Read berom Reto Fong Yohana 8 Bible Online

Reto Fong Yohana 8 - berom bible

Reto Fong Yohana 8

¹Jeng de Ketyimit o ka pat negang ne kwɔn hê netaama, kayɛ pyɛ e lagwi ya vɔ ya yē yɔɔt sede rebit dyam gwi jining.

²Ko ma di betom-lagwi betaama de be tumsal e nuyêl Dagwi. Ba nɔng ɛn bedurum betaama.

³Tom-lagwi o hwak a vey, ko a tumal e gàgbang rangâs pyɛ́ vɔk na Dagwi. A vɔk keshǐ rangas pyɛ̂ nesang hyɔɔlɔl kɛ dyam shinang. Ba nɔng ɛ pyɛ́ mo pyak, na a bin wuna yɛ na newon bemat-raà mwa. A nára a Dagwi yɛ sede pyɛ̂ nesang hyɔɔlɔl e ra kwɔn hane de ba yong na dyam shinang, hemo de ha sé e nuyêl gwofwa negwɔm Dagwi.

⁴Sekyêng pyɛ̂ nesang hyɔɔlɔl o sa tút tanga newon bemat-raa mo yi e kwɔn de tom-lagwi a nára pyɛ mo, ba kyè cik e nuyêl Dagwi.

⁵Ko tom-lagwi o a jut keshǐ rangas pyɛ̂ nesang hyɔɔlɔl, a sila kɛ na kya yi e gàgbang rangâs pyɛ́ mo, ko a bomo kɛ e ra jey. Ko gbara wa hwo taksal, kwɔn o ha sila na rewɔng, balêm kya ba tabas, ko vwel ha digis arɔng.

⁶E bama mo, betom-lagwi betaama de ba vɔk bedurum ba hwo yóng ɛn na be pɛsɛl vɛ.

⁷Tom-lagwi wo mɛsɛng o a pɛl durum mɛ. Ko fwala tanga kya ha wuna hɛ na nemi, ha nunus, ko ha gabsa e ra jey. Kya mo ha re bak gwining e ji bebak betat wo jey o, ko ha to re cɔ́gɔt de ya sé e bak gwining e ji bebak betat arɔng. Ko sɔng lwa gwa re kya mwa vit.

⁸Tom-lagwi wo neba a pɛl durum o mwɛ. Ko ba jut gwopyɛ gwohwak de gwa sé sede raku, de gwa lolo na kya, ba bomo gwɛ e ji gworep. Ko bak gwining e ji bebak betat wo gworep o wa tɛ́ ɛ nemi.

⁹Bak gwining e ji bebak betat wo pyɛ́ cen de ya sé e ji gworep o ya kushu, ko bak gwining e ji bebak betat wo bedwa-nshi ba lashe hɛn arɔng.

¹⁰Tom-lagwi wo netat a pɛl durum o mwɛ. Ko gwotangacɛn de gwa re kya sede vwɔ̂ semwol gwa gaba yi e lagwi. Gwa gaba e ra bak gwining e ji bebak betat wo nerɔt tanga wo lel nshi arɔng.

¹¹Rezâ gwotangacɛn o, à Kpashak. Bak gwining e ji bebak betat wo nshi mwa na tɛ́ ɛn kpashak, ko bemat pyak ba kushu, yaga ba sɔ nshi de na ga tɛ́ ɛn kpashak na nedɔm.

¹²Tom-lagwi wo nenaas a pɛl durum o mwɛ. Ko ba lashe bak gwining e ji bebak betat wo gwi, na wo pwɛl, na wo netangacɛn. Yaga ano, bak gwining e ji bebak betat wo negbey mɛn mwa wa tɛ́ ɛ mwangalang. Bak gwining e ji bebak betat wo nagwi na wo naturuk ba vɔk negbey wɛt.

¹³E bama mo, ma di kim hwak de wa sé tele e gwi. Ko ma wok gbɔng fwɔ̂ wɛ, wa ye, “Yaa kukuuk! Yaa kukuuk! Bemat de ba sé sangal e ji jey ba rɔda di gawey sizɔng! Bê di hɛ e jeng de bê wok toshô bedurum de bwang betom-lagwi betat vane ba sé yong ɛn na be pɛsɛl.”