Read berom Reto Fong Yohana 22 Bible Online

Reto Fong Yohana 22 - berom bible

Reto Fong Yohana 22

¹Tom-lagwi o a to dura a me rɔt de ha vɔk nshi de ne nɔngɔs neken, ko ne nɛp sede dyéngere. Nshi mo ne tele yi e gwofwa negwɔm Dagwi na Ketyimit arɔng,

²ne tele e tê hyok rey o hê repomo mo. Ko batîn cɔ́gɔt de be nɔngɔs neken ba sé e kagwɛ vwarâ rɔt o. Batîn cɔ́gɔt o be mara nèy zang kuru na nɛ neba kahɛ shey wɔgɔ, be mara nèy o kagwɛ pwɛl. Berang cɔ́gɔt o ba sé yaga tɛ̀sɛ mwa yére bemat jey tyang yi e serɔ.

³Vit a pyɛ de ya sé pyɛ sedusa e bayîs Dagwi de ya rɔda sè e hwomo. Gwofwa negwɔm Dagwi na Ketyimit gwa rɔda sè e ji repomo mo, ko bemat mɛ ba rɔda re a yɛ fongol.

⁴Yɛn a rɔda di bayîs Dagwi, ko ba rɔda jɛk reza mɛ e batili mɛn.

⁵Naturuk na rɔda sè e hwomo wɛt, ko ba rɔda to simo kywa-kya kɛ negbêy gwi arɔng wɛt. Yaga Darwey Dagwi a rɔda sè negbey mɛn, ko yɛn a rɔda re negwɔm sede begbɔng begwɔ̀m neshey gbak-gbak.

⁶E bama mo, tom-lagwi o a yang me, “Neha nemo na sé tsak o, ko ba rɔda tó yey na nɛ wɛt. Darwey, Dagwi de e nɔngɔ̂s bezarap mɛ Gabik mɛ a tomo tom mɛ na a dura a besam mɛ pyɛ́ de ye ba té e jeng de ye kyè vey bagat.”

⁷Yɛsu a ye, “Wok in! Ma sé kyè vey ziri! Wo yey pyɛng a womo de e gyeng neha bwok-basa mó nemo de ne yís yi na Dagwi!”

⁸Me, Yohana, ma ga wok pyɛ́ yemo mwa, ma to di yɛ̄ arɔng. Ko jeng de ma yɛnɛ wokos yɛ̄ na bɛrɛng yɛ̄ mwa, ma hwo gaba e cât bol tom-lagwi de a dura a me yɛ̄, na me bin re a yɛ fongol.

⁹Ko a yang me, “Hwo ra ano wɛt! Ma sé sâ fwom mō tanga wo mwa begwa mō de be zarap yi na Dagwi, tanga mwa vemo de be gyenges neha bwok-basa gwomo. Rē a Dagwi fongol!”

¹⁰Ko a to yang me, “Hwo kwon lɛrɛ neha bwok-basa mó de ne yís yi na Dagwi, yaga jeng ya ga vey bagat de pyɛ́ yemo ya rɔda té.

¹¹Tik na kawɛ mwat de a sé vwes a re nuyel na ragâs neves mɛ, ko womo de e ragas pyɛ́ de ya sé gbiridik, tik na a re nuyel na ragas yɛ̄. Tik na kawɛ mwat de a sé cik a re nuyel na ragâs pyɛ́ de ya sé cik, ko womo de a sé jɛrɛ, tik na a re nuyel na sangal mɛ hê jɛrɛ arɔng.”

¹²Yɛsu a ye, “Wok in! Ma sé kyè vey ziri! Ma rɔda vɔk ɛ̀ pyɔlɔ de mê nɔ̂ng kawɛ mwat tyɛng na pyɛ́ de a ga ra.

¹³Ma sé Alfa na Omega, ma sé wo susu mo na wo yɛnɛ mo, me wɛ à wo susû kayɛ pyɛ na wo yɛnɛ̂ yɛ arɔng.”

¹⁴Vê yey pyɛng a vemo de be kus berugu mɛn jɛkjɛk! Ba rɔda nɔng ɛn reto, na yɛn a re nèy cɔgɔ̂t neken, na be to yel e rùhup vane mo vɔk e ji repomo mo arɔng.

¹⁵Ko bemat de ba rɔda dul ɛn nà yel e ji repomo mo, yɛn à bemat de be ragas pyɛ́ vyes, na vê ragâs vyoshon ye bɔs, na vê ragâs nejwang, na vê mɔbɔs bemat, tanga bemât sapâs cī, na mwa vemo de be simo be vɛ́sɛ bɔs, ko be to ragas hɛ arɔng.

¹⁶“A sé e me, Yɛsu, de ma tomo tom hom na a vey nɔng in e ji be-ekilisiya nuha pyɛ́ yemo. Ma sé yerê lɔ Davit, ko ma to sé dàt gasi de wo lolo wɛshɛrɛk.”

¹⁷Gabik Dagwi tanga gwel be tē, “Vey!” Ko kawɛ mwat de e wok pyɛ yemo, tik na yɛ arɔng a ye, “Vey!” Tik na kawɛ mwat de a wok yêy hwɔshɔ a vey; womo de e simo na a sɔ nshi de ne nɔngɔs neken, tik na a vey sey nɛ e nɔrɔ.

¹⁸Me, Yohana, ma sé tusa kawɛ mwat de a wok neha bwok-basa mo nemo de ne yís yi na Dagwi, ma sé ye: Ka sede mwat hwak a gwɛ̌ pyɛ cak e ra neha nemo, ko Dagwi a rɔda gwɛ̌ a yɛ e ra tabak mɛ nezap rezot nemo de ba ha rehâ nɛ e ji bwok-basa gwomo.

¹⁹Ko ka sede mwat hwak a tɛt pyɛ cak yi e ji neha bwok-basa mo, Dagwi a rɔda sey ɛ̀ numo mɛ hê nèy cɔ́gɔt neken, ko ba rɔda shim ɛ kwɔn e ji Repomô Jɛrɛ rane mo. E pyɛ́ ma yemo de ba misang hâ yɛ̄ e ji bwok-basa gwomo.

²⁰Yɛ wane de a nɔng nuha e ra pyɛ́ yemo wɔgɔ, ya sé tsak o, e tē, “Mwin, ma sé kyè vey ziri!” Ey! À Darwey Yɛsu, vey!

²¹Tik na Darwey Yɛsu a dura a kawɛ mwat nerat mɛ. Ano.