Read berom 1 Samwɛl 14 Bible Online

1 Samwɛl 14 - berom bible

1 Samwɛl 14

¹Tuhak, Yɔnatan, a hwo yâng wen de e vɔkɔs a yɛ pyɛ̂ como, “Vey na wot ye calak vɔk e bǔk regyɛng BeFilisti.” Ko a ka há a da mɛ wɛt.

²Saul kwong á sè sangal e retîn cɔgɔ̂t pomigiranet e Migrɔn e vwâ Gibeya. Bemât como de bá sè tanga yɛ ba wul sede naga betyiimin (600).

³Ahiya á sè tanga yɛ arɔng, yɛ à hwêy Ahitup, gwa Ikabɔt, hwêy Pinehas Ɛli de á sè piris Dagwi Darwey e Shilo. Ahiya mo á sè piris, ko a kyesem na radîng pyɛ̂ fwôm rangsâl Dagwi. Ko vit a mwat de a ka tɔk, Yɔnatan a ga kyè vɔk e kwɔn hak.

⁴Gwong de Yɔnatan a simo a kwey ɛ, na a ye calak wɔ̀ sɛ̀ bemât comô BeFilisti mo, gwa vɔk bègbɔng beta behak belis o, rezâ gwining à Bozes, ko rezâ gwohwak à Sene.

⁵Gwining gwa sè e rwa bato wɔ̀ bɛrɛng mɛ Mikmash, gwining o kwong gwa sè e rwa batin wɔ̀ bɛrɛng mɛ Geba.

⁶Yɔnatan a yâng wen de e vɔkɔs a yɛ pyɛ̂ como, “Vey na wot ye calak vɔk e bǔk regyɛng bemandul vane. Gyeng rɔ̌, Dagwi Darwey a rɔda ra fwom mɛ na wot, yaga vit a pyɛ de yê tɔk dul ɛ nà sey bemat mɛ, kɛ yi na bemat pyak kɛ bemat tyɔng.”

⁷Ko wen o a yang ɛ, “Ra pyɛ de hwà di e yey mō zɔng. Còt a wot! Ma sé tanga hwo, hwo tó yey wɛt.”

⁸Yɔnatan a ye, “Tik, wot ye calak vɔk na yɛn, na yɛn a di ot.

⁹Ka sede yɛn a ye, ‘Tumal hin, wot a vane!’ Ko wot a rɔda tumal e kwɔn hane mo.

¹⁰Ko ka sede yɛn a ye, ‘Tút in vey e ngamo na wot!’ Ko wot a rɔda wɔ, yaga hane hê dura a wot, Dagwi Darwey a ga nára hɛn e vwɔ mot à rane.”

¹¹Yɛn a hwo kyè, ba dura bato mɛn e bayîs BeFilisti, ko BeFilisti mo ba ye, “Àaa, di in! BeIbrani ba ga nusu yi e ji bavɔng de ba kana lɛrɛ hɛn ɛ!”

¹²Ko ba yila Yɔnatan na wen de e vɔkɔs a yɛ pyɛ̂ como, ba ye, “Tút in vey e ngamo! Wot ê ha a yin pyɛ cak.” Yɔnatan kwong a yâng wen mɛ mo, “Raa me! Dagwi Darwey a ga nára hɛn e vwɔ̂ BeIsrayɛl!”

¹³A hwo tut e ra gwofwa mo na ngungu, mwât vɔ̂k pyɛ̂ como mɛ a sè raa hɛ na ngungu arɔng. Yɔnatan a wɔ̀ hwo e ra yɛn, a sè gangas hɛn, ko mwat mɛ kwong a sè raa e de mɔbɔs o.

¹⁴Mɔbɔs hê yel hane de Yɔnatan na mwât vɔ̂k pyɛ̂ como mɛ ba ra, há sè sede bemat kuru baba e ji kekwɔn de ka sé sede gàng cap gwining zɔng.

¹⁵BeFilisti mwa de bá sè e kwɔn hane mo ba lingsit na bengyip; vemo de ba wɔ̀ jugu, na vemo de bá sè e bǔk ba lingsit mwa, ko vwel ha vɔk ha digis. Bengyip yi na Dagwi ba tɛ̀ bemat ba kyě tele kpɛɛ.

¹⁶Bemât bɛrɛ̂ng nekanâng Saul e Gibeya wo yerê Bɛnyamin ba bɛrɛng BeFilisti be kyě tele kpɛɛ.

¹⁷Saul a hwo yâng bemat de ba sé tanga yɛ, “Bara hin bemât como, na wot di, e beva de ba sé vit arɛt?” Yɛn a hwo bara, ko ba di, vit a Yɔnatan tanga mwât vɔkɔs a yɛ pyɛ̂ como.

