Read berom 1 Samwɛl 12 Bible Online

1 Samwɛl 12 - berom bible

1 Samwɛl 12

¹Samwɛl a yâng BeIsrayɛl mwa, “Di in, ma ga wet betong na ha min, ma ga tɛ̀ a yin gwɔ̀m de ê re negwɔm e ra yin.

²A remo di, yin a ga sɛ̀ gwɔ̀m de a rɔda kyè e nuyel min. Me a remo ma ga kwop, ma ga vungu rato na shɔlɔ. Ma kana sè mwât nuyel min yimo me rɔngɔl bwot o vey e yunung, ko nèy hom a nane na sé tanga yin.

³Di in, me simo yin ha gyam e ra me e nuyêl Dagwi Darwey tanga mwat de a ga kasa: Ka sede ma ga sey ɛ rɔndɔ̂ng mwat hwak, kɛ madung mɛ, kɛ ma ga mɔt mwat hwak, kɛ ma ga ngyigit hwak, kɛ ma ga sey pyɛ na ye bang a me bayis ɛ, ko ha in nuha mo. Ka sede ma ra pyɛ́ cak ano, ko ma rɔda tala.”

⁴Yɛn a toyo na ha, ba ye, “Wey, hwà ga mɔt mwat hwak, kɛ hwà ga ngyigit mwat hwak wɛt, ko hwà ga sey ɛ pyɛ cak yi na mwat hwak arɔng wɛt.”

⁵Samwɛl a yang ɛn, “Dagwi Darwey a sé wo nuha hom yunung, ko mwat de a kasa a to sé wo nuha hom arɔng, wɔgɔ, yin a sɛ̀ me na pyɛ cak wɛt!” Yɛn a yang ɛ, “Ey, yɛ a sé wo nuha mot.”

⁶Samwɛl a to ye, “Dagwi Darwey yɛ de a kasa Mose na Aharon womo de a pat bedabeda min yi e Misra, yɛ wɛ a sé mwât nuha.[8]

⁷A remo, tumal hin, ma rɔda ha a yin e nuyêl Dagwi Darwey, mwa tomong rey de a kana ra, na a sey in mwa na bedabeda min.

⁸“Jeng de Yakɔp na belɔ mɛ ba wɛrɛn e sevwêl Misra, BeMisra ba tak a yɛn reyɔm, ko bedabeda min ba tosho a Dagwi Darwey. Yɛ kwong a wok sesin mɛn, a hwo tomo a yɛn Mose na Aharon, vemo de ba pat ɛn yi e hwomo, ba vey tɛ̀ ɛn, be sangal e ji vwel hemo.

⁹Ko yɛn a ye bam a Dagwi Darwey, Dagwi mɛn. Yaga ano, a nára hɛn e vwɔ̂ Sisera, wo nuyêl como wo repomô Hazor, na e vwɔ̂ BeFilisti, tanga e vwɔ̂ gwɔ̀m Mowap, vemo de ba tó como, ba re ɛn.

¹⁰Yɛn a tosho a Dagwi Darwey, ba ye, ‘Wot a ga ra a hwo banɛn, yaga wot a ga hala hwo, ko wot a re a bedagwî bemat beduk, vɛ à Baal na Astarte, fongol. Gabɔk wɛt, sey ot yi e vwɔ̂ bemât repugu mot, ko wot a rɔda raa hwo, na wot re a hwo fongol.’

¹¹Dagwi Darwey a tomo bemât sey in, yɛn à, Gidɛyɔn, na Barak,[9] na Yɛfta, tanga me arɔng. Wot a sey in e jeng detidetu yi e vwɔ̂ bemât repugu min de ba gwɔrɔ hin. Yaga ano, yin a sangal tyang e ngamo.

¹²Ko jeng de yin a di Nahash, gwɔ̀m BeAmɔn, á kyè vey hwo in na como, ko yin a kyɛ́ in Dagwi Darwey de a sé gwɔ̀m min, ko yin a ye, ‘Nɔ́ng ot gwɔ̀m de ê re negwɔm e ra wot.’

¹³Di in, gwɔ̀m a womo de yin a kasa. Yin a rangal, be nɔng in, ko Dagwi Darwey a ga nɔng in.

¹⁴Kayɛ pyɛ ya rɔda kyè naka, ka sede yin a nɔ̂ng Dagwi Darwey nerey, yin a re a yɛ fongol, yin a wok ha mɛ, na yin gyeng badu mɛ, ka sede yin, na gwɔ̀m min, yin ê raa hɛ.

¹⁵Ko ka sede yin a kyɛ́ in nà wet betong na hâ Dagwi Darwey, ko yin a kyɛ́ in nà raa ha mɛ, yɛ kwong a rɔda doyo, na a ra repugu na yin tanga gwɔ̀m min,[10] sede remo de a ra na bedabeda min.

¹⁶“A remo kwong, tumal hin zɔng, yin a rɔda di gbɔng pyɛ de Dagwi Darwey a rɔda ra e bayis min.

¹⁷Yin a tɔk tê zɛng a hemo da? Ko tik, ma rɔda ra won, Dagwi Darwey ê tomo na gworwak na lulûm gbara. Ko jeng de pyɛ yemo yê té, yin a rɔda tɔk, yin a ga ra a Dagwi Darwey gbɔng pyɛ vyes de yin a ye, be nɔng in gwɔ̀m.”

¹⁸Samwɛl a hwo ra won, ko Dagwi Darwey a tɛ̀ rwak wa hwo rop na lulum na gbara e tuk hane. Ko bemat mwa ba vɛ̌ wok bengyip Dagwi Darwey tanga ve Samwɛl.

¹⁹Ba yâng Samwɛl, “Gabɔk wɛt, ra a wot, besam mō, won na Dagwi Darwey, Dagwi mō, yaga wot ê kwon kushu. Wot a tɔk, wot a ga ragas banɛn zang pyak, a kat mɛ wot a to gwɛ̌ remo de wot a rangal, be nɔng ot gwɔ̀m.”

²⁰Samwɛl a yang ɛn, “Yin wok bengyip wɛt. Mwa ano de yin a ga ragas pyɛ́ vyes yemo ano, ko yin kwon doyo bama min yi na Dagwi Darwey wɛt. Tik na yin raa hɛ, na yin ra a yɛ fwom na yey min mwa.

²¹Yin kwon raa pyɛ́ de ya sé yapyi zɔng wɛt. Yê tɔk sɛlɛ hin, na ye sey in wɛt, yaga ya sé yapyi zɔng.

²²Dagwi Darwey a ga sira hɛ, a rɔda tik in wɛt, ko e tɔk sege ha mɛ wɛt. A di, a jam e yey mɛ, a tɛ̀ in, yin a sé bemat mɛ.

²³“Ko di, e bak o nwang, a sé kyiri, na me ra a Dagwi Darwey banɛn, de mê tik nà ra a yin won. Ko ma rɔda re nuyel na basa a yin e negya mwa pyɛ́ de ya sé ryat, yemo de yê sɛlɛ hin.

²⁴Ko pyɛ de ya dal mwa, raa hin hâ Dagwi Darwey, ra in a yɛ fwom na tsak o, na yey min mwa. Bare hin na gbɔng pyɛ́ de a ga ra a yin.

²⁵Ko ka sede yin a re nuyel na ragâs pyɛ́ vyes, ko ba rɔda wey na yin mwa na gwɔ̀m min.”