Read berom Rut 4 Bible Online

Rut 4 - berom bible

Rut 4

¹Bowas a ga kana kyè vɔk e kwɔn de be ragas ɛ badu e rwi pomo, ko a sangal e hwomo. Jeng de a di cang de a ga kana ha a Rut, a sɛ̀ kwey, a yila hɛ, a yang ɛ, “À gwà, ye rɛng e ngamo, na hwo sangal.” Ko gwà mɛ mo a hwo sangal.

²Bowas kwong a to yila bemakuk kuru vê repomo mo, a tɛ̀ ɛn be sangal e kwɔn o arɔng. Jeng de ba sangal,

³a hwo yâng cang mɛ mo, “Hwà tɔk, Nawomi a ga toyo yi e sevwel Mowap, ko e simo a nɔ̂ng mwat hwak jût nedirîk nap de wa sé wo cang mot Ɛlimɛlɛk.

⁴Yaga ano, ma di a jam, na me ha a hwo pyɛ de ya sé kyè. Ma ye ngan: Hwo sey nap o e nuyel bemakuk kuru de ba sé e ngamo e tɔ̂ bemɛn mwa e ji bemat mot. Ko ka sede hwā sey wɛt, ha a me, na me tɔk, yaga vit a mwât jût nedirik o sɛ̌ hwo e ngyen, ko me, me raa hwo.” Ko cang mɛ mo a yang ɛ, “Mê sey.”

⁵Bowas a ye, “Ko di, tuk de hwà ba sey nap o yi e vwɔ̂ Nawomi tanga Rut, ko hwô to jut nedirîk Rut, kuma yi e Mowap, na hwo ye cik a yerê kwɔ̌ mwat mɛ, na yɛ a bin vɔk nap o.”

⁶Ko cang mɛ mo a ye, “Mê tɔk sey wɛt, yaga yê gworok hâ nedanelɔ hom. Hwo, hwo sey yɛ, yaga mê kyɛm wɛt.”

⁷Ko di, e jeng yane, negwɔn BeIsrayɛl e ra rehâ sey kɛ sege pyɛ̂ nedanelɔ cak a net: Mwat de ê nɔng, ê pat kpatak mɛ, ko ê nɔ̂ng mwât sey o. Gwong a gwane de bê dura mɛ, ba ga yɛnɛ kayɛ pyɛ.

⁸Ano kwong, jeng de cang ye bagat o a yâng Bowas, “Hwo sey yɛ!” Ko a pat kpatak mɛ, a nɔ̂ng Bowas.

⁹Ko Bowas a yâng bemakuk na bwâng bemat de ba sé e kwɔn o, “Yunung yin a sé vê nuha, ma ga sey yi e vwɔ̂ Nawomi nedirîk mwa pyɛ́ de ya sé yê Ɛlimɛlɛk, na yê nèy mɛ Kiliyɔn tanga Malɔn arɔng.

¹⁰Ano arɔng, ma ga jut Rut, WoMowap, hwâ kwɔ̌ Malɔn, a tɛ́ ɛ hwā hom, yaga na me ye mɛ̀ cik a yere mɛ, na yɛ a bin vɔk nap o. Ano rezâ Malɔn rê wey e ji begwa mɛ kɛ e repomo mɛ wɛt. Yin vɛ à bemât nuha hom yunung.”

¹¹Mwa bemakuk na bwang bemat de ba sé e kwɔ̂n badu mo ba ye, “Wot a sé bemat nuha. Tik na Dagwi Darwey a tɛ̀ hwā de hwà vo mo a vɔk nèy sede Rahɛl tanga Leya, yɛn de ba bene mwa BeIsrayɛl. Tik na hwo sɛ̀ nerey e ji ruhûp Ɛfrat, na hwo vɔk reza e ji pomô Bet-Lɛhɛm.

¹²Tik na nèy de Dagwi Darwey ê nɔng o yi na hwā womo ne tɛ̀ lɔ mō, he sɛ̀ sede hê Pɛrɛs de Tamar a tɔ a Yuda.”

¹³Ano de Bowas a vo Rut, a tɛ́ ɛ hwā mɛ, ko Dagwi Darwey a tɛ̀, a sey jim, a tɔ̀ hwey wen.

¹⁴Ko beha ba yâng Nawomi, “Bē somo Dagwi Darwey! A nɔng o yunung mwat de ê jut nedirik mō. Tik na hwey o he vɔk reza e ji BeIsrayɛl!

¹⁵Hwey o hê tɛ́ ɛ womo de ê to turu hwo, na a sɛlɛ hwo e ji sekwopa mō, yaga a sé gwel mō de a tɛ̀ yey na hwo de a tɔ ɛ. Mwin, a dal a hwo nèy bewen netaama!”

¹⁶Ano kwong, Nawomi a sey hwey o, a gunung hɛ e gèy, ko a ras hɛ sede hwey mɛ.

¹⁷Ko behâ vwara mɛ ba ye, “Ba ga tɔ a Nawomi hwey!” Ko ba vo a hɛ rezâ Obet. Obet a tɛ́ ɛ dâ Yɛsɛ de hwey mɛ à Davit, Gbɔng Gwɔ̀m BeIsrayɛl.

¹⁸Yére Pɛrɛs a yet ngan: Hesron, na Ram, na Aminadap, na Nashon, na Salmon, na Bowas, na Obet tanga Yɛsɛ. Ko Yɛsɛ yɛ wɛ a dâ Davit.