Read berom 1 Samwɛl 10 Bible Online

1 Samwɛl 10 - berom bible

1 Samwɛl 10

¹Samwɛl a hwo jut kefus něy, a shushu mɛ Saul e rato, a gunung hɛ e ragey, ko a yang ɛ, “Di, Dagwi Darwey a ga shushu hwo na něy, na hwo tɛ́ o gwɔ̀m bemat mɛ BeIsrayɛl. Hwà rɔda re negwɔm e ra yɛn, hwà rɔda sey ɛn yi e vɔ bemât repugu mɛn vemo de ba rɔnɔ hɛn. Di, pyɛ́ de ya rɔda dura, Dagwi Darwey a ga kasa hwo, na hwo re negwɔm e ra bemat mɛ, à yet ngan:

²Sede hwà gas o yi na me yunung, ko hwà rɔda man na bemat beba bagat na sak Rahɛl e Zɛlza e ji vwêl Bɛnyamin. Yɛn a rɔda ha a hwo, bemadûng da mō vemo de ba vuru hɛn o ba ga sɛ̀ vɛ. Da mō a sé sap hâ vɛ wɛt, ko a sé sap ha mō, e rangsal, e tē, ‘Mê ra sɛ́ rehâ hwey hom ɛ?’

³Hwà rɔda re nuyel na kwɛngɛl yi e hwomo, sɛ̌ hwà wɔ wul retîn cɔgɔt ouk e Tabor. Hwà rɔda man na bemat betat wɔ e kwɔ̂n re a Dagwi Darwey fongol e Bet-Ɛl. Gwining a vɔk ɛ nevyel nesi netat, gwining a vɔk ɛ bagat kpam-tuk batat, ko gwining a vɔk ɛ bura de be vɔkɔs ɛ nshî anap.

⁴Yɛn a rɔda kyul o, ko bê to nɔng o bagat kpam-tuk baba, hwà rɔda sey vɛ yi na yɛn.

⁵“Yi e hwomo hwà rɔda kyè vɔk e rahwôl Dagwi e Gibeya, kwɔn de BeFilisti ba tɛ̀ bǔk como mɛn. E hwomo, hwà rɔda man na keregyɛng bezarap Dagwi, ka sé gyirik yi e kwɔ̂n nása pyɛ́ vɔk na Dagwi. Ka sé ra jɔgɔ, ba sé ra yōm shǐ, na kebing, na ju, tanga yōm kwo, ko ba sé tē lōm, ba sé yis na ha buu.

⁶Ko e ji jeng o, gabîk Dagwi Darwey ha rɔda kaba hwo, hwà rɔda wuna hwo tanga yɛn e ji rɛɛ na yis na ha mo, ko hwô tɛ́ o mwat hwak detu.

⁷Jeng de pyɛ̂ dura yane ya té ano, kayɛ pyɛ de ya vey yè rá, tik na hwo ra yɛ, yaga Dagwi a sé tanga hwo.

⁸“Hwà rɔda tānga kyè e ra me vɔk e Gilgal. Ko di, ma rɔda wɔ̀ sɛ̀ o e hwomo, ma rɔda wɔ̀ nára nenɔrɔ̂ yas de be rangas burang, tanga nenɔrɔ̂ saà tyang vɔk na Dagwi. Hwà rɔda gyeng e hwomo nepɔlɔ netaama, sɛ̌ ma vey, na me dura a hwo pyɛ de hwô ra.”

⁹Jeng de Saul a doyo yi na Samwɛl, ko Dagwi a vɛ̌ sege yey mɛ. Pyɛ́ mo ya té tyɛng na há de Samwɛl a ha a yɛ tuk hane mo.

¹⁰Jeng de yɛn a wɔ̀ wul Gibeya, ko a man na keregyɛng bezarap Dagwi. Remo-remo, gabik Dagwi ha kaba hɛ, ko a vɛ̌ wuna hɛ na yɛn e ji rɛɛ, na tē lōm tanga yis na ha buu, a tɛ́ ɛ gwining e ji mɛn.

¹¹Jeng de mwa bemat de ba kana tɔk ɛ, ba di de a sé yis na ha buu tanga bezarap o, ba rangsâl bemɛn, ba tē, “Hàa! Sɛ́ ya ga té na hwêy Kish ɛ? Saul a sé hwak e ji bezarap Dagwi arɔng arɛt?”

