Read berom Reto Fong Yohana 3 Bible Online

Reto Fong Yohana 3 - berom bible

Reto Fong Yohana 3

¹Mwat o a to yang me, “Jɛk a tom-lagwi wo ekilisiya e Sardis wɔgɔ, ‘Mwat de a vɔk begabik betaama vê Dagwi tanga netangacɛn netaama arɔng, yɛ a sé ha reha ret ngan: “ ‘Ma tɔk pyɛ́ de hwó ragas. Bemat be bɛrɛng hwo sede hwà vɔk neken, ko e ji hâ mwin, hwà ga ku.

²Sene, na hwo wuru kebwang neken de ka rɔngɔl na hwo gyam na ke ku vit! Yaga ma ga di, pyɛ́ de hwà sé ra ya ga sila e ngyen wɛt e bayîs Dagwi hom.

³Yaga ano, bàre na pyɛ́ de ba ga kana basa a hwo, na yēmo de hwà ga kana sey yɛ̄ arɔng. Raa yɛ̄ naka, na hwo doyo yi e banɛn mō. Ko ka sede hwô sene wɛt, ko ma rɔda vey hwo e ra hwo sede gbik; hwà rɔda ka tɔk jeng de ma rɔda ba vey wɛt.

⁴“ ‘Ko behak tyɔng ba sɛ́ e ji min e Sardis de ba ga tɛ̀ berugu mɛn gbiridik wɛt. Yɛn vane mo ba rɔda tɛ̀ berugu bepɛng, ko ba rɔda kyè tanga me, yaga ba di, yɛn a vey na be ra ano.

⁵Mwa vemo de ba re masa, ba rɔda tɛ̀ a yɛn berugu bepɛng ano arɔng. Ma rɔda fugut baza mɛn ko tyɔng wɛt yi e bwok-basa de be jɛkɛs ɛ̀ bazâ vemo de ba vɔk neken. Ko e nuyêl Da hom tanga betom-lagwi mɛ mwa ma rɔda nɔng nuha, yɛn a sé benang me.

⁶“ ‘Ka sede hwà vɔk betong, ko tik na hwo wok reha de Gabik Dagwi ha sé ha a be-ekilisiya!’ ”

⁷Mwat o a to yang me, “Jɛk a tom-lagwi wo ekilisiya e Filadɛlfya wɔgɔ, ‘Mwat de a sé jɛrɛ, ko há mɛ ha sé tsak o arɔng, yɛ a vɔk makwili de wà kana sè wo Davit. Ka sede a wunta rwi duk, ko vit a mwat hwak de ê tɔk bang gwɛ, ko ka sede a bang gwɛ, vit a mwat hwak de ê tɔk wunta. Reha mɛ a ret ngan:

⁸“ ‘Ma tɔk pyɛ́ de hwó ragas. Ma to tɔk, hwà vɔk reto tyɔng zɔng. Ko mwa ano, hwà ga gyenges basa hom, ko hwà ga tono wɛt wɔgɔ, hwà sé raa me. Ko di, ma ga wunta rwi duk e nuyel mō gwomo de vit a mwat de e tɔk bang gwɛ.

⁹Bemat behak ba sɛ́ de be raa Shetan. Yɛn e tâng bato mɛn, ba sé BeYuda, ko yɛn a sé ano wɛt; yɛn e vɛ́sɛ bɔs zɔng. Ma rɔda tɛ̀ ɛn, yɛn a vey gaba e cât bol mō, ko yɛn a rɔda tɔk, ma tɛ̀ yey hom na hwo.

¹⁰Ma ga kana nɔng o nu, hwo niri, ko hwà ga gyeng redu mo. Yaga ano, ma rɔda gyeng o tyang arɔng e jeng reyɔm de ye kyè vey e ra jêy mwa, yaga na be bin mara mwa bemat e ji jey yemo mo.

