Read berom 1 Samwɛl 1 Bible Online

1 Samwɛl 1 - berom bible

1 Samwɛl 1

¹Mwat hwak á sè e Rama, e bak vwêl berahwôl Ɛfrayim, reza mɛ à Ɛlkana Yeroham Ɛlihu Tohu, yi e ruhûp Zuf, yerê Ɛfrayim.

²Á vɔk beha beba, yɛn vɛ à Hana tanga Penina. Penina á vɔk nèy, ko Hana á sè sang-gwon.

³Kahɛ shey yɛ e kyese re a Dagwi Darwey Da Jey Mwa fongol, na a to nása a yɛ nɔrɔ yas de be yɛt e Shilo. Kwɔn a hane de nèy Ɛli neba, Hɔfni na Pinehas bá ra fwôm bepiris Darwey.

⁴Sede jeng o ya vey, Ɛlkana a wɔ̀ nára nɔrɔ mo vɔk na Dagwi. Ko Ɛlkana e gas a belɔ mɛ cûng nama, a nɔ̂ng hwā mɛ Penina tanga nèy mɛ bewen na behwong nu mo mɛn.

⁵Ko e nɔ̂ng Hana nu mo rey o, yaga a dal na tɛ̂ yey na yɛ, mwa ano de Dagwi Darwey a bang jim mɛ.

⁶Ko yaga remo de Dagwi Darwey a tɛ̀ ɛ a sé sang-gwon, pwi mɛ a dopse ragas hɛ, yaga na a lashe yey mɛ.

⁷Pyɛ yane ya dopse té nesheneshey. Kayɛ jeng de Hana a wɔ́ e duk rê fongôl Dagwi Darwey, ko pwi mɛ mo e ragas hɛ. E gasi mo, Hana a tosho, a vɛ̌ tik rê pyɛ́.

⁸Rwas mɛ Ɛlkana kwong a yang ɛ, “À Hana, yaga sɛ́ de hwó tosho arɛt? Yaga sɛ́ de hwó kyɛ́ o nà re pyɛ́ arɛt? Yaga sɛ́ de hwó sangal lashê yey arɛt? Hwà tɔk, ma dal a hwo nèy bewen kuru wɛt arɛt?”

⁹Jeng de yɛn a ga yɛnɛ re na sɔ e Shilo, ko Hana a hwo sogo, a nára to mɛ e nuyel Dagwi Darwey.[1] Ko di, Ɛli, piris kwong a sé sangal e ra pyɛ sangal e vwâ rwi duk rê fongol. Yêy Hana ya lashe hɛ, ko a tosho sizɔng, a sé ra won na Dagwi Darwey.

¹¹A sira hɛ, a ye, “À Dagwi Darwey Da Jey Mwa, doyo bayis mō, na hwo di me, sam mō! Bare na me e ji lashê yey! Hwo kwon ye bam à me wɛt! Ka sede hwô nɔng me hwêy wen, ko ma rɔda to nɔng o hɛ vɔk e yɛnɛ̂ sangâl neken mɛ. Ba rɔda ra ɛ́ na bâ hwon wɛt”.[2]

¹²Jeng de a sé re nuyel na râ won e nuyêl Dagwi Darwey ano, ko Ɛli a sé bɛrɛng nu mɛ.

¹³Hana mo a sé ra won yaang yaang, nu mɛ he tē ngyɛ̀m-ngyɛm, ko ba tɔk wok fwɔ mɛ wɛt. Ko Ɛli a bare, rɔ̌ a sé feng siring.

¹⁴A hwo yang ɛ, “Hwó re nuyel na sefeng mō mo vɔk e gwa ɛ? Tik fêng siring mo wane!”

¹⁵Hana a toyo a yɛ, a ye, “A sé ano wɛt, à da. Di, ma sé hwā de ma vɔk pyɛ de ye bɔrɔk me e yey. Ma ga sɔ nshi anap kɛ pyɛ feng cak wɛt, ko ma sé nára pyɛ de ye bɔrɔk me e nuyêl Dagwi Darwey.

¹⁶Hwo jut me, sam mō, sede hwā vwes wɛt! Ma sé ra won mwa jeng yemo na lashê yey ding-ding.”

¹⁷Ko Ɛli a yang ɛ, “Kyè tyang, yey mō ye dyɛng! Tik na Dagwî BeIsrayɛl a nɔng o pyɛ de hwà rangal hɛ.”

¹⁸Ko hwā mo a ye, “Tik na me sɛ̀ nerat yi na hwo.” A hwo sogo, a wɔ̀ sɛ̀ pyɛ́, a re, ko bayis mɛ ba viri hɛn, a to bɛɛ rìshish wɛt.

¹⁹Nusu gasi het ba sogo, ba re a Dagwi Darwey fongol. E bama mo ba vo gwong wɛrɛn e lɔ e Rama. Ɛlkana kwong a man na hwā mɛ Hana, ko Dagwi Darwey a bare na yɛ.

²⁰E jeng yane kwong, Hana a sey jim, ko a vɛ̌ tɔ hwey wen o. A vo a hɛ rezâ Samwɛl, ko a ye, “Ma ra won mɛ na Dagwi Darwey.”

²¹Jeng ya to vey de yɛ Ɛlkana tanga belɔ mɛ ba rɔda kyè vɔk e Shilo, na be nára nɔrɔ̂ yas de be yɛt vɔk na Dagwi Darwey ye kahɛ shey, na a bin sila mɛ sira de a ga ra a Dagwi.

²²Ko Hana a tɔk wɔ wɛt. A yâng rwas mɛ, “Sɛ̌ jeng de ma kang hwey o, ko ma rɔda ba wɔ́ mɛ e kwɔ̂n rê fongôl Dagwi Darwey, na a vɛ̌ sangal ɛ̀ e hwomo.”

²³Ko rwas mɛ a yang ɛ, “Rá pyɛ de hwà di zɔng, gyeng sɛ̌ jeng de hwà kang hɛ. Tik na Dagwi Darwey a sila ha mɛ.” Ano kwong, Hana a ngas hwey o, sɛ̌ jeng de a kang hɛ.

²⁴Bama de a ga kang hɛ, a jut hɛ vɔk e Shilo, a vɔk ɛ mus rɔndɔng wo neshey netat,[3] na nemuk alkama e gwokwɛt, tanga bura de be vɔkɔs ɛ nshi anap. A kyè mɛ̀, na hɛ vɔk e duk Dagwi Darwey e Shilo, mwa ano de há rɔngɔl kekwey kesɛl o.

²⁵Bama de ba ga yɛrɛ mus o, yɛn a hwo vey na hwey o na Ɛli.

²⁶Hana a yang ɛ, “Di, à da! Hwà tɔk bare na me, hwā womo de á kana tumal e ngamo, á sè rá won na Dagwi Darwey wɛt a?

²⁷Ma kana ra won na yɛ, a nɔng me hwey wen, ko di, a ga nɔng me hɛ — a hemo!

²⁸Yaga ano, ma to sé nɔ̂ng Dagwi Darwey hɛ. Hê tɛ́ ɛ hê Dagwi Darwey vɔk e yɛnɛ̂ nekên hɛ”. Ko yɛn a re a Dagwi Darwey fongol e hwomo.