Read berom Reto Fong Yohana 5 Bible Online

Reto Fong Yohana 5 - berom bible

Reto Fong Yohana 5

¹E bama mo, ma di bwok-basa yerê gwomo de be gunus gwɛ e vwɔ yegê mwat de a sé sangal e ra gwofwa negwɔm gwane mo. Bá jɛk e ra gwɛ, e ji mo tanga e bama mo mwa, ko bá bang nû gwɛ kpá na negang e nekwɔn netaama.

²Ko ma di tom-lagwi hwak de a vɔk gap hyiw, a hanat na gbɔng fwɔ, a ye, “E wǎ de a vey na a paa negang o, na a to wunta bwok-basa mo arɛt?”

³Ko ba tɔk sɛ̀ mwat ko gwining wɛt e ji lagwi, kɛ e ji jey, kɛ e kwɔ̂n bevuvwel de a rɔda kyɛm a wunta bwok-basa mo, na a di pyɛ́ de ba jɛk e ji mo.

⁴Ma tosho sedesi, yaga ba tɔk sɛ̀ mwat hwak wɛt de a vey na a wunta bwok-basa mo, na a di pyɛ́ de ba jɛk e ji mo.

⁵Ko gwining e ji bemakuk o a yang me, “Hwo tosho wɛt! Di, mwat de be tang ɛ, à Gukum wo yerê Yuda, de a to sé gbɔng yere Davit, yɛ a ga dal reku. Yɛ ê kyɛm a paa negang e nekwɔn netaama mo, na a wunta bwok-basa mo.”

⁶Ko ma di Ketyimit ka sé tumal e tē, e nuyêl gwofwa negwɔm o; pyɛ́ cen nyaas o tanga bemakuk kuru baba na vɛ benaas (24) ba tɛ̀ kɛ e tē. Ketyimit o ka sé sede ba ga kana yɛrɛ kɛ. Ka vɔk ngɛngɛ taama na bayis bataama de ba sé e tô begabik betaama vê Dagwi de ba tomo vɛ vɔk e kahɛ kwɔn e ji jey.

⁷Ko Ketyimit o ka wɔ̀ sey bwok-basa mo yi e vwɔ yegê mwat de a sé sangal e ra gwofwa negwɔm o.

⁸Jeng de ka ga sey gwɛ, pyɛ́ cen nyaas o tanga bemakuk kuru baba na vɛ benaas o ba gaba e nuyêl Ketyimit o. Kawɛ mwakuk o a vɔk yom tanga shǐ dyam shinang de ba sila hɛ na pyɛ nesang hyɔɔlɔl. Nesang o na sé e tô newon bemat-raà Dagwi.

⁹Ba sé ra lwɛ̄lɛ pwas, ba ye, “Hwò wɛ hwà vey na hwo sey bwok-basa gwane mo, na hwo paa negang o. Bá kana yɛrɛ hwo, ko yi na nemi mō de hwá shushu e jeng reku mō, hwá kana sey mɛ̀ bemat, na hwo toyo na yɛn vey na Dagwi. Bemat de hwá sey ɛn o ba sé yi e kayɛ yere tanga karɛ relem, ba to sé yi e kayɛ yere bemat jey tanga kayɛ yerê bemasi arɔng.

¹⁰Hwá ga tɛ̀ ɛn, be sè bemat de hwó re negwɔm e ra vɛ, na be to sè bezarap Dagwi, yaga na be ra a yɛ fwom. Ko yɛn a rɔda re negwɔm e ra jey.”

¹¹E bama mo, ma di betom-lagwi de ba sé gu kpɛɛ, de vit a mwat de e tɔk basa nepyak vɛ. Ba gwɔrɔ gwofwa negwɔm gwane mo, na pyɛ́ cen nyaas o tanga bemakuk o arɔng. Ko ma wok tɔ̀ mɛn,

¹²ba sé ra lwɛ̄lɛ na gbɔng fwɔ, ba ye, “Ketyimit de bá kana yɛrɛ ka vey na ke vɔk reto, na nedanerey, na netsitsɛng, na gap; ka to vey na be nɔ̂ng kɛ nerey, na be di gbɔng nerât kɛ, na be somo kɛ arɔng!”

¹³Ko ma to wok tɔ̀ kayɛ pyɛ de Dagwi a yong e lagwi, na e jey, na e kwɔ̂n bevuvwel, na e ji nshi; mwa pyɛ́ de ya vɔk neken ya ra lwɛ̄lɛ, ya ye, “Tik na wot somo yɛ womo de e sangsal e ra gwofwa negwɔm tanga Ketyimit; tik na wot a nɔng ɛn nerey, na wot a somo gbɔng nerat mɛn tanga reto mɛn gbak-gbak!”

¹⁴Pyɛ́ cen nyaas o ya ye, “Ano!” Ko bemakuk o ba gaba e vwel, ba re a yɛn fongol.