Read berom Reto Fong Yohana 21 Bible Online

Reto Fong Yohana 21 - berom bible

Reto Fong Yohana 21

¹E bama mo, ma di lagwi pwas tanga jey pyas. Lagwi wo mɛsɛng o tanga jey yê mɛsɛng o ya ga tɛ́ ɛ vit, ko gworep arɔng gwa to sé wɛt.

²Ko ma di Repomô Jɛrɛ de be tâng rɛ, à Yɛrusalɛm Pwas ra sé gyirik yi na Dagwi e lagwi vey e jey. Ba yong rɛ sede gwel de ba tɔrɔ hɛ yɔ̀kyɔk vɔk na rwas mɛ.

³Ko ma wok gbɔng fwɔ yi e kwɔ̂n gwofwa negwɔm, gwa ye, “Di, a remo, Dagwi a ga vey tɛ̀ lɔ mɛ na bemasi! A rɔda sangal tanga yɛn, ko yɛn a rɔda sè bemat mɛ. Dagwi pyɛ mɛ a rɔda sè tanga yɛn, ko a rɔda sè Dagwi mɛn.

⁴A rɔda yishing mwa nemwishil yi e bayis mɛn. Reku ra rɔda to sè wɛt, ko ba rɔda to vɔk lashê yey kɛ sesin wɛt, ko ba rɔda wok royô pyɛ cak arɔng wɛt, yaga mwa pyɛ́ yê raane ya ga kwey.”

⁵Ko yɛ de a sé sangal e ra gwofwa negwɔm o a ye, “A remo, ma sé tɛ̀ pyɛ̂ mwa ye tɛ́ ɛ pyas!” Ko a yang me, “Jɛk pyɛ́ yemo, yaga neha nemo na sé tsak o, ko ba rɔda tó yey na nɛ wɛt.”

⁶A to ye, “Kayɛ pyɛ ya ga yɛnɛ hɛ! Ma sé Alfa na Omega, ma sé wo susû kayɛ pyɛ na wo yɛnɛ̂ yɛ arɔng. Ma rɔda nɔ̂ng kawɛ mwat de a wok yêy hwɔshɔ nshi e nɔrɔ. Nshi mo na sé yi e lwel de gwo nɔngɔs neken.

⁷Kawɛ mwat de a re masa a rɔda sey pyɛ́ yemo mwa yi na me, ko ma rɔda sè Dagwi mɛ, yɛ arɔng a rɔda sè hwey hom.

⁸Ko vemo de ba vɔk bengyip, na vemo de be tó yey na yɛn, na vemo de be ragas pyɛ́ de ya sé byɛm-byɛm, na vemo de be mɔbɔs bemat, na vemo de be ragas nejwang, na vemo de be ragas vyoshon ye bɔs, na vemo de be sapas cī, tanga mwa bemât hâ bɔs — ba rɔda ba tala yerê bemat vemo mo pyɔlɔ mɛn e ji rep de wa sila na kya tanga kyâ negang arɔng. Reku re neba a rane.”

⁹Gwining e ji betom-lagwi betaama de ba vɔk neshǐ netaama de ba sila nɛ na nezap rezot netaama ne yɛnɛ mo a vey na me, a ye, “Vey, na me dura a hwo gwel de a sé hwâ Ketyimit.”

¹⁰Gabik Dagwi ha sɛ̀ reto e ra me, ko tom-lagwi o a jut me vɔk e ra rak gworaku gwohwak de gwa sé gwolwis sizɔng. A dura a me Repomô Jɛrɛ Yɛrusalɛm de ra sé gyirik yi e kwɔ̂n Dagwi e lagwi vey e jey.

¹¹Gbɔng nerât Dagwi na lolo e ji rɛ. Rā nɛp sede dyéngere ryat sizɔng de be tâng yɛ, à yaspa, de ya sé gwiri sede gyilâs.

¹²Ba gwɔrɔ repomo mo na gbɔng jwa-duk lwis vɔk e rak o tyɔng wɛt. Wa vɔk gbɔng rùhup kuru na vɛ ba (12), ko betom-lagwi kuru na vɛ beba arɔng ba bɛrɛng rùhup o. Ba ga kana jɛkɛs bazâ yére Israyɛl e ra vɛ.