¹¹Ma sé kyè vey ziri. Vɔk gak pyɛ́ de hwá kana masa yɛ̄ gyam, yaga na mwat hwak a kwon sey ɛ̀ pyɔlɔ mō na gap wɛt.

¹²Mwa vemo de ba re masa, ma rɔda tɛ̀ ɛn na yɛn a sè sede swesêk duk e ji Gbɔng Duk Re Fongol wo Dagwi hom. Ko ba rɔda to nusu yi e hwomo ko tyɔng wɛt. Ma rɔda jɛk rezâ Dagwi hom e ra yɛn tanga rezâ repomô Dagwi hom arɔng. Be tâng repomo mo, à Yɛrusalɛm Pwas, ko ra rɔda gyirik yi e lagwi yi na Dagwi hom. Ko ma rɔda to jɛk reza hom repas e ra yɛn arɔng.

¹³“ ‘Ka sede hwà vɔk betong, ko tik na hwo wok reha de Gabik Dagwi ha sé ha a be-ekilisiya!’ ”

¹⁴Mwat o a to yang me, “Jɛk a tom-lagwi wo ekilisiya e Lawɔdikya wɔgɔ, ‘Mwat de be tang ɛ, à Ano, yɛ de a sé mwât nuha de be tó yey na yɛ wɛt, ko e dopse ha tsak o, yɛ wɛ de a sé susû kayɛ pyɛ de Dagwi a yong — reha mɛ a ret ngan:

¹⁵“ ‘Ma tɔk pyɛ́ de hwó ragas. Hwó raa me na yey mō mwa wɛt; hwà sé sede pyɛ̂ re de ya fes wɛt, ko ya to sumal arɔng wɛt. Ma yâng dal na simo, hwo sè sede pyɛ́ pyep kɛ pyɛ́ syurum!

¹⁶Hwà fes wɛt, ko hwà sumal arɔng wɛt — hwà sé lùmlum. Yaga ano, ma rɔda tulus hwo yi e nu hom!

¹⁷Hwó tē, hwà sé darwey, hwà vɔk pyɛ̂ mwa de hwó simo, ko hwà bidɛ pyɛ cak wɛt. Ko hwà tɔk wɛt, hwà sé pɛ́ng-pɛng, pyɛ nemwishish e nuyêl bemat! Hwà sé mwat de a vɔk vɔ sǎn, womo de e kyè warap, ko hwà to sé bwók arɔng.

¹⁸Yaga ano, ma sé vo a hwo redu na hwo vey na dyām, na hwo sey mɛ̀ dyam shinang yi na me, yemo de ba ga kana rugut yɛ̄ na kya, yaga na hwo bin sè mɛ̀ darwêy mwin. Sēy berugu bepɛng, na hwo bang mɛ̀ rebek mō, yaga na hwo to wokos rekyên kwɛngɛl warap wɛt. Sēy hwal, na hwo tɛ̀sɛ e bayis mō, yaga na hwo bin to bɛrɛng jey arɔng!

¹⁹Me gyong, ko me to tabak mwa vemo de ma tɛ̀ yey na yɛn. Yaga ano, ye ngyɛ́k na hwo doyo yi e banɛn mō.

²⁰Me a womo e tumal e rwi duk, me tē, “He-e-he!” Ka sede mwat hwak a wok fwɔ hom, ko a wunta a me rwi mo, ko ma rɔda yel e ji lɔ mɛ mo. Me tanga yɛ, wot a rɔda re pyɛ́ e dem o.

²¹“ ‘Mwa vemo de ba re masa, ma rɔda nɔng ɛn reto na be sangal e vwara hom e gwofwa negwɔm hom, tyɛng sede remo de ma kana re masa, ko ma sé sangal e vwarâ Da hom e gwofwa negwɔm mɛ arɔng.

²²“ ‘Ka sede hwà vɔk betong, ko tik na hwo wok reha de Gabik Dagwi ha sé ha a be-ekilisiya!’ ”