¹⁸Saul a hwo yâng Ahiya, “Vey na Kundung Wuna-na-Sirâ Dagwi e ngamo!” — Kundung o gwá se tanga yɛn e jeng yane.

¹⁹Jeng de Saul a rɔɔ ha na piris o, ko a di pyɛ mo ye gwɛ̌ kat ɛ, bemat be kyě tele kpɛɛ ding-ding, ko a vɛ̌ yâng piris o, “Tik ano!”

²⁰Saul tanga bemɛ à bemat ba nusu, ba wɔ̀ yel e ji tô como na BeFilisti, ko ba di bemat o be kyě tele kpɛɛ, be tow bemɛn, be mɔbɔs.

²¹BeIbrani behak de bá kana sè tanga BeFilisti e mɛsɛng o, vemo de ba ga kana tút tanga yɛn e bǔk como mo, ba to sege báre mɛn, ba toyo vey wuna hɛn na bemat de ba sé e vwɔ̂ Saul tanga hwey mɛ Yɔnatan.

²²Ko jeng de mwa BeIsrayɛl de bá gà sè e lɛrɛ e bahwôl Ɛfrayim ba wok, BeFilisti ba sé tele, yɛn arɔng ba wuna hɛn, ba to ro BeFilisti.

²³Ano de Dagwi Darwey a sey BeIsrayɛl tuk hane.

²⁴Bemât Israyɛl ba di reyɔm tuk hane za wɛt, yaga Saul a sira a yɛn, a ye, “Ka sede mwat a re pyɛ́ gyam na gwi gwo gaba, me rɔngɔl nà tala pyɔ̌n e ra bemât repugu hom, ko gawey yi na Dagwi ha rɔda hwo e ra yɛ!” Ano kwong, vit a mwat de a re pyɛ cak.

²⁵Ko bemât mwa ba pom e kwɔn de bèhamal shok ba sé ɛ, ko nshî shok na sè tɔngɔt e vwel. Jeng de ba wul kwɔn o, ba di nshî shok o, ko vit a mwat de a tɛ̀ kwɛn mɛ na a lɛlɛ, yaga yɛn a wok bengyip sira de Saul a ga ra.

²⁶

²⁷Ko Yɔnatan a ga kana wok jeng de da mɛ á gà tɛ̀ a bemat bengyip na sira mo wɛt. Ano kwong, jeng de a di shok o, a tɛ̀ nû gwele mɛ e hàmal shok o, a lɛlɛ, ko bayis mɛ ba ye wɛshɛrɛk.

²⁸Mwat hwak a yang ɛ, “Di, da mō a ga sira a bemat wɔgɔ, ‘Ka sede mwat a re pyɛ́ yunung, ko gawey yi na Dagwi ha rɔda hwo e ra yɛ.’ ” Yaga ano, bemat ba ruru, ba tɛ́ ɛn gbɛrɛk.

²⁹Ko Yɔnatan a ye, “Da hom a ga tɛ̀ bemat e ji reyɔm. Di, jeng de ma re shok yemo tyɔng, ko bayis hom ba vɛ̌ ye wɛshɛrɛk!

³⁰Sɛ́ ya yâng té yunung, ka sede bemat ba yâng re pyɛ́ de ba sey ɛ yi na bemât repugu mɛn ɛ? Ka ba yâng mɔbɔs BeFilisti be dal ano na nepyak wɛt a?”

³¹Ba mɔbɔs BeFilisti tuk hane yi e Mikmash vɔk e Ayalɔn, ko BeIsrayɛl ba ruru tyɔng wɛt.

³²Yaga ano, ba kyě tele, ba vos pyɛ́ de ba sey ɛ e como — vyēl, na berɔndɔng mwa na nèy o, ba yɛt, ko ba re banama mo na nemi de na rɔɔ e ji mo.

³³Ba wɔ̀ ha a Saul wɔgɔ, “Di, bemat ba sé ra a Dagwi Darwey banɛn, ba sé re banama na nemi e ji mo!” Saul a pɛl sekun, a ye, “Yin a ga row ot! Gangas hin gwogbɔng gwofwa vey e ngamo a remo.”

³⁴A yâng behak, “Gasang hin e ji bemat, na yin ha a yɛn, kawɛ mwat a vey na rɔndɔng kɛ vyel mɛ, na a vey yɛrɛ e ngamo. Yɛn a kwon ra a Dagwi Darwey banɛn, de yɛn ê re banama na nemi e ji mo wɛt!” Yaga ano, kawɛ mwat a vey na yas mɛ, a yɛrɛ e hwomo naturuk nane.

³⁵Ano kwong, Saul a yong gàgbang rangas pyɛ́ de be yɛt vɔk na Dagwi Darwey.

