Read berom 1 Samwɛl 13 Bible Online

1 Samwɛl 13 - berom bible

1 Samwɛl 13

¹Saul á vɔk neshey kuru batat jeng de a hwo re negwɔm, a ra neshey neba,[11] a sé re negwɔm Israyɛl.

²Saul a kasa bemât como gu batat (3,000) e ji BeIsrayɛl, ko a tɛ̀ bwang o e gwong vɔk e nelɔ mɛn. Gu baba bá sè e vwɔ mɛ e Mikmash na e bak bahwôl Bet-Ɛl, ko gu rining ra sè e vwɔ̂ sɔ mɛ Yɔnatan e Gibeya wo yerê Bɛnyamin.

³Yɔnatan a mɔrɔ mwât nuyêl comô BeFilisti e Geba, ko BeFilisti mwa ba wok ha mo. Saul kwong a tomo betom e ji sevwel mwa, na be wɔ̀ yishi BeIbrani na bedurum, na be vey tó como mo.

⁴Ba há a BeIsrayɛl mwa, Saul a ga mɔrɔ mwât nuyêl comô BeFilisti, ko BeFilisti ba to kyɛ́ ɛn BeIsrayɛl o. Ano kwong, bemat ba vɛ̌ sogo mwa, ba wɔ̀ wuna hɛn na Saul e Gilgal.

⁵BeFilisti ba tula hɛn, na be tó como na BeIsrayɛl. Bekyɛkyɛ̂ bedwâ como mɛn ba sè gu kuru batat (30,000), bemât bedwa ba sè gu batyiimin (6,000), ko bemât como e bol bá sè sede bazɛk e vwarâ gworep, vit a bara. Yɛn a wɔ̀ tɛ̀ bǔk como mo e Mikmash, e vwâ rak na Bet-Avɛn.

⁶Jeng de bemât Israyɛl ba di, bé kyè wɔ̀ yel e yɔ́m, yaga ba ga hwo ɛn e como ding-ding, ko ba wɔ̀ lɛsɛ hɛn, behak e tara na e ji beta, behak e bavɔng na e ji besak, tanga behak e ji hes.

⁷Ko behak arɔng ba ye dɔ a Rɔt Yɔrdan vɔk e bavwêl Gat na Gileyat. Saul kwong á sè rɔngɔl e Gilgal, ko bemat de bá sè tanga yɛ bá sè vow rebek yaga bengyip.

⁸A gyeng Samwɛl e hwomo pɔlɔ taama, sede remo de a ga ha a yɛ. Ko Samwɛl o a vey e Gilgal o wɛt. Bemat kwong ba ga hwo gasang hɛn, ba tik ɛ.

⁹Saul a hwo yang ɛn, “Vey in a me na yas de be yɛt, na be rangas yɛ burang vɔk na Dagwi, tanga nenɔrɔ̂ sangal netyang.” A hwo nára nenɔrɔ̂ pyɛ̂ rangas o.

¹⁰A sé yɛnɛ nása pyɛ́ mo, ko gobok Samwɛl a sè pomos. Saul a wɔ̀ man na yɛ, na a yang ɛ show na vey.

¹¹Ko Samwɛl a yang ɛ, “Sɛ́ de hwà ga ra ɛ?” Saul a yang ɛ, “Ma di bemat ba sé gasang hɛn yi na me, ko hwo arɔng hwà vey e jeng de hwà tɛ̀ mo wɛt. BeFilisti arɔng ba ga tula hɛn e Mikmash,

¹²ko ma hwo bare, ‘BeFilisti ba rɔda ba hwo e ra me, ko ma ka tɔk rangâl Dagwi Darwey wɛt.’ Yaga ano, a sé a me gbing-gbing, na me nára nenɔrɔ̂ pyɛ̂ rangas o.”

¹³Samwɛl a yang ɛ, “Hwà ga ra fwôm netɔ̌n à gwane! Hwà ka gyeng badu Dagwi Darwey, Dagwi mō wɛt, yɛ de a ga kana tik ɛ wɔgɔ, segwɔm Israyɛl sa rɔda se mo gbak-gbak.

¹⁴Ko a remo, segwɔm mō sa rɔda re nuyel wɛt, yaga hwà kyɛ́ o nà gyeng badu mɛ. Dagwi Darwey a ga jāma mwat de a jam a yɛ e yey, na a tɛ̀ ɛ, a re negwɔm e ra bemat mɛ.”

¹⁵Samwɛl a vɛ̌ vo gwong yi e Gilgal. Bwâng bemat ba raa Saul jeng de á sè kyè wɔ sɛ̀ bemât como mɛ. Yɛn a kyè yi e Gilgal[12] vɔk e Gibeya wo yerê Bɛnyamin. Saul a hwo bara bemât como de ba pɔl ɛ na yɛ, ko ba sè sede naga betyiimin (600).

¹⁶Yɛ, na sɔ mɛ Yɔnatan, tanga bemât como mɛn ba sangal e Geba wo yerê Bɛnyamin. Ko BeFilisti ba tɛ̀ bǔk como mɛn e Mikmash.

¹⁷Bemât comô BeFilisti mo bagyɛng batat ba nusu wɔ jugu, regyɛng rining ra vɔk e pomô Ɔfra e vwêl Shuwal,

¹⁸regyɛng o rehak ra kwey vɔk e bak Bet-Hɔrɔn, ko rê netat ra doyo vɔk e raku de wó bɛrɛng Nɛk BeMurum wò tê hey.

¹⁹Ba tɔk sɛ̀ zu e ji mwa sevwêl Israyɛl e jeng yane wɛt, yaga BeFilisti ba ro BeIbrani, de be kwon turu a bato mɛn bewal na bebara.

²⁰Yaga ano, kawɛ mwât Israyɛl a gyirik vɔk na BeFilisti, na a wɔ̀ turu ron cap berɔndɔng, na a tang yuru, na a tang tyem, kɛ bwǎ[13] mɛ e hwomo.

²¹Ko byɛ de ba tala yaga turû ron o, tanga tâng yuru, na kàm, na tyem, na gworôk gyêng berɔndɔng ya sè babit baba e ji batat vê dyâm fwôm tuk hining.

²²Yaga ano, e tûk como mo ba tɔk sɛ̀ mwât comô Israyɛl hwak de a vɔk bara kɛ wal wɛt, sɛ̌ Saul tanga sɔ mɛ Yɔnatan zɔng.

²³Regyɛng bemât comô BeFilisti ra wɔ̀ dul gwông nɛk beraku e bak Mikmash.