¹²Mwat hwak e hwomo a ye, “Wa a tɔk da mɛn ɛ?” A sé yi e hwomo de ba sɛ̀ cinât ha yane wɔgɔ, “Saul a sé hwak e ji bezarap Dagwi arɔng arɛt?”

¹³Bama de a yɛnɛ zarap e gwong gwane, a hwo tut vɔk e kwɔ̂n nása pyɛ́ vɔk na Dagwi e rahwol.

¹⁴Gwà da mɛ a di ɛ tanga mwât fwom mɛ, a rangal hɛn, a ye, “Yin a yi e gwa ɛ?” Saul a toyo a yɛ, a ye, “Wot a yi e de jamâ bemadung ó. Jeng de wot a tɔk sɛ̀ vɛ wɛt, wot a vɛ̌ kwey wɔ na Samwɛl.”

¹⁵Gwà da mɛ mo a hwo to yang ɛ, “Ha a me pyɛ de Samwɛl o a há a yin.”

¹⁶Saul a yang ɛ, “A ha wɔgɔ, ba ga sɛ̀ bemadung ó.” Ko a ka ha a yɛ reha de Samwɛl a ha e ra rê negwɔm de a rɔda re wɛt.

¹⁷Samwɛl kwong a yishi bemât mwa be tula hɛn e nuyêl Dagwi Darwey e Mizpa.

¹⁸A yang ɛn, “Wok in pyɛ de Dagwi Darwey, Dagwî BeIsrayɛl a ha, ‘E me de ma ga pat in yi e sevwêl Misra, ma ga sey in yi e vwɔ̂ BeMisra na bemat mwa de ba tak a yin reyɔm.’ ”

¹⁹Samwɛl a re nuyel, a ye, “Di in, yunung yin a kyɛ́ in Dagwi min de a ga sey in yi e ji reyɔm na negbang min, ko yin a ye, me nɔ́ng in gwɔ̀m. A remo, vey dura bato min e nuyêl Dagwi Darwey e yere min na ruhup min.”

²⁰Samwɛl a tɛ̀ bemât nuyêl yére Israyɛl mwa ba gwɛ̌ sek bagat, ko ba kasa na masâ sesek, ha gaba e ra yerê Bɛnyamin.

²¹Ano arɔng, a tɛ̀ bedanelɔ rùhup yerê Bɛnyamin ba gwɛ̌ sek bagat, ko masâ sesek ha gaba e ra ruhûp Matri. Ko mwa berâs ruhûp Matri ba gwɛ̌ sek bagat,[7] ko masâ sesek ha gaba e ra Saul, hwêy Kish. Ba hwo jāma Saul o, ko ba tɔk di ɛ wɛt.

²²Yɛn a hwo rangâl Dagwi Darwey, “Mwat o hwak a rɔngɔl ɛ̀ a?” A yang ɛn, “Á wane a wɔ̀ lɛrɛ hɛ e ji pyɛ́ de ba tula.”

²³Ba tele, ba wɔ̀ jut ɛ, ba vey mɛ. Jeng de a tumal, ko a dal bwâng bemat na nelis, yi e batô vɔ mɛ.

²⁴Samwɛl a yâng bemat mwa, “Di in, mwat a womo de Dagwi Darwey a ga kasa! Vit a hwak de a sé tyɛng na yɛ e ngamo.” Bemat mwa ba gbɔ, ba ye, “Nekên gbɔng gwɔ̀m ne ros!”

²⁵Ko Samwɛl a hwo ha a bemat yerê tom de yɛn ê ra a gbɔng gwɔ̀m mɛn, mwa na yerê tom de gbɔng gwɔ̀m o a rɔda ra a yɛn arɔng. A jɛk vɛ̀ e ji bwok-basa, ko a tik gwɛ e kwɔ̂n re a Dagwi Darwey fongol. E bama mo, a tɛ̀ bemat e gwong, kawɛ mwat a kyè vɔk e lɔ mɛ.

²⁶Saul arɔng a kyè vɔk e lɔ mɛ e Gibeya. Bemat beting behak vemo de Dagwi a ga ra neyey mɛn ba kyè tanga yɛ.

²⁷Ko bemât zɔng o behak ba ye, “Mwat womo a rɔda tɔk sey ot e rɛ̌?” Yɛn kwong ba byɛs ɛ, yɛn a ka vey nɔng ɛ nɔrɔ wɛt. Ko Saul a sangal pyɛ mɛ yuu.