³⁶Saul a yâng bemat mɛ, “Vey in, wot gyirik wɔ̀ hwo e ra BeFilisti e ji turuk, na wot jugu hɛn sɛ̌ gasi ha ye gbey! Wot wey na yɛn mwa, wot kwon tɛt ɛ gwining wɛt!” Yɛn a yang ɛ, “Ra pyɛ de hwà di ya jam a hwo.” Ko piris a yang ɛ, “Tik, wot ka rangâl Dagwi Darwey e ngyen.”

³⁷Ano kwong, Saul a rangâl Dagwi, a ye, “Me wɔ̀ hwo e ra BeFilisti arɛt? Hwà rɔda nɔng ɛn e ji vwɔ mot arɛt?” Ko Dagwi a toyo a yɛ na ha tuk hane wɛt.

³⁸Saul kwong a yila bemât nuyel mwa, a yang ɛn, “Vey in e ngamo, na wot masa, na wot tɔk e vɛ̌ banɛn de ba ga ra yunung arɛt?

³⁹Ma ga sira me na Dagwi Darwey de e nɔngɔ̂s BeIsrayɛl wɛng, mwat de ba sɛ̀ ɛ na banɛn o, ko ba rɔda mɔrɔ hɛ, kɛ a ka sé hwey hom Yɔnatan ayi.” Ko vit a mwat de a yang ɛ pyɛ cak wɛt.

⁴⁰Ko Saul a yang ɛn, “Tula hin e bak gwining, ko me tanga Yɔnatan, hwey hom, wot sangal e bak gwining.” Bemat o ba yang ɛ, “Ra pyɛ de hwà di ya jam a hwo.”

⁴¹Saul kwong a hwo ra won na Dagwi, a ye, “À Dagwi Darwey, Dagwi wo BeIsrayɛl, yaga sɛ́ de hwà toyo a me na ha yunung wɛt ɛ? Dura a me nuha mō yi na pyɛ̂ fwôm rangsal hwo. Ka sede renɛn o ra sé e ra Yɔnatan kɛ me, ko hwo dura yi na ‘Urim’, ko ka sede renɛn o ra sé rê BeIsrayɛl, ko hwo dura yi na ‘Tumim’ ”, ko ha mo ha gaba e ra Saul na Yɔnatan, bemat ba nu hɛn hyɔ́l.[14]

⁴²Ko Saul a ye, “Be masa e tē hom tanga Yɔnatan.” Ko ha mo ha gaba e ra Yɔnatan.

⁴³Saul a hwo yang ɛ, “Há a me, e sɛ́ de hwà ra ɛ?” Yɔnatan a toyo a yɛ, a ye, “Ma tɛ̀ nû gwele hom e keshok tyɔng, ko ma lɛlɛ. Me a womo, be wey na me zɔng.”

⁴⁴Saul a yang ɛ, “Tik na Dagwi Darwey a wey na me, ka sede ba wey na hwo wɛt, à hwêy!”

⁴⁵Ko bemat ba ye, “Káa! Yɔnatan de a ga re a Israyɛl gbɔng wɛng e como yunung, ko be to wey na yɛ arɛt? Tyɔng tyɔng wɛt! Wot a sira hot na Dagwi Darwey, ko ketot rato mɛ kining ka rɔda tùt ɛ wɛt! Pyɛ de a ra yunung, a ra yi na retô Dagwi.” Yi ano yɛn a sey Yɔnatan yi e reku.

⁴⁶Yi e hwomo Saul a tik rô BeFilisti; yɛn arɔng ba toyo hɛn vɔk e vwel mɛn.

⁴⁷E bama de negwɔm Saul na ga tumal, yɛ kwong a tó como na mwa bemât repugu mɛ e kawɛ bak. A tó na BeMowap, na BeAmɔn, na BeƐdɔm, na begwɔ̀m Zoba, tanga BeFilisti. Saul a di wɛng[15] e kahɛ kwɔn de a to ɛ como.

⁴⁸A sè suga tyɔng wɛt, a re BeAmalɛk, ko a sey BeIsrayɛl yi e vɔ vemo de ba jugu hɛn.

⁴⁹Nèy bewên Saul, nɛ à Yɔnatan, na Yishwi, tanga Malkishuwa. Nèy behwōng mɛ, nɛ à Merap, kunat o, na Mikal, swɛl o.

⁵⁰Rezâ hwā mɛ, à Ahinowam Ahimaas, ko rezâ mwât nuyêl como mɛ, à Abnɛr Nɛr, gwa da mɛ.

⁵¹Kish, dâ Saul, tanga Nɛr, dâ Abnɛr, bá sè nèy Abiyɛl.

⁵²Mwa jeng de Saul á sè re negwɔm, a tó como na BeFilisti tyɔng wɛt. Kawɛ mwat de a di, a vɔk gap na yey ting, ko e jut ɛ, a gyira e ji bemât como mɛ.