Read berom Reto Fong Yohana 9 Bible Online

Reto Fong Yohana 9 - berom bible

Reto Fong Yohana 9

¹Tom-lagwi wo netungun a pɛl durum o mwɛ. Ko ma di tangacɛn hwak de wá kana gaba yi e lagwi vey e jey, ko ba nɔ̂ng wɛ makwili de wo wunta rwi revɔng de ra vɔk yɛnɛ wɛt.

²Jeng de tangacɛn o wa wunta rwi revɔng o, sekyeng sa hwo nunus yi e nû rɛ sede sekyeng yi e gwofwam de be rugut ɛ̀ dyam. Sekyeng o sa bang gwi mwa na jey.

³Ko rawal wa hwo nunus yi e ji sekyeng o, wa ye ship a jey. Ko ba nɔ̂ng wɛ reto na wo tabas sede lyāng.

⁴Ba yâng wɛ, wo wey na sɔng, kɛ cɔ́gɔt, kɛ kayɛ pyɛ de ye tabas e vwel wɛt. Ko ba simo a wɛ, na wo tak a vemo zɔng reyɔm de ba vɔk jɔt Dagwi e batili mɛn wɛt.

⁵Ba nɔ̂ng rawal o retô mɔbɔs bemat o wɛt, ko ba tik wɛ na wo tak a yɛn reyɔm zɔng yaga pɛl tungun. Nepêp reyɔm o na sé sede nepêp lyang de ya ta mwat.

⁶E jeng yane, bemat ba rɔda jāma ka yɛn a ku hyów, ko yɛn a rɔda sɛ̀ reku mo wɛt. Yɛn a rɔda simo ka ba ku zɔng, ko reku ra rɔda sè yikyik yi na yɛn.

⁷Ka sede mwat a di rawal wane mo, wa sé sede dwa de ba tɔrɔ wɛ wɔ e de como. Wa tɛ̀ pyɛ cak e ratô wɛ de ya sé sede kpîn negwɔm de ba yong na dyam shinang, ko bwang bayîs wɛ gwa sé sede gwô bemasi.

⁸Setôt ratô wɛ arɔng sa sé lis sede setôt beha, ko yìn wɛ ba sé vootot sede yìn begukum.

⁹Wa bang ragey wɛ na pyɛ cak de ya sé sede rugâ dyam. Ko bafabak wɛ ba ra lwɛ́lɛ sedesi, sede bekyɛkyɛ̂ como pyak de bedwa be hwɔlɔ vɛ na yol vɔk e de como.

¹⁰Wa vɔk rùm tanga ket tabas sede ve lyāng, ko a sé yi na rùm vane mo de wa vɔk reto na wo nɔ̂ng bemat rezot hê pɛl tungun vane mo.

¹¹Tom de a vɔk reto e ra revɔng de ra vɔk yɛnɛ wɛt a sé gwɔ̀m rawal o. Ko reza mɛ na relêm BeIbrani, à Abadɔn, ko na relêm BeGirik, à Apɔlyɔn wɔgɔ, mwât weres na pyɛ́.

¹²Gbɔng gawey hê mɛsɛng o ha ga kwey à wane, ko bwang gawey ha rɔngɔl e ngyen.

¹³Tom-lagwi wo netyiimin a pɛl durum o mwɛ. Ko ma wok fwɔ hwak de gwa nusu yi e bato-kwɔng banaas vê gàgbang rangâs pyɛ́ vɔk na Dagwi de ba yong wɛ na dyam shinang, womo de wa sé e nuyêl Dagwi.

¹⁴Fwɔ mo gwa hanat na tom-lagwi wo netyiimin de a vɔk durum o, gwa ye, “Viri betom-lagwi benaas vane de ba sé e rɔgɔs e bak Gwɔrɔt Ɛifaratɛs!”

¹⁵Ko ba hàla betom benaas vane mo de ba ga kana yong ɛn gyam yaga tyɛng jeng yane mo, ye tuk o, hê pwɛl o, gwô shey o arɔng. Ba hàla hɛn, yaga na yɛn a bin mɔbɔs bak gwining e ji bebak betat wo bemât jêy mwa.

¹⁶Ba ha a me nepyak bemât como vane mo e ra bedwa mɛn: Yɛn a sé miliyɔn naga beba (200,000,000).

¹⁷Bedwa tanga bemât laga vɛ de ba dura a me mo ba sé sede ngan: Ba bangas beragey mɛn na pyɛ́ cak de ya sé sede beruga dyam de bùm vɛ ba sé besinang sede kya, ba to sé wilwil, ko ba to sé mang-mang. Batô bedwa mo ba sé sede vê begukum, ko kya, na sekyeng, tanga kyâ negang ha tabas yi e nenu mɛn.

¹⁸Ko bak gwining e ji bebak betat wo bemât jêy mwa ba kushu yaga nepêp nezap rezot netat nane mo wɔgɔ, kya, na sekyeng, tanga kyâ negang.

¹⁹Bedwa mo ba sɛ̀ reto mɛn yi e nenu tanga rum mɛn. Rùm mɛn o ba sé sede begwɔ̄m de ba vɔk bato arɔng, ko e vɛ de be tak a bemat mɛ̀ reyɔm.

²⁰Ko bwang bemât jey de ba kushu yi na tumbang wane mo wɛt, ba doyo yi e pyɛ́ de yɛn pyɛ mɛn yɛn a ga ra wɛt. Yɛn a tik nà re a cēng tanga pyɛ̂ sekwit fongol wɛt. Bá yong pyɛ́ mo na vɔ mɛn na dyam shinang tanga dyam pyɛng, na dyam shi, na beta, tanga cɔ́gɔt arɔng. Ko pyɛ́ mo ye tɔk di, kɛ ye tɔk wok ha, kɛ ye tɔk kyě kyè arɔng wɛt.

²¹Ko bemat o ba to doyo na be tik negwɔn mɔbɔs bemat, na sâp cī, na nejwang, tanga shigi wɛt.