Read berom Reto Fong Yohana 20 Bible Online

Reto Fong Yohana 20 - berom bible

Reto Fong Yohana 20

¹Ko ma to di tom-lagwi hwak de a sé gyirik yi e lagwi vey e jey. A vɔk e vwɔ̂ mɛ makwili wo revɔng de ra vɔk yɛnɛ wɛt tanga ngyang de ya sé ryey o.

²A hwo vo gwalwel. E gwɛ, à gwɔ̄m de wà sè yimo raane de be tâng wɛ, à gwɔ̀m cēng kɛ Shetan arɔng; a rɔgɔs gwɛ neshey gu rining (1,000).

³A barak gwɛ e ji revɔng rane mo, a bang rɛ, a varas rɛ, ko a tɛ̀ jɔt mɛ e ra rɛ, yaga na gwo tɔk to kwɛlɛng yére bemat jey wɛt sɛ̌ bamâ neshey gu rining nane mo. E bama neshey o, a sé gbing-gbing na be hàla gwɛ jeng tyɔng.

⁴Ko ma di beta negwɔm, ko ba nɔ̂ng bemat de ba sangal e ra vɛ reto na be ra shɔt. Ma to di begabîk bemat de bá kana paa a yɛn bato, yaga yɛn á nɔng nuha e ra sêy tsak o mɛn na Yɛsu, ko yɛn á shara rehâ Dagwi arɔng. Yɛn á kana re a gwongyama mo kɛ pyɛ de ba yong sede gwɛ fongol wɛt, ko yɛn á simo be jɛk a yɛn jɔt gwongyama mo e batili kɛ e vɔ mɛn arɔng wɛt. Yɛn a to sene na neken, ko yɛn a re negwɔm tanga Kristi neshey gu rining.

⁵A sé e yɛn vane mo de ba sé e ji sene na neken hê mɛsɛng o. Ko bwang vemo de ba ga kana kushu ba sene na neken wɛt sɛ̌ bama de neshey gu rining o na yɛnɛ hɛn.

⁶Vê yey pyɛng à vemo de ba sé e ji bemat de be sene na neken e mɛsɛng o! Dagwi ê tik ɛn jaram na be sè bemɛ. Reku re neba ra rɔda ra ɛn wɛt; ko yɛn a rɔda ra a Dagwi tanga Kristi fwom sede bepiris mɛ; yɛn a rɔda to re negwɔm tanga Kristi neshey gu rining.

⁷E bama de neshey gu rining o na ga yɛnɛ hɛn, ba rɔda viri Shetan yi e ngyang mɛ mo.

⁸A rɔda nusu na a to hwo kwɛlɛng yére bemat jey de ya sé e rǎ gul naas ve jey, yɛn vɛ à Gɔk tanga Magɔk. Nepyak mɛn na sé sede nepyak bazɛk e vwarâ gworep, ko Shetan a rɔda tula hɛn e dem hining, yaga na yɛn a tó como.

⁹Yɛn a vey yi e neyɛnɛ̂ jêy mwa, ko yɛn a wɔ̀ gwɔrɔ dem de bemât Dagwi ba tula hɛn ɛ̀ tanga repomo de Dagwi a tɛ̀ yey na rɛ. Ko kya ha gaba yi e lagwi, ha re ɛn mwa hywiri.

¹⁰Ko ba jut gwɔ̀m cēng de a kwɛlɛng hɛn, ba bomo hɛ e ji rep de wa sila na kya tanga kyâ negang arɔng. Kwɔn a hane de ba ga kana barak ɛ̀ gwongyama tanga zarap Dagwi wo bɔs. E hwomo, yɛn a rɔda di rezot nagwi na naturuk gbak-gbak.

¹¹Ano arɔng, ma di gwogbɔng gwofwa negwɔm de gwa sé gwopwɛng o, ko ma di womo de a sé sangal e ra gwɛ. Jey tanga lagwi ba vɔ be tele yi e nuyel mɛ, ba pere wɔ̀ vusa hɛn mwa vit.

¹²Ma to di mwa bemat de ba ga kana kushu, bemakuk mwa na nèy, ba sé tumal e nuyêl gwofwa negwɔm o. Ko ba wunta bebok-basa ve dura tomong bemat. Ba to wunta bwok-basa gwo dura vê neken. Ko ba ra a bemat de ba ga kushu shɔt tyɛng na tomong mɛn de ba jɛk e ji bebok-basa mo.

¹³Mwa bemat de bá kana kushu e ji gworep ba nunus, ko vemo de bá kana kushu, vemo de ba sé e dem bevuvwel, ba nunus arɔng. Ba ra a yɛn mwa shɔt tyɛng na pyɛ́ de yɛn á kana ra.

¹⁴Ano arɔng, ba jut reku tanga dem bevuvwel, ko ba barak hɛn e ji rep de wa sila na kya. Rep kya mo, e wɛ à reku re neba.

¹⁵Ba barak kawɛ mwat de ba sɛ̀ reza mɛ wɛt e ji bwok-basa bemat de ba vɔk neken e ji rep de wa sila na kya arɔng.