¹³Ba tɛ̀ rùhup tat e kawɛ bak repomo mo: Tat e rwa rak, tat e rwa batin, tat e rwa bato, ko tat arɔng e rwa tā.

¹⁴Ba lɔk jwa-pomo mo e ra retis de ba tɛ̀ rɛ na beta kuru na vɛ beba, ko ba jɛk ɛ̀ baza kuru na vɛ baba e ra vɛ. Baza mo, vɛ à bazâ betom vê Ketyimit.

¹⁵Tom-lagwi de a ha na me mo a vɔk cwang masâ nelis de ba yong wɛ na dyam shinang, yaga na a bin masa mɛ̀ repomo mo, na rùhup rɛ, tanga jwa-pomo mo arɔng.

¹⁶Repomo mo ra sé rǎ naas, yaga nelîs rɛ tanga netês rɛ na sé tyɛng. Tom o a masa repomo mo na cwang masâ nelîs mɛ mo, ko nelis o na dal lyōsho gu baba na naga beba (2,200). Netes o tanga nelis o vɔk e rak o na sé tyɛng ano arɔng.

¹⁷A to masa nelîs jwa-pomo mo vɔk e rak o, ko na sé sede mita kuru bataama na vɛ betungun (75) na yerê masa hê bemasi hemo de a ra mɛ̀ fwom.

¹⁸Ba lɔk jwa-pomo mo na dyengerê yaspa, ko ba lɔk repomo mo pyɛ rɛ na dyam shinang ryat de ya sé gwiri sede gyilâs.

¹⁹Ba tɔrɔ beta de ba lɔk mɛ̀ retîs jwa-pomo mo na nezap dyéngere ryat sizɔng: Gwofwa retis o gwo mɛsɛng o gwɛ à yaspa, gwo neba à safir, gwo netat à agat, gwo naas à ɛmɛral,

²⁰gwo netungun à onis, gwo netyiimin à karnelyan, gwo netaama à kirisolit, gwo rwit à beril, gwo shanetat à topas, gwo kuru à kirisoparas, gwo kuru na gwɛ gwining à yakinta, gwo kuru na vɛ beba à ametis.

²¹Ba yong rùhup kuru na vɛ ba mo na beta berat sedesi de be tâng vɛ, à pɛ̂l; ba yông kagwɛ ruhup o na pɛ̂l gwining. Ba yong hyok rey o hê repomo mo na dyam shinang ryat de ya sé gwiri sede gyilâs.

²²Ma di Gbɔng Duk Re Fongol e ji repomo mo wɛt, yaga Darwey, Dagwi Wo Retô Mwa, tanga Ketyimit ba sé e hwomo e tô Gbɔng Duk Re Fongol o.

²³Be to simo gwi tanga pwɛl na be nɔng negbey e ji repomo mo wɛt, yaga a sé e gbɔng nerât Dagwi de na sé negbêy rɛ, ko a sé e Ketyimit de ka sé sede kywa-kya rɛ arɔng.

²⁴Mwa yére bemat jey be kyě kyè yi na negbêy repomo mo, ko begbɔng begwɔ̀m jêy mwa ba rɔda wɔ na nedanerey mɛn e ji rɛ arɔng.

²⁵Rùhup repomo mo bê nàra pyot mwa nagwi; bê sang bang vɛ wɛt, yaga naturuk na rɔda sè e hwomo wɛt.

²⁶Ko bê wɔ na gbɔng nerey tanga nedanerey mwâ yére bemat jey e ji repomo mo arɔng.

²⁷Ko vit a pyɛ de ya sé ligis de ya rɔda yel e ji repomo mo; ko kawɛ mwat de e ragas pyɛ́ de ya sé byɛm-byɛm na womo de e vɛ́sɛ bɔs a rɔda yel arɔng wɛt. A sé e bemat de ba ga jɛk ɛn e ji bwok-basa Ketyimit o de ba jɛk ɛ̀ bazâ vemo de ba vɔk neken — e yɛn de ba rɔda yel e ji repomo mo zɔng.