Read berom Reto Fong Yohana 7 Bible Online

Reto Fong Yohana 7 - berom bible

Reto Fong Yohana 7

¹E bamâ pyɛ́ yane, ma di betom-lagwi benaas, ko kawɛ e ji mɛn a sé tumal e rwa gul jey hining. Yɛn a sé dulus gùl de be yís yi e rǎ gul naas o, yaga na be pɛsɛl vwel, kɛ berep, kɛ kayɛ cɔgɔt wɛt.

²Ko ma to di tom-lagwi o hwak de a sé nusu yi e rwa rak. Ko a vɔk e vwɔ mɛ pyɛ de ê tɛ̀ a bemat mɛ̀ jɔt ye Dagwi wo neken. A hwo dɛrɛ betom benaas vane mo de Dagwi a ga kana nɔng ɛn reto, na be lashe pyɛ́ de ya sé e vwel tanga e berep na gùl mɛn o,

³a yang ɛn, “Yin lashe vwel, kɛ berep, kɛ cɔ́gɔt wɛt. Gyéng in, sɛ̌ wot a jɛk a besam Dagwi mot jɔt mɛ e batili mɛn e ngyen.”

⁴Ko ba ha a me nepyak bemat de ba ga jɛk a yɛn jɔt Dagwi e batili mɛn o: Ba sé gu naga rining gu kuru banaas na gu banaas (144,000) de ba sé yi e kayɛ yerê Israyɛl.

⁵Ba jɛk a bemat gu kuru na vɛ baba (12,000) jɔt yi e yerê Yuda, na bemat gu kuru na vɛ baba yi e yerê Rubɛn, na bemat gu kuru na vɛ baba yi e yerê Gat,

⁶na bemat gu kuru na vɛ baba yi e yerê Ashɛr, na bemat gu kuru na vɛ baba yi e yerê Naftali, na bemat gu kuru na vɛ baba yi e yerê Manase,

⁷na bemat gu kuru na vɛ baba yi e yerê Simɛyɔn, na bemat gu kuru na vɛ baba yi e yerê Levi, na bemat gu kuru na vɛ baba yi e yerê Isakar,

⁸na bemat gu kuru na vɛ baba yi e yerê Zɛbulun, na bemat gu kuru na vɛ baba yi e yerê Yɔsɛf, na bemat gu kuru na vɛ baba yi e yerê Bɛnyamin arɔng.

⁹E bamâ pyɛ́ yane, ma bɛrɛng, ko ma di gbɔng regyɛng bemat de vit a mwat de a rɔda tɔk basa rɛ. Bemat o ba yi e kayɛ yerê bemasi na yi e kayɛ yere arɔng, ba to sé yi e kayɛ yerê bemât jey na yi e karɛ relêm jey. Mwa hɛn ba tɛ̀ berugu bepɛng, ko ba vɔk nelang tyét e vɔ mɛn. Ba sé tumal e hwomo e nuyêl gwofwa negwɔm Dagwi tanga e nuyêl Ketyimit o arɔng.

¹⁰Ko ba gbɔ na gbɔng fwɔ, ba ye, “A sé e Dagwi, de e sangsal e ra gwofwa negwɔm, de a ga sey ot, yɛ tanga Ketyimit o arɔng!”

¹¹Mwa betom-lagwi ba tumal, ba gwɔrɔ gwofwa negwɔm o tanga bemakuk na pyɛ́ cen nyaas o. Yɛn a hwo gaba e nuyêl gwofwa negwɔm o, ko ba re a Dagwi fongol,

¹²ba ye, “Ano! Tik na wot somo Dagwi, na wot to somo gbɔng nerat mɛ. E yɛ de a vɔk netsitsɛng. Tik na wot a feng a yɛ, na wot a to nɔng ɛ nerey. E yɛ de a vɔk reto na gap gbak-gbak. Ey, a sè ano!”

¹³E bama mo, gwining e ji bemakuk o a rangal me, a ye, “E beva a vane de ba tɛ̀ berugu bepɛng arɛt? Yɛn a yi e gwa arɛt?”

¹⁴Ma toyo a yɛ, ma yang ɛ, “Ma tɔk wɛt, à dagwɔ. E hwo de hwà tɔk.” Ko a yang me, “E yɛn a vane de ba ga tumal gak e gbɔng reyɔm rane, ko ba to nusu hɛn hyɔl. Ba ga kus berugu mɛn na nemî Ketyimit o, ko ba tɛ́ ɛn bepɛng o.

¹⁵Pyɛ ma yemo de ya tɛ̀, ba sé tumal e nuyêl gwofwa negwɔm Dagwi, na yɛn a ra a yɛ fwom nagwi na naturuk e ji Gbɔng Duk Re Fongol mɛ. Ko yɛ de e sangsal e ra gwofwa negwɔm o a rɔda gyepes hɛn pyɛ mɛ arɔng.

¹⁶Yɛn a rɔda to wok vyong kɛ yêy hwɔshɔ ko tyɔng wɛt. Gwi gwa rɔda ta ɛn wɛt, ko nevɛ̂t gwɛ ne rangas hɛn arɔng wɛt.

¹⁷Yaga Ketyimit o de ka sé e tê gwofwa negwɔm Dagwi ka rɔda sè lwek mɛn. Ka rɔda kyɔk ɛn vɔk e lel de nshî vɛ ne nɔng neken. Ko Dagwi a rɔda yishing a yɛn nemwishil mwa yi e bayis mɛn arɔng.”