal de wa sé vootot wa nunus yi e nu mɛ, ko e wɛ de a rɔda re mɛ̀ mwa yére bemat jey. A rɔda vɔk gwelê dyam na a re mɛ̀ negwɔm e ra yɛn. A rɔda to farang nèy cɔ́gɔt anap e kwɔ̂n farang o. Kwɔn o ha sé e tô gbɔng shôm Dagwi Wo Retô Mwa.

¹⁶Bá kana jɛk reza mɛ wɔgɔ, “Gbɔng Gwɔ̀m begbɔng begwɔ̀m mwa tanga Darwêy bedaberey mwa” e ra gworugu mɛ e gwafwa mɛ.

¹⁷E bama mo, ma to di tom-lagwi hwak de a tumal e gwi. A hwo yila mwa benon de be tele e gwi na gbɔng fwɔ, a ye, “Vey in, na yin a tula hin e dem hining yaga gbɔng nzem Dagwi!

¹⁸Vey in, na yin a re banamâ begbɔng begwɔ̀m, na vê begwɔ̀m bemât como, na vê bemât como mo arɔng, tanga banamâ bedwa, na vê bemât lagsa vɛ, tanga banamâ bemât mwa, kɛ vemo de ba sé tɔ̂ lɔ kɛ vemo de ba sé besam gbak, kɛ ba sé besɛl kɛ ba sé berey o ayi!”

¹⁹Ko ma di gwongyama gwaane mo, tanga begbɔng begwɔ̀m jey, mwa na bemât como mɛn. Ba tula hɛn, na yɛn a bin tó como na yɛ wane de a laga rɔgɔ mo tanga bemât como mɛ arɔng.

²⁰Ko ba vo gwongyama mo tanga mwât bɔs de a tē, a sé zarap Dagwi, yɛ de á kana ra pyɛ̂ bes e nuyêl gwɛ. Yi ano, á kana kwɛlɛng mwa vemo de bá kana tɛ̀ a yɛn jɔt gwongyama mo, vemo de bá kana re a pyɛ de ba yong sede gwɛ fongol. Ba vo gwongyama mo tanga mwât bɔs wane mo mwa hɛn, ba bomo hɛn beken e ji rep de wa sila na kya tanga kyâ negang arɔng.

²¹Ko yɛ wane de a laga rɔgɔ a mɔbɔs mwa bemât como mɛn na wal de wa nunus yi e nu mɛ mo. Ko mwa benon ba vey re banama mɛn o pyɛ de ba tɔk re zɔng.