Read berom Reto Fong Yohana 4 Bible Online

Reto Fong Yohana 4 - berom bible

Reto Fong Yohana 4

¹E bamâ pyɛ́ yane, ma bɛrɛng, ko ma di rwi duk hwak pyot e lagwi. Ko ma to wok fwɔ gwane de ma kana wok de gwa sé sede durum, gwa yang me, “Tūt vey e ngamo, na me dura a hwo pyɛ́ de ya rɔda té e nuyel.”

²Ko remo-remo, Gabik Dagwi ha sɛ̀ reto e ra me. Ma hwo di gwofwa negwɔm e hwomo e ji lagwi, ko ma to di mwat hwak e sangal e ra gwɛ.

³Bwang bayis mɛ gwa nɛp sede yére dyéngere ryat sizɔng de be tâng yɛ̄, à yaspa na karnelyan. Ko shatong de wa nɛp sede dyéngere ryat sizɔng de be tâng yɛ̀, à ɛmɛral wa gwɔrɔ gwofwa negwɔm o.

⁴Beta negwɔm kuru baba na vɛ benaas (24) ba tɛ̀ gwofwa negwɔm o e tē. Ko bemakuk kuru baba na vɛ benaas ba sé sangal e ra vɛ. Ba tɛ̀sɛ berugu bepɛng, ko kawɛ e ji mɛn a tɛ̀ kpîn negwɔm de ba yong na dyam shinang e rato mɛ.

⁵Balêm kya ba tabas yi e gwofwa negwɔm o. Kwɔn o ha sila na rewɔng, ko gbara wa sǎ e de taksal arɔng. Nekyǎ bekywa-kya betaama na sé lolo e nuyêl gwofwa negwɔm o. Nekya mo na sé e tô begabik betaama vê Dagwi.

⁶E nuyêl gwofwa negwɔm o arɔng pyɛ cak ya sé sede gworep de ba yong gwɛ na gyilâs, gwa sé gwiri sede dyéngere. Pyɛ́ cak cen o nyaas de ya vɔk bayis e kahɛ kwɔn, e nuyel mwa na bama, ya gwɔrɔ gwofwa negwɔm o e kahɛ hagât gwɛ.

⁷Pyɛ ye susu mo ya sé sede gukum, pyɛ ye neba ya sé sede mus, ye netat ya vɔk bwang bayis sede mwasi, ko ye nenaas ya sé sede kim e de tele e gwi.

⁸Kayɛ e ji pyɛ́ cen nyaas yane mo ya vɔk bafabak batyiimin, ko ya vɔk bayis e kahɛ kwɔn, e nɛn o mwa na e rak o. Ye sǎ e de râ lwɛ̄lɛ nagwi na naturuk, vit a pɔnglɔ, ye tē, “Darwey, Dagwi Wo Retô Mwa a sé jɛrɛ, vit a yɛnɛ mo, a sé jɛrɛ, vit a yere mo, a dal kayɛ pyɛ na nejɛrɛ. E yɛ de à kana sé a raane a sé a remo, ko e kyè vey.”

⁹Ko pyɛ́ cen nyaas o ye somo mwat de a sé sangal e gwofwa negwɔm o na lwɛ̄lɛ. Ye somo gbɔng nerat mɛ, ye nɔng ɛ nerey, ko ye to feng a yɛ, yɛ de a vɔk neken gbak-gbak. Kayɛ jeng de ye ra ano,

¹⁰bemakuk vane kuru baba na vɛ benaas o be gaba e nuyêl yɛ de a sé sangal e gwofwa negwɔm o, ko yɛn e re a yɛ de a vɔk neken gbak-gbak fongol. Yɛn e to paa bekpîn negwɔm mɛn, be tik vɛ e nuyêl gwofwa negwɔm o, ko yɛn e ra lwɛ̄lɛ, be tē,

¹¹“À Darwey Dagwi mot! Hwo wɛ de hwà vey na wot a somo gbɔng nerat mō, na wot a nɔng o nerey; reto ra sé rēmo arɔng. Yaga e hwo de hwà kana yong pyɛ̂ mwa; a sé yi na simo mō de kayɛ pyɛ ya sé e jey, na ye to vɔk neken.”