Read berom Rut 3 Bible Online

Rut 3 - berom bible

Rut 3

¹Tuhak, Nawomi a hwo yâng Rut, “À hwóng hom, a jam na me sɛ̀ a hwo lɔ̂ weneng, na hwo sɛ̀ pɔngɔ.

²Me ye, Bowas de hwà sé bagat na behwông fwom mɛ, a sé cang mot a? Di, a sé kyè wɔ̀ dak baale e gazu yunung e rwa wiri.

³Yaga ano, kus o, mɔmɔ hwo, na hwo tɛ̀ berugu mō, ko hwo kyè wɔ e gazu mo. Ko hwo simo a man bayis na hwo wɛt, jeng de a sé rɔɔ re pyɛ́ na sɔ̂ nshi.

⁴Ko bɛrɛng kwɔn de ê wɔ̀ dyɛng ɛ, ko jeng de a ga wɔ̂ nevwa, kyè wɔ̀ wunta pyɛ banga mɛ tyɔng, ko hwo dyɛng e cat bol mɛ. Yɛ a rɔda ha a hwo pyɛ de hwô ra.”

⁵Rut a hanat, a yang ɛ, “Mê ra mwa pyɛ de hwà ha a me.”

⁶Ano kwong, a kyè vɔk e gazu, ko a ra tyɛng pyɛ de dekwop mɛ a ga kana nɔng ɛ nu e ra yɛ.

⁷Bowas a re, a sɔ, a sé wok neta, ko a kyè wɔ̀ dyɛng e vwâ kwonot celes pyɛ́ mo. E bamâ jeng, Rut a bɔrɔs yaang yaang wɔ e kwɔn o, ko a wunta pyɛ bangâ Bowas yi e rwa cat bol mɛ, a dyɛng e hwomo.

⁸E rwa nakabadem, Bowas a hwo vow yaga gul, a doyo, ko — Àaa! Hwā e dyɛngɛ e rwa cat bol mɛ!

⁹A rangal, a ye, “E wa arɛt?” Ko Rut a ye, “À da, e me Rut. Pat a me lɛ́ng. Hwà sé e ji vinde badu ba simo, na hwo jut nedirik hom.”

¹⁰Bowas a hanat, a yang ɛ, “Dagwi Darwey a tɛ̀ a hwo nerat, a hwóng hom. Pyɛ de hwà ra a remo ya dura wuna de hwà wuna to mō e sangal na belɔ dekwop mō ya dal pyɛ́ de hwà ga kana ra vey e jeng yemo. Hwà yâng tɔk kasa hwak e ji bebot-bemat, bepɛng kɛ bedaberey ayi, ko hwà rá ano wɛt.

¹¹Ko di, hwo kwon bɔrɔk yey mō wɛt. Mê ra a hwo pyɛ de hwà rangal, yaga kawɛ mwat e ji repomo mo a tɔk, hwà sé hwā rwat.

¹²A sé tsak o de ma sé cang ye bagat de mê jut nedirik mō, ko cang o cak ya sé de ya dal na nebagat.

¹³Pɔl e ngamo. Nagasi wot ê de wok, ka sede ê jut nedirik mō, ko gyat à wane, tik na yɛ a ra. Ko ka sede ê ra wɛt, ma sira na Dagwi Darwey de a sé kwen, me, ma rɔda ra ano. Gyeng sɛ̌ gasi.”

¹⁴Ano de a dyɛng e cât bol mɛ sɛ̌ rwa hwol gasi. A sogo gyam jey ye sɛ̀ rɔngɔl mwangalang de be tɔk di bayîs mwat wɛt, yaga Bowas a simo na be tɔk, hwā á vey e gazu wɛt.

¹⁵Gyam Rut a kyè, Bowas a yang ɛ, “Vey na pyɛ banga mō, ko hwo kaba yɛ.” Ano de a kaba yɛ, ko Bowas a mara a yɛ baale e shǐ zang kuru na hɛ ba, a tos ɛ mɛ, ko a toyo vɔk e ji repomo.

¹⁶Rut arɔng a kyè vɔk e lɔ. Jeng de a pom, dekwop mɛ a rangal hɛ, a ye, “Yin a ra mɛ e rɛ̌, a hwóng hom ɛ?” Ko Rut a ha a yɛ mwa pyɛ́ de Bowas a ra a yɛ.

¹⁷A to ye, “A yang me, me to me vɔ sǎn vey sɛ̀ o wɛt. Yaga ano, a nɔng me mwa baale womo.”

¹⁸Ko Nawomi a ye, “Sangal, na hwo gyeng pyɛ de yê té, yaga mwat o ê pɔnglɔ wɛt, sɛ̌ a yong ɛ̀ kayɛ pyɛ yunung.”