Read berom Rut 1 Bible Online

Rut 1 - berom bible

Rut 1

¹E jeng de Besuga Israyɛl bá sɛ̀ rɔ̌ vɔk nenuyêl BeIsrayɛl, vyong yá hwo e ji sevwel o. Mwat hwak wo pomô Bet-Lɛhɛm e sevwel yerê Yuda tanga hwā mɛ na nèy mɛn bewen o beba, bá kyè, bá ka wɔ̀ sangal e sevwel Mowap.

²Rezâ mwat o à Ɛlimɛlɛk, rezâ hwâ mɛ a Nawomi, ko nèy mɛn bewen neba mo, baza mɛn à Malɔn tanga Kiliyɔn. Yɛn á sɛ̀ yi e ruhûp Ɛfrat e Bet-Lɛhɛm e Yuda. Bá kyè wɔ e sevwel Mowap, ko bá sangal e hwomo.

³Ɛlimɛlɛk, rwâs Nawomi, a ku, a tik ɛ́ na bewen o.

⁴Yɛn a rá wenêng behwông Mowap, ba yila gwining a Ɔrpa ko hwak a Rut. E bama de yɛn a ga kana sangal e hwomo sede neshey kuru,

⁵ko Malɔn tanga Kiliyɔn mwa ba kushu arɔng. Ba tik Nawomi nju mɛ, vit a rwas, vit a nèy.

⁶Jeng de Nawomi a wok, Dagwi Darwey a ga sɛlɛ bemat mɛ, a ga nɔng ɛn pyɛ̂ re, a yong ɛ́, na a hala Mowap, na a to ɛ wɔ e vwel Yuda. Begel mɛ ba kyè tanga yɛ.

⁸Ba sé e gwong, ko Nawomi a yang ɛn, “Kawɛ min a toyo wɔ e lɔ neng-gwɔ mɛ. Tik na Dagwi Darwey a dura a yin nerat mɛ, sede remo de yin a ga dura a me tanga bekwɔ̌ beras min nerat!

⁹Tik na a nɔ̂ng kawɛ min lɔ̂ weneng rat.” Nawomi a kula hɛn e gèy ba man ranang, ko yɛn a takla na sesin,

¹⁰ba yang ɛ, “Wey, à neng-gwɔ, wot a rɔda dopɛ e hwo wɔ na bemat mō.”

¹¹Nawomi a toyo a yɛn, a ye, “Tō in, à behwóng hom. Yaga sɛ́ de yin ê dopɛ e me ɛ? Mê to tɔs nèy nehak de yin ê vɛ mɛ beras arɛt?

¹²To in zɔng! Di, ma ga kwop, mê tɔk to ra weneng wɛt. Ko ka ma ka bare sɛ̂t yey ha sé yaga me, ka ma ka ra weneng turuk yunung, na me pere tɔs nèy bewen,

¹³yin ê gyeng vɔk e jeng de ba ga vey bemat a? Yin ê kyɛm yin yɛklɛ hin sana ra weneng yaga yɛn a? Wey, à behwóng hom! Pyɛ de ma ga di, yin a ga di wɛt, yaga e me wɛ de Dagwi Darwey a sé tabak.”

¹⁴Ras de a ha ano, yɛn a to takla na sesin, ko Ɔrpa a kula gèy dekwop mɛ, a yang ɛ kala. Ko Rut a kyɛ́ ɛ pang na yɛ.

¹⁵Nawomi a yang ɛ, “Di, pwi mō a sé to ɛ wɔ̄ na bemat mɛ, na a raa dagwi mɛ. To o na pwi mō.”

¹⁶Ko Rut a toyo a yɛ, a ye, “Hwo shonong me wɛt, na me tik nà raa hwo, na me gas me na hwo. Kwɔn de hwɔ́ kyè vɔk ɛ, mê vɔk ɛ, kwɔn de hwô sangal ɛ, mê sangal ɛ, bemat mō bê sɛ̀ benang, Dagwi mō ê sɛ̀ Dagwi hom arɔng.

¹⁷Kwɔn de hwô ku ɛ, e hwomo de mê ku ɛ, ko kwɔn de bê lɛrɛ hwo ɛ, hɛ a kwɔn de bê lɛrɛ me ɛ arɔng. Vit a pyɛ cak de yê gas me na hwo sɛ̌ reku zɔng. Ka ano wɛt, ko tik na Dagwi Darwey a jut neken hom!”

¹⁸Sede Nawomi a di, Rut a ga tɛ̀ yêy kyé tanga yɛ, a vɛ̌ wey ɛ yuu.

¹⁹Yɛn beba ba re nuyel na kwɛngɛl, ba wɔ̀ wul Bet-Lɛhɛm. Sede ba pom, ko remo-remo há mo ha gwɔrɔ pomo mo mwa. Beha ba hwo tē, “E Nawomi a womo bɛ?”

²⁰Nawomi a hanat, a yang ɛn, “Yin yila me a Nawomi wɛt, wɔgɔ, Neta, ko be yila me a Reneng, yaga Dagwi Wo Reto Mwa a ga tɛ̀ yey hom ye reneng sizɔng.

²¹Me, ma kyè na nerey, ko a remo, Dagwi Darwey a ga toyo na me vɔ sǎn! Yaga sɛ́ de yin ɛ yila me à Nawomi ɛ? Dagwi Darwey, Dagwi Wo Reto Mwa, a ga nɔng me mā, a ga vey na gawey e ra me.”

²²Ano de Nawomi a vɛ hɛ yi e sevwel Mowap tanga Rut, gwel mɛ WoMowap. Yɛn a wul Bet-Lɛhɛm e pɛrɛ̂ bwâl baale.