Read berom 1 Samwɛl 11 Bible Online

1 Samwɛl 11 - berom bible

1 Samwɛl 11

¹Nahash, gbɔng gwɔ̀m BeAmɔn, a wɔ̀ gwɔrɔ repomô Yabɛsh e bak vwêl Gileyat na como, ko bemât Yabɛsh o ba yang ɛ, “Tik na wot wuna hot na sira, ko wot a rɔda hów a hwo.”

²Ko Nahash a yang ɛn, “Pyɛ de wot a rɔda wuna hot na sira na yin a yet ngan: Ma rɔda pat a kawɛ mwat yis mɛ hê vwɔ yege, na me bin tɛ̀ pyɛ byɛnɛng e ra mwa BeIsrayɛl.”

³Bemakûk Yabɛsh ba yang ɛ, “Nɔng ot pɔlɔ taama, yaga na wot bin tomo e ji neyɛnɛ̂ vwêl Israyɛl mwa. Ka sede wot a sɛ̀ mwat de a rɔda sey ot wɛt, ko wot a rɔda ba nɔng o bato mot.”

⁴Jeng de betom o ba wul Gibeya, repomo de Saul a sangal ɛ, ko ba ha a yɛn há mo. Bemât mwa ba hwo tosho sizɔng.

⁵E jeng yane, Saul á sè toyo yi e cap na behywarak mɛ, a hwo rangal, “E sɛ́ de ya té, de bemat be tosho ano ɛ?” Ko ba ha a yɛ rehâ bemât Yabɛsh.

⁶Jeng de Saul a wok há hane, gabik Dagwi ha kaba hɛ, shom ya sogo a yɛ ding-ding.

⁷A hwo jut behywarak beba, a yɛt vɛ, a cɛgɛt banama mo, a tomo mɛ betom vɔk e neyɛnɛ̂ sevwêl Israyɛl mwa. A ye, “Kawɛ mwat de a nusu, na a raa Saul tanga Samwɛl wɛt, ba rɔda ra ano na berɔndɔng mɛ!” Bemat ba wok bengyip pyɛ de Dagwi Darwey ê tɔk ra a yɛn, ko yɛn a vɛ̌ nusu mwa myak.

⁸Saul a tula hɛn e Bɛzɛk, BeIsrayɛl bá sè gu naga batat (300,000), ko vê Yuda gu kuru batat (30,000).

⁹Ba yâng betom Yabɛsh o, “Kyè wɔ̀ ha in a bemat min wɔgɔ, gyam na gwi gwo ba vey e tē nahwol, ba ga kana sey ɛn yi e vwɔ̂ Nahash.” Jeng de bemât Yabɛsh ba wok ano, yɛn a vɔk yey pyɛng sizɔng.

¹⁰Yɛn a yâng Nahash, gbɔng gwɔ̀m BeAmɔn, “Wot ê ba nɔng in bato mot nahwol, na yin ra na wot pyɛ de ya jam a hwo.”

¹¹Nakabadem, Saul a hwo gas bemat mɛ bagyɛng o batat, ko e rwa hwôl gasi yɛn a wɔ̀ hwo e ra bǔk comô bemât repugu mɛn. Ba wey na yɛn, ba mɔbɔs hɛn gyam gwi gwo vey e tē. Bwang o gwomo de gwa dal, gwa kyě tele shaam, ba tɔk di bemat beba e kwɔn hining wɛt.

¹²Ko BeIsrayɛl ba hwo yâng Samwɛl, “Bemat a vɛ̌ de ba ga ye, Saul a rɔda sè gwɔ̀m mot arɛt? Be vey na yɛn e ngamo, na wot mɔbɔs hɛn!”

¹³Saul kwong a ye, “Ba rɔda mɔrɔ mwat hwak yunung wɛt, yaga a sé tuk de Dagwi Darwey a sey BeIsrayɛl!”

¹⁴Ko Samwɛl a yâng bemat, “Vey in a wot, na wot wɔ́ e Gilgal, na wot wɔ tɛ̀ negwɔm.”

¹⁵Ano kwong, bemât mwa ba wɔ̀ man, ba tula hɛn e Gilgal. Ko e hwomo, e kwɔn re a Dagwi Darwey fongol, ba tɛ̀ Saul, a tɛ́ ɛ gbɔng gwɔ̀m. Ba nása nenɔrɔ yas de be yɛt tanga nenɔrɔ̂ sangal netyang vɔk na Dagwi Darwey. Ko Saul tanga mwa BeIsrayɛl ba ra nzem na yey pyɛng sizɔng.