Read berom Rut 2 Bible Online

Rut 2 - berom bible

Rut 2

¹Nawomi a vɔk cang lɔ rwas mɛ yi e lalâ Ɛlimɛlɛk de reza mɛ a Bowas. A vey mwat, ko a to vɔk vwɔ.

²Tuhak, Rut a yâng Nawomi, “Me simo me wɔ e de nemɔ̄ pyɛ́ e hwirî mwat de ê simo a me mɛ.” Nawomi a yang ɛ, “Ey ci, à hwóng hom”,

³ko Rut a kyè. A pom e hwiri hwak, a hwo raa bamâ bemât bwal, e ra nemɔ pyɛ́. Ko a gaba e wɛng, a vɛ̌ hwo e hwirî Bowas cang Ɛlimɛlɛk. Ko di tyɛng pyɛ de ya té:

⁴Bowas a vɛ̌ pom yi e Bet-Lɛhɛm. A kyul bemât bwal o, a yang ɛn, “Dagwi Darwey a sè na yin!” Yɛn a hanat a yɛ, ba ye, “Dagwi Darwey a tɛ̀ a hwo nerat arɔng!”

⁵Bowas a rangâl mwât nuyel bemât fwom mɛ, “E hwông lɔ wa à womo arɛt?”

⁶Mwat o a toyo a yɛ, a yang ɛ, “A sé hwâ BeMowap de á raa Nawomi vey e ngamo.

⁷A rangal, kɛ wot ê simo a ra nemɔ̄ pyɛ́ e tê bakûs baale e bamâ bemât bwal arɛt. Yimo gasi a sé gyeng, ko a ga ye jòp e buk kejeng tyɔng zɔng.”

⁸Ko Bowas a doyo wɔ̀ sɛ̀ Rut, a yang ɛ, “Wok, à hwóng hom, hwo wɔ̂ nemɔ̄ pyɛ́ e hwiri hwak wɛt. Hwo hàla hwiri gwomo wɛt, ko hwo raa behwông fwom hom bagat.

⁹Ra nemɔ bagat na kwɔn de bemat ba sé ra ɛ bwal, ko hwo raa behwông fwom o. Di, ma sé kyè wɔ̀ nɔ̂ng bemât fwom hom nu, yɛn a ra vwɔ e ra hwo wɛt. Ka hwà wok yêy hwɔshɔ, ko hwo wɔ̀ vɛ nshî sɔ e betsûng nshi de bemat o ba ga vos.”

¹⁰Jeng de Rut a wok ano, a gaba e cât bol Bowas, a yang ɛ, “E sɛ́ de ya tɛ̀, nemi mō na man na me, me de ma sé mwat duk ɛ?”

¹¹Ko Bowas a yang ɛ, “Ba ga ha a me mwa pyɛ́ de hwà ra a dekwop mo e bamâ rekû rwas mo. Hwà tik da mo, na neng-gwɔ mo tanga vwêl tɔ mo, na hwo vey sangal e ji yere dyuk de hwà kana tɔk yɛ wɛt.

¹²Tik na Dagwi Darwey a tala a hwo pyɛ́ de hwà ga ra. Yɛ Dagwi wo BeIsrayɛl, de hwà ba jāma kwɔ̂n dál na yɛ, a tala a hwo pyɔlɔ mo pyak!”

¹³Rut a yang ɛ, “À da, hwà ga dura a me nerat. Hwà tɛ̀ yey hom ye dyɛng yi na ha rat, mwa ano de ma ka sé hwak e ji behwông fwom mō wɛt.”

¹⁴Sede jeng rê pyɛ́ ya vey, Bowas a yila Rut, a yang ɛ, “Vey, na hwo re kpam-tuk, hwo raa hwó tɛ̀sɛ cɛ́k o e ji nshî anap ne jwaatat.” Ano kwong, Rut a wɔ̀ sangal e hagat na bemât bwal o, ko Bowas a nɔng ɛ pyɛ̂ yeneng de ba halang. Rut a re pyɛ́ mo, a sirik, a tik bwang o e hagat mɛ.

¹⁵Jeng de a sogo, na a re nuyel na fwôm nemɔ pyɛ́ mo, Bowas a nɔ̂ng bemat mɛ nu, a yang ɛn, “Tík in hɛ, na a ka ra nemɔ pyɛ́ e tê bakûs pyɛ́ mo arɔng. Yin ra a yɛ nu wɛt.

¹⁶Ko halsa hin batîn pyɛ́ mo cak yi e bamal o, ye gabsa, na a hashe. Yin shìsa hɛ wɛt.”

¹⁷Ano de Rut a ra nemɔ pyɛ́ e hwiri mo vɔk e nawiri. E bama mo, a dak pyɛ́ de a tula, ya wul sede shap jining.

¹⁸A tos pyɛ́ mo, a toyo e ji repomo, a dura a dekwop mɛ pyɛ́ de a sɛ̀ e de nemɔ pyɛ́ mo, ko a nɔng ɛ bwang pyɛ̂ re de ya tɛt ɛ.

¹⁹Dekwop mɛ a yang ɛ, “Hwà yî nemɔ mo e gwa yunung ɛ? E hwirî wa de hwà ra ɛ fwom ɛ? Dagwi a tɛ̀ a mwat wane, de nemi mɛ na man na hwo, nerat mɛ!” Ko Rut a ha a ye, a ra fwom e hwirî mwat hwak de reza mɛ à Bowas.

²⁰Nawomi a yang ɛ, “A remo ma tɔk, Dagwi Darwey a tik nà dura nerat mɛ na wot de wot a sé beken tanga bekwɔ̌ bemat arɔng wɛt. Tik na a dura a Bowas nerat mɛ!” Ko a re nuyel a misang a gwel mɛ, a yang ɛ, “Hwà tɔk pyɛ cak a! Mwat o a sé cang ye bagat na wot, a sé e ji vinde badu mot ba simo, na be jut nedirik mot.”

²¹Ko Rut a ye, “A to yang me, me raa bemât fwom mɛ bagat, sɛ̌ jeng de ba yɛnɛ bwâl pyɛ̂ mwa.”

²²Nawomi a yang ɛ, “A dal a hwo, à hwóng hom, na hwo raa behwông fwom mɛ. Ka sede hwà wɔ e hwiri hwak, gyɛng bê tak a hwo.”

²³Yaga ano, Rut a nàra pang na behwông fwôm Bowas, a ra nemɔ pyɛ́ vɔk e jeng de ba yɛnɛ bwâl baale na alkama arɔng. E bama mo, a sangal na dekwop mɛ e lɔ.