Read berom Reto Fong Yohana 2 Bible Online

Reto Fong Yohana 2 - berom bible

Reto Fong Yohana 2

¹Mwat wane mo a yang me, “Jɛk a tom-lagwi wo ekilisiya e Ɛfɛsus wɔgɔ, ‘Mwat womo de a vɔk netangacɛn netaama e vwɔ yege mɛ, womo de e to kyě kyè e tê pyɛ̂ tik bekywa-kya yê dyam shinang, yɛ a sé ha reha ret ngan:

²“ ‘Ma tɔk pyɛ́ de hwà ga ra. Ma to tɔk, hwà ga pɛngɛ hwo e de râ fwom, ko hwà ga niri e ji kayɛ pyɛ. Ma tɔk arɔng, hwó simo na bemat beves be sangal tanga hwo wɛt. Hwà ga masa bemat de be tâng bato mɛn, yɛn a sé betom Yɛsu, ko hwà ga di, a sé ano wɛt, yɛn a sé bemât bɔs zɔng.

³Hwà vɔk niri. Ba ga tak a hwo reyɔm, yaga hwó raa me, ko mwa ano, hwà ga ye waa wɛt.

⁴“‘Ko di, pyɛ de me kyɛ́ me na hwo a yet ngan: Jeng de hwá hwo raa me, hwá kana tɛ̀ yey mō na me sizɔng, ko a remo, hwó to ra ano wɛt.

⁵Bàre na negwɔn mō ne susu mo nemo de hwà tik nɛ! Doyo yi e banɛn mō, na hwo to ra pyɛ́ de hwá kana ra e susu mo. Ka sede hwà doyo yi e banɛn mō wɛt, ko ma rɔda vey e hane, na me jut pyɛ tik kywa-kya mō yi e kwɔ̂n yɛ.

⁶Ko pyɛ de ma wok neta na hwo a yet ngan: Hwà kyɛ́ o pyɛ́ vyes de bemat-raà Nikolas be ragas, yēmo de yey hom ye kyɛ́ ɛ yɛ̄ arɔng.

⁷“ ‘Ka sede hwà vɔk betong, ko tik na hwo wok reha de Gabik Dagwi ha sé ha a be-ekilisiya! “ ‘Mwa vemo de ba re masa, ma rɔda nɔng ɛn reto na be re e ji nèy cɔgɔt de ye nɔngɔs neken, yemo de ya sé e Bwî Dagwi.’ ”

⁸Mwat wane mo a to yang me, “Jɛk a tom-lagwi wo ekilisiya e Simirna wɔgɔ, ‘Mwat womo de a sé wo susu mo na wo yɛnɛ mo, yɛ womo de á kana ku, ko á to sene na neken, yɛ a sé ha reha ret ngan:

⁹“ ‘Ma tɔk yerê reyɔm de ba tak a hwo. Ma to tɔk nepɛng mō, ko e ji hâ mwin, hwà sé darwey! Ma tɔk neha neves de bemat behak be ha e ra hwo. Yɛn e tâng bato mɛn, ba sé BeYuda, ko yɛn a sé vɛ wɛt; yɛn e raa Shetan zɔng!

¹⁰Hwo vɔk bengyip reyɔm de hwà sé kyè wɔ̀ sɔ wɛt. Wok ngan! Gwɔ̀m cēng a sé kyè wɔ̀ tɛ̀, be tɛ̀ behak e ji min e lɔ̂ ngyang, yaga na be mara mɛ̀ sêy tsak o min. Ba rɔda tak a yin reyɔm nepɔlɔ kuru (10). Ko tik na hwo re nuyel na sêy tsak o na me, kɛ bê wey na hwo ayi. Ko ma rɔda nɔng o neken gbak-gbak de na sé pyɔlɔ yaga hwà re nemàsa mo.

¹¹“ ‘Ka sede hwà vɔk betong, ko tik na hwo wok reha de Gabik Dagwi ha sé ha a be-ekilisiya! “ ‘Mwa vemo de ba re masa, reku re neba re ba ra ɛn ko tyɔng wɛt.’ ”

¹²Mwat o a to yang me, “Jɛk a tom-lagwi wo ekilisiya e Pɛrgamɔs wɔgɔ, ‘Mwat womo de a vɔk wal wo bak bà de wa sé vootot a sé ha reha ret ngan:

¹³“ ‘Ma tɔk kwɔn de hwó sangsal ɛ̀: E kwɔn á hane de Shetan a tɛ̀ ɛ̀ gwofwa negwɔm mɛ. Hwà tono na reza hom wɛt, ko hwà ka hàla sêy tsak o mō na me arɔng wɛt. Hwà ka ra ano wɛt pere vɔk e jeng de ba mɔrɔ Antipas de á kana raa me na yey mɛ mwa, ko a nɔng nuha ano arɔng. Bá mɔrɔ hɛ e tē min, e kwɔn de Shetan a sé sangal ɛ̀.

¹⁴“ ‘Ko di, pyɛ́ cak tyɔng de me kyɛ́ me na hwo a yet ngan: Bemat behak ba sé e ji min de be raa basâ Balaam, yɛ wane de à dura a Balak begwong de a rɔda tɛ̀ BeIsrayɛl be ra banɛn. À tɛ̀ ɛn, yɛn a re pyɛ́ de bà kana ra sekwit na yɛ̄; à tɛ̀ ɛn, yɛn a ra nejwang arɔng.

¹⁵Ko behak e ji min be raa yerê basa de bemat-raà Nikolas be basa.

¹⁶Yaga ano, doyo yi e banɛn mō. Ka ano wɛt, ko me à wane ziri ba pom na hwo, ko ma rɔda tó como na bemat vane mo na wal de wo nunus yi e nu hom.

¹⁷“ ‘Ka sede hwà vɔk betong, ko tik na hwo wok reha de Gabik Dagwi ha sé ha a be-ekilisiya! “ ‘Mwa vemo de ba re masa, ma rɔda nɔt ɛn yi e mana de ba tik wɛ e ji lagwi. Ma rɔda to nɔ̂ng kawɛ e ji mɛn fwà pwɛng de ba jɛk ɛ̀ reza repas e ra gwɛ. Vit a mwat de a tɔk rɛ̄, sɛ̌ mwat de a sey rɛ.’ ”

¹⁸Mwat o a to yang me, “Jɛk a tom-lagwi wo ekilisiya e Tiyatira wɔgɔ, ‘Hwey Dagwi, de yenêng bayîs hɛ ye lolo sede kya, ko bol hɛ be nɛp sede dyam pama de ba ga tugut yɛ, ha sé ha reha ret ngan:

¹⁹“ ‘Ma tɔk pyɛ́ de hwó ragas. Ma tɔk, hwó tɛ̀ yey mō na bemín, hwó raa me na yey mō mwa, hwó sɛlsɛ bemín, ko hwó niri e ji kayɛ pyɛ arɔng. Ma to tɔk, pyɛ́ de hwó ragas a remo ya dal yane de hwá kana ragas raane.

²⁰“ ‘Ko di, pyɛ de me kyɛ́ me na hwo a yet ngan: Hwà tik hwā wane de be tang ɛ, à Yɛzɛbɛl e tē min, womo de e tâng tó mɛ, à zarap Dagwi. Ko yi na basa mɛ e kwɛlɛng besam hom na be ragas nejwang, na be to reres pyɛ́ de ba ga ra sekwit na yɛ̄.

²¹Ma ga nɔng ɛ jeng na a doyo yi e banɛn mɛ, ko a simo na a tik ragâs pyɛ́ vyes yane mo wɛt.

²²Yaga ano, ma rɔda tɛ̀ serɔ se kaba hɛ na a pere wɔ̀ dyɛng mɛ̀. Ko ma rɔda tɛ̀ mwa vemo de ba ga ragas nejwang na yɛ, na yɛn a di rezot reza wɛt, sɛ̌ yɛn a doyo yi e banɛn mɛn, na yɛn a tik ragâs pyɛ́ vyes na yɛ̀ arɔng.

²³Ko ma rɔda mɔbɔs nèy mɛ. Yi ano, be-ekilisiyâ mwa ba rɔda tɔk, e me de ma tɔk báre kawɛ mwat tanga pyɛ́ de e simo. Ko ma rɔda tala kawɛ e ji min tyɛng na pyɛ́ de a ga ra arɔng.

²⁴“ ‘Ko bwang min e Tiyatira, yin a ga raa yerê basa ves hane wɛt; yin a ga to tɔk pyɛ́ vyes yane wɛt de bemat be tē, ya sé pyɛ̂ neyaàng Shetan. Ko di, ma rɔda to gwɛ̌ pyɛ cak de ya sé gbang e ra pyɛ́ de yin á kana tɔk gyam wɛt.

²⁵Ré in nuyel na vɔ́k gak pyɛ́ de yin á kana masa yɛ̄ gyam sɛ̌ jeng de ma ba vey.

²⁶Mwa vemo de ba re masa, na be to ra pyɛ́ de me simo pere vɔk e yɛnɛ mo, ma rɔda nɔng ɛn reto e ra yére bemat jey,

²⁷tyɛng sede remo de me arɔng ma ga sey reto rane mo yi na Da hom. Yɛn a rɔda jut gwelê negwɔm de ba yong gwɛ na wɔ́rɔ dyam, na be re mɛ̀ negwɔm e ra yére bemat jey o, ko bê wey na yɛn, sede be bunut rwêy secwem. Ko ma rɔda to nɔng ɛn dàt gasi.

²⁹“ ‘Ka sede hwà vɔk betong, ko tik na hwo wok reha de Gabik Dagwi ha sé ha a be-ekilisiya!